Выбрать язык
Книги Ветхого Завета
Книги Нового Завета
с русским текстом1Мидия выжыысь Ассуирлэн пиезлэн Дарийлэн эксэйын нырысетӥ арзэ пукыкуз, со халдейёслэн кунзылы эксэе пуктэмын вал,2нырысетӥ арзэ со эксэйын пукыкуз, мон, Даниил, книгаосты эскерыса валай аръёслэсь лыдзэс, со сярысь Иеремия пророклы Кузё-Инмарлэн верам кылыз вал: Иерусалимез куашкатэм дырысен сизьымдон ар тырмоз.
3Вӧсяськыса, куриськыса, кӧс утьыса, чурыт-бышкись дӥсь дӥсяса, пень вылэ султыса, Инмар Кузё-Инмар пала ымнырме берыктӥ,4Инмаре Кузё-Инмар азьын вӧсяськи, ӧпкельыса сьӧлыкъёсылэсь куштӥськи но шуи: «Кузё-Инмаре, быдӟым но паймымон, сӥзён-косонэз возись, Тонэ яратӥсьёсты гажась-жалясь, курон-косонъёстэ чакласьёсты утись Инмаре, Тонэ вӧсяськыса курисько!5Сьӧлыкамы, законлы пумит улӥмы, сьӧлыкъёслэсь кышкаса ӧм улэ, вогъяськыса-пумитъяськыса улӥмы, Тынад курон-косонъёсыд бордысь, пуктон-косонъёсыдлэсь но палэнскимы;6ӧм кылзӥське Тынад ляльчиосыдлэсь, пророкъёслэсь но, кудъёсыз Тынад нимыныд эксэйёсмылы, кузёйыръёсмылы но, атайёсмылы но, быдэс кунысь вань калыклы но вераллязы.7Кузё-Инмаре, Тон дорын зэмлык, нош милям ымнырмы возьдаськыса улэ, туннэ нунал кадь ик, котькуд иудейлэн, Иерусалимын улӥсьёслэн, быдэс Израильлэн, матысьёслэн но, кыдёкысьёслэн но, Тон бордысь куштӥськемзы понна Тынад соосты уллям вань музъемъёсад.8Кузё-Инмаре! Ымнырмы возьдаськыса улэ – эксэйёсмылэн но, кивалтӥсьёсмылэн но, атайёсмылэн но, малы ке шуоно ми Тон азьын сьӧлыкамы.9Нош Инмармы Кузё-Инмар дорын гажан-жалян улэ, Со бордысь усимы ке но, Со сьӧлыкъёслэсь сузя.10Инмармылэсь Кузё-Инмарлэсь верам кылзэ санэ ӧм понэ, Солэн законъёсызъя ӧм улэ, кудъёссэ Со милемлы Аслаз ляльчиосыз – пророкъёс – пыр сётӥз.11Быдэс Израиль Тынэсьтыд закондэ сӧриз, Тынэсьтыд куарадэ медам кылы шуыса, палэнэ кожиз; со понна ми вылэ карган усиз, Инмарлэн ляльчиезлэн Моисейлэн законаз гожтэм юриськон кылъёс ми доры вуизы, Инмар азьын ми сьӧлыкамы уго.12Ми вылэ, милемыз судить карись судьяос вылэ верам кылзэ Со быдэстӥз, ми вылэ туж бадӟым курадӟон лэзиз, кыӵеез инъёс улын ӧй на вал, со Иерусалимын ортчиз.13Кызьы Моисейлэн законаз гожтэмын, озьы ик вань та курадӟон ми доры вуиз; нош ми, сьӧлыкъёсмылэсь мед палэнскомы но Тынэсьтыд зэмлыктэ валаны мед быгатомы шуыса, Инмармес Кузё-Инмарез тэльмырыса ӧм куре.14Кузё-Инмар та курадӟонэз эскериз-чаклаз но сое ми вылэ лэзиз: уго шонерлыко Инмармы Кузё-Инмар вань лэсьтоно ужъёсаз, нош ми Солэсь куаразэ ӧм кылзэ.
15Али но, Инмармы Кузё-Инмар, Египет музъемысь Ас калыктэ кужмо киын поттӥсь, туннэ нуналэ кадь ик дандэ возьматӥсь! Сьӧлыкамы, сьӧлыклэсь кышкатэк улӥмы.16Кузё-Инмаре! Тон зэмлыкез яратӥсь, Ас городэд, Иерусалим вылэ, святой гурезед вылэ вожпотонэд, йыркуред мед кысоз; уго милям сьӧлыкъёсмы понна, атайёсмылэн законлы пумит улэмзы понна Иерусалимез но, Тынэсьтыд калыктэ но ваньмыз котырамы улӥсьёс синазькыль каро.17Инмармы, Ас ляльчиедлэсь вӧсяськемзэ, солэсь куриськемзэ али но кыл, Ачид понна, Кузё-Инмаре, Аслад югыт-чылкыт ымнырыныд куашкатэм вӧсяськон интыед шоры учкы.18Инмаре, пельдэ мыкырты но кыл, синъёстэ усьты, куашкам улонмы шоры учкы, Тынад нимыдлы сӥзем городмы шоры но; ми уго Тон азе куриськонмес вайиськомы, асьмелэн шонерлыкмылы оскиськыса ӧвӧл, Тынад верантэм бадӟым гажан-жалянэдлы оскиськыса вайиськомы.19Кузё-Инмаре, кыл! Кузё-Инмаре, сьӧлыкъёсмес кушты! Кузё-Инмаре, кыл, быдэсты, эн ӝега Аслад нимыд понна, Инмаре, уго Тынад нимыд городэд борды, Ас калыкед борды гожтэмын».
20Мон верасько на вал, вӧсяськисько на вал, аслэсьтым сьӧлыкъёсме, Израиль калыкелэсь сьӧлыкъёссэ вераса, тэльмырыса улӥсько на вал, Инмарелэн святой гурезез сярысь Инмаре Кузё-Инмар азьын вӧсяськыса улӥсько на вал;21вӧсяськыса-куриськыса улӥсько на вал, Гавриил, кудзэ мон азьвыл адӟонам адӟи, ӝог лобӟыса вуиз но мон борды йӧтӥськиз, ӝыт курбон сётон азьын вал со,22визьмаса-валэктыса, монэн вераськыса улӥз но шуиз: «Даниил! Али мон тонэ визьлы дышетон понна васьки.23Вӧсяськыны кутскыкуд, кыл усьтӥськиз, сое тыныд вераны мон лыктӥ, уго тон Инмарлы яратыны ярамон мурт; табере кыл сярысь валатскы, адӟонэз валаны тыршы.24Сизьымдон пол сизьым ар*а тынад калыкед понна, святой городэд понна тупатэмын, йыруж шобыртэмын, сьӧлыкъёс пытсамын, законлы пумит улонъёс ӵошкатэмын мед луозы шуыса, пумтэм вапумъёс ӵоже улӥсь шонерлык ваемын мед луоз, адӟон но азьпалзэ тодытон пытсамын мед луоз, святойлэсь но Святой вӧйын зырӟемын мед луоз шуыса.
25Тод но вала: Иерусалимез выльдыны-ӝутыны косон потэм дырысен Кузё-Атай Христос дырозь сизьым пол сизьым ар но куатьтон кык пол сизьым ар; Иерусалим калык берытскоз, ульчаос пуктӥськозы, борддоръёс ӝутскозы, но со секыт аръёсы-вакытъёсы луоз.26Куатьтон кык пол сизьым аръёс ортчем бере Христосэз виыны сётозы, уз луы, нош городэз но вӧсяськон интыез лыктоно азьветлӥсьлэн калыкез куашкатоз, но пумыз-быронэз ву тудӟон дыръя кадь луоз, ожмаськон дыръёс бырытозь, куашкатъян-тарканъёс луозы.27Трос адямиос понна сӥзёнэз сизьым арлы юнматоз, нош сизьым арлэн ӝыныез ортчем бере курбон сётон, кузьым сётон дугдоз, вӧсяськон интые юрӟым куашкан вуоз, пумозязлы дасям бырон кисьтӥськоз куашкатӥсь вылэ».
*а 9:24 таяз учыре седмина «сизьым ар» шуэм луэ
Глава 9