Выбрать язык
Книги Ветхого Завета
Книги Нового Завета
с русским текстом1Персиялэн Кир эксэезлэн куинетӥ арзэ эксэйын пукон дыръяз Валтасар шуыса нимам Данииллы адӟон вал; зэм вал со усьтӥськон, туж бадӟым кужымен вал со. Та усьтӥськонэз, та адӟонэз со валаз.
2Куинь арня ӵоже мон, Даниил, ӝожомыса улӥ.3Ческыт нянь мон ӧй сиы; сӥлез но, винаез но ымам ӧй басьты, куинь арня ортчытозь, асме вӧйын ӧй зыра.
4Нош нырысетӥ толэзьлэн кызь ньылетӥ нуналаз бадӟым Тигр шурлэн ярдураз мон вал.5Синъёсме ӝутыса учки но адӟи: тани, пиосмурт сылэ, етӥн мертчанлэсь куэм шорт дэремен, кускыз Уфазысь ваем зарни еэн думемын.6Мугорыз топаз кадь, ымнырыз чилектэмлы укша, синъёсыз ӝуась сюсьтылъёс кадесь; киыз но пыдъёсыз чилясь ыргон кадь адӟисько, вераськем куараез трос адямиослэн чузъяськись куаразылы кельше.
7Мон, Даниил, огнам гинэ адӟи та адӟонэз, монэн ӵош учырам адямиос та адӟонэз ӧз адӟе; соос доры шимес кышкан вуиз но, бызьыса кошкизы, пегӟыны малпазы.8Мон огнам кыли но та быдӟым адӟон шоры учкыса улӥ; мугорам юнлыкез ӧз ни кыльы, ымныр тусбуйы туж воштӥськиз, кужыме быриз.9Соку мон кылӥ солэсь верам кылзэ; солэсь верам кылзэ кылыса гинэ вуи, куалектыса ымныр вылам выдӥ но озьы ымнырыным муз вылын кылли.10Тани, мон борды ки йӧтӥськиз но монэ пыдес вылам, ки вылам пыкъяськытӥз.11Со мыным шуиз: «Даниил, Инмарлы яратыны ярамон мурт! Мынэсьтым верам кылъёсме валаны тыршы, пыдъёсыд вылэ шонерак султы; уго мон тон доры туннэ ыстэмын». Та кылъёссэ верам бере мон куалекъяса муз вылысь султӥ.
12Со мыным шуиз: «Эн кышка, Даниил. Сюлэмдэ валан понна, Инмаред азьын зӥбыт-востэм луон пала берытскемед понна нырысетӥ нуналысен ик тынад кылъёсыд кабыл басьтэмын, тынад кылъёсыдъя мон лыктысал,13но Персия кунлэн эксэез кызь одӥг нунал ӵоже мыным пумит сылӥз; но, тани, Инмысь азьвалтӥсьёс пӧлысь одӥгез нырысь луисез, Михаил, мыным юрттыны лыктӥз; мон Персиялэн эксэйёсыз вӧзы кыли.14Нош али мон тыныд ивортыны лыктӥ, мар луоз тынад калыкеныд берпум аръёсы, та адӟон возьматэ кыдёкысь азьпалась улоно нуналъёсты».
15Та кылъёсты со мыным вераку, ымнырыным музъем вылэ выдӥ но пуми.16Но, тани, тусбуйызъя адями пиослы укшась кин ке ым бордам йӧтӥськиз но, мон ымме усьтӥ, вераськыны кутски, азям сылӥсьлы шуи: «Кузёе! Та адӟонлы луыса пушкысьтым вань пуш макеосы интыысьтызы вырӟизы но, мынам кужыме быриз.17Кызьы мон, тынад, таӵе кузёелэн ляльчиез, быгато тонэн, таӵе кузёеным, вераськыны? Уго мынам бордам кужыме ӧвӧл ни, пушкам шоканэ быриз».
18Соку нош ик та адями тусбуй мон борды йӧтӥськиз, мон пушкы кужым пыртӥз.19Со шуиз: «Эн кышка, Инмарлы яратыны ярамон мурт. Каньыллык тыныд сӥзисько; юнматскы, юнматскы!» Со монэн вераськыку, пушкам кужым пыриз но, мон шуи: «Вера, кузёе, уго тон монэ юнматӥд».
20Со шуиз: «Тодӥськод-а, малы мон тон доры лыктӥ? Табере мон берто Персиялэн эксэеныз нюръяськон понна; нош мон потэм бере, тани, Грециялэн эксэез лыктоз.21Зэмос гожтэмын мар верамын, мон тыныд иворто; но та ужын нокин но мынам юрттӥсе ӧвӧл, тӥляд Михаилды, Инмысь азьвалтӥсьты, сяна».
Глава 10