Выбрать язык
Книги Ветхого Завета
Книги Нового Завета
с русским текстом1Тӥни озьы, мидян пилэн Дарийлэн нырысетӥ арзэ эксэйын пукон дырысеныз мон солы пыкъет, юрттӥськись луи.2Али мон тыныд зэмлыкез верало: тани, Персияын эшшо куинь эксэйёс ӝутскозы на; собере ньылетӥез, со ваньзэс ортчоз туж бадӟым узырлыкеныз; узырлыкеныз юнмам бере Грециялы пумит вань калыксэ ӝутоз.3Кужмо эксэй ӝутӥськоз, со бадӟым кужымен кивалтоз, ваньзэ ас тодэмъяз лэсьтоз.4Нош куке со ӝутскоз, эксэйлыкез куашкалоз но дуннелэн ньыль палызлы люкиськоз, солэн выжыосыз кие со уз сюры, сыӵе кужмо но уз луы, кыӵе вал ачиз кивалтыку; солэн эксэйлыкез люкиськылоз но мукетъёс кие сюроз.
5Кужмо луоз лымшор эксэй, солэн одӥгез кивалтӥсез вормоз сое, кузё луоз, солэн кужымез туж бадӟым луоз.6Нош кӧня ке ар ортчыса, соос матэ кариськозы, лымшор эксэйлэн нылыз уйпал эксэй доры лыктоз кусыпъёссэс шонертон понна; но со ныл кужымез кияз кутыса возьыны уз быгаты, солэн выжыез но сылыны уз чида; ачиз кадь ик сое келяса ветлӥсьёс, вордэм нуныез но, со вакытэ солы юрттӥськыса ветлӥсьёс но вузамын луозы.
7Но солэн выжыысьтыз пушъет ӝутӥськоз, ожгарчиос доры лыктоз но уйпал эксэйлэн юнматэм интыосаз пыроз, мар кулэ лэсьтоз но юнматскоз,8соослэсь инмаръёссэс но, сульдэръёссэс-идолъёссэс, дуно сосудъёссэс, азвесьлэсь, зарнилэсь лэсьтэмъёсты, Египетэ пленэ нуоз, кӧня ке ар ӵоже уйпал эксэйлэсь вылӥын сылоз.9Та лымшор эксэйлык вылэ урдӥськиз ке но, аслаз музъемаз берытскоз.
10Собере солэн пиосыз ожмаськон тӥрлык кутозы, туж трос ожгарчиосты люкалозы, соос пӧлысь одӥгез ӝог мыноз, тудӟем ву кадь лыктоз, ортчоз, собере бертыкуз соин ожмаськоз, юнматскон интыосыз дорозь.11Лымшор эксэйлэн йырыз кур луоз, уйпал эксэйлы пумит мыноз, ожмаськоз соин, бадӟым войскозэ поттоз, войско солэн киулаз сётэмын луоз.12Ожгарчиос сэзь кариськозы, эксэйлэн сюлмыз лӧптоз; трос сюрс муртэ погыртоз, но таин со кужмогес уз луы.13Уго уйпал эксэй берытскоз но талэсь но тросгес ожгарчиосты люкалоз но, кӧня ке ар ортчыса, ӝог лыктоз пумтэм трос ожгарчиосын, бадӟым узырлыкен.14Со дыре тросэз лымшор эксэйлы пумит султозы, тынад калыкедлэн пиосыз пӧлысь бугыръяськись сямоосыз султозы та адӟон быдэсмон понна, собере усёзы.
15Уйпал эксэй лыктоз но окоп гудоз, юнматэм карез киултоз; лымшорлэн суйбыгытэз уз чида, солэн бырйыса дасям ожгарчиосыз но; ваче пумит сылыны кужымез уз тырмы.16Кин со доры потоз, со солэн эрикезъя лэсьтоз, со азьын нокин но сылыны уз чида; данлыко музъем вылэ дугдоз но солэн киызлэсь курадӟон чидано луоз.17Эксэйлыкысьтыз вань кужымез люкаса, шонер улӥсьёсын ӵош отчы пырыны со малпалоз, тае со быдэстоз; эксэйлыклы бырон мед ваёз шуыса, аслэсьтыз нылзэ солы кышнолы сётоз, но солэн та малпанэз уз быдэсмы, та ужлэсь со нокыӵе но пайда уз басьты.18Собере со ымнырзэ шормуӵъёс пала берыктоз, троссэ киулаз басьтоз; нош кыӵе ке но азьветлӥсь соосты возьытэ вуттэмзэс дугдытоз, аслэсьтыззэ возьытэ вуонэз но со вылэ лэзёз.19Собере со ас музъем вылысьтыз изкаръёс шоры учкоз; но со канжаськоз, усёз, уз ни лу.
20Со интые кыӵе ке но мурт султоз, эксэйлыкезлэсь данлыксэ ӝутон понна выт бичасез ортчыны косоз; но трос ик дыр уз ортчы, со кулоз, бугыръяськон дыръя ӧвӧл, ожмаськыку но ӧвӧл.
21Солэн интыяз синазькыль мурт пуксёз, солы эксэй луонлэсь сӥ-данзэ уз возьматэ; со шыпытак лыктоз но кескич амалэн эксэйлыкез киултоз.22Ваньзэ нюртӥсь уллёос нюртэмын луозы, соосты со куашкатоз, сӥзёнлэсь кивалтӥсьсэ но.23Уго соин эшлыко кусыпъёс кылдытэм бере со ӧрекчаськыса ужъёссэ лэсьтоз, ӝутскоз, ӧжыт калыкен сое вормоз.24Со шыпыт улӥсь, узырлыко кунэ пыроз но сыӵе уж лэсьтоз, кудзэ солэн атаез, атаезлэн атайёсыз ӧз лэсьтэ; талам ваньбурез, узырлыкез аслазъёслы сётъялоз, изкаръёссэс но киултыны малпалоз, но со вакчи дыр гинэ кыстӥськоз.
25Собере со кужымзэ, сюлэмзэ-мылкыдзэ трос ожгарчиосыныз валче лымшор эксэйлы пумит ӝутоз; соку лымшор эксэй туж бадӟым, эшшо кужмогес войскоеныз солы пумит ӝутскоз, но уз вормы, малы ке шуоно солы пумит кескичлык ужалоз.26Соин ӵош сиськисьёс сое быдтозы, ожгарчиосыз пазьгиськозы, трос виемъёс-погыртэмъёс луозы.27Кыксылэн ик эксэйёслэн сюлмазы кескичлык улоз, одӥг ӝӧк сьӧрын пукыса, ог-огзылы ӧрекчаськон кылъёс вералозы, но азинлыксы уз луы, малы ке шуоно дырыз ӧз на вуы.28Туж трос узырлык люкаса, святой сӥзёнлы тушмон мылкыдын аслаз музъемаз со кошкоз; урод малпанзэ со быдэстоз, собере аслаз музъемаз берытскоз.
29Пусъем дыре со нош ик лымшоре мыноз; но таиз сюресэз азьвылэз кадь уз луы,30уго соин огдыре Киттим пыжъёс лыктозы; мылкыдыз куашкалоз но, со берен кошкоз; святой сӥзёнлы йыркурез пурӟоз но, со ас малпанзэ быдэстоз; святой сӥзёнлэсь куштӥськемъёсын кусып кылдытоз.31Ожгарчиосыз пӧлысь оглюкетсэ ӝутоз, соос быдӟым вӧсяськонлэсь дун-чылкыт интызэ сапталозы, нуналлы быдэ сётӥськись курбонэз дугдытозы, юрӟым макеез пуктозы.32Сӥзён-косонэз сӧрыса, сьӧлыклэсь кышкатэк улӥсьёсты либатыса ас палаз берыктоз; нош Инмарез сӥлы карисьёс кужым люкалозы, тэк уз улэ.33Калыклэн визьмо муртъёсыз тросэзлы визь-нод сётозы, кӧня ке но дыр ӵоже тӥр-пурт улын, тыл улын, пленэ сюрыса, таласьёс киулэ шедьыса курадӟоно ке но луизы;34курадӟыса улон дыръязы кӧня ке но юрттэтсы луоз, тросэз соос борды кариськозы, но синпӧетлы гинэ.35Визьнодоос пӧлысь куд-огез соосты эскерон-чаклан понна, чылкытатӥськыны, берпум вапумъёслы югыт-чылкыт луон понна курадӟон чидано луозы; срок вуытозь дыр вань на уго.
36Та эксэй ас тодэмъяз ваньзэ лэсьтоз, ӝутскоз, вань инмаръёслэсь ассэ вылӥе пуктоз, инмаръёслэн Инмарзы сярысь но урод кылъёс вералоз, вожпотонлэн пумыз вуытозь, азинлыкез луоз: мар кулэ быдэсмыны, со быдэсмоз.37Атайёсызлэн инмаръёссы сярысь со уз малпаськы, кышноосызлэсь мылкыд каронзэс но лыдэ уз басьты; нокыӵе инмарез но сӥлы уз кары; уго со ассэ ваньмызлэсь вылӥе пуктоз.38Юнматэм изкаръёслэн инмарзылы соослэн интыязы сӥ-дан сётоз, атайёсызлэсь тодымтэ инмарзэс зарниен, азвесен, дуно изъёсын, пӧртэм дуно тӥрлыкен сӥё-дано карыса улоз,39мурт инмарен юнматэм изкаръёслы со тазьы кароз: кинъёс сое санэ понозы, соосты сӥё-дано карылоз, соослэн киулазы трос ляльчиосты сётылоз, кузьым-мед карыса, музъем люкылоз.
40Дыръёслэн пумазы соин лымшор эксэй ожмаськоз, уйпал эксэй тӧлпери кадь ожмаськон уробоосыныз, вал вылын ветлӥсь ожгарчиосыныз, пумтэм трос корабльёсыныз со вылэ урдскоз, ёросъёсыз вылэ тудӟем ву кадь урдскоз но соослэн пыртӥзы потоз.41Чеберлэсь но чебер музъеме со пыроз, трос ёросъёс курадӟон улэ сюрозы; Едом, Моав, Аммон пиослэн музъемзылэн бадӟым люкетыз гинэ солэн киызлэсь утиськыны быгатозы.42Пӧртэм кунъёс вылэ кизэ лэзёз, Египет музъем но солэсь утиськыны уз быгаты.43Египетлэсь зарнизэ, азвесьсэ, пӧртэм дуно арбериоссэ киулаз басьтоз; Ливиын, Эфиопияын улӥсьёс со сьӧры мынозы.44Но шундыӝужанысь, уйпалась вуэм иворъёс сое куалектытозы, троссэ виылон, быдтон понна туж бадӟым вожпотонэн со султоз.45Данолэсь но дано вӧсяськон интылэн гурезен зарезь вискы эксэй тылысъёссэ пуктылоз; но солы пум вуоз, нокин но солы уз юрттӥськы.
Глава 11