Выбрать язык
Книги Ветхого Завета
Книги Нового Завета
с русским текстом1«Со дыре-вакытэ Михаил, Инмысь быдӟым азьвалтӥсь, султоз,
со тынад калыкедлэн пиосыз пала дурбасьтыса улоз;
туж секыт дыр вуоз, сыӵе дыр адямиос кылдэм дырысен
та дырозь ӧй на вал;
но тынад калыкед пӧлысь кинъёс книгае гожтэмын луозы,
ваньзы утиськозы.
2Музъем пушкын кӧлӥсьёс пӧлысь тросэз сайкалозы,
одӥгъёсыз пумтэм вапумъёс ӵоже улон понна,
мукетъёсыз – пумтэм вапумъёс ӵоже возьытэ вуон,
куаретон-пыкылонэз чидан понна.
3Визьнодоос инмысь шундыен толэзь кадь чиляса улозы,
трос адямиосты шонерлык пала берыктӥсьёс
пумтэм вапумъёс ӵоже, котьку но
кизилиос кадь пиштыса улозы.
4Нош тон, Даниил, та кылъёсты ват, та книгаез печатен нюртыса, берпуметӥ дыръёс вуытозьлы ворса; тросэз сое лыдӟозы но тодонзы будоз».
5Соку мон, Даниил, учки но адӟи: эшшо кыкез сылэ на, одӥгез шурлэн та пал ярдураз, мукетыз – тупалан.6Шурысь вуос йылын сылӥсь етӥн шортдэремен дӥсяськем пиосмуртлы одӥгез шуиз: «Та паймымон возьматсконъёс ку бырозы?»7Кылӥ мон, кызьы етӥн шортдэремен дӥсяськем пиосмурт, шурысь вуос йылын сылӥсь, бур кизэ, паллян кизэ ин пала ӝутыса, пумтэм вапумъёс Улӥсьлэн нимыныз кыл сётӥз: дырлэн-вапумлэн, дыръёслэн-вапумъёслэн, ӝыны дырлэн-вапумлэн пумазы, святой калыклэн кужымез чылкак бырем бере ваньмыз та ортчоз.
8Мон тае кылӥ, но ӧй вала, соин ик юай: «Кузёе! Собере мар луоз?»9Со ответ сётӥз: «Мын, Даниил; уго та кылъёс берпум дыръёс вуытозьлы ватэмын, печать нюртыса пытсамын».10Тросэз дун-чылкыт луозы, югдытскозы, визь сынаськонъёс пыр ӵыжатскозы; сьӧлыклэсь кышкасьтэмъёс сьӧлыклэсь кышкатэк улозы; сьӧлыклэсь кышкасьтэмъёс пӧлысь одӥгез но тае уз вала, нош визьнодоос валалозы.11Нуналлы быдэ курбон сётонэз дугдытэмзы дырысен, юрӟым макеез пуктэм дырысен сюрс кык сю укмыстон нунал ортчоз.12Кин возьма но сюрс куинь сю куамын вить нуналлэсь вуэмзэ витьыны чида, со мурт шудо.13Нош тон мын шутэтскы, буйгалод, люкеттэ басьтон понна нуналъёс бырон азьын султод.
Глава 12