Alliluija! 1Kitkat Ižandad! Hän om hüvä, hänen armod püžuba igän. 2Sanugaha Izrail’an rahvaz: hän om hüvä, hänen armod püžuba igän. 3Sanugaha Aaronan sugu: hän om hüvä, hänen armod püžuba igän. 4Sanugaha Ižandad varaidajad: hän om hüvä, hänen armod püžuba igän.
5Ahtištusiš minä kucuin Ižandad, hän kulišti i toi mindai avonaižele sijale. 6Ižand om minun polel, minä en varaida. Midä voiba tehta minei mehed? 7Ižand abutab minei, varaidamata minä voin kacta minun vihanikoihe. 8Paremb om vauvatada Ižandaha, mi varastada abud mehišpäi. 9Paremb om nadeidas Ižandaha, mi varastada abud knäzišpäi.
10Kaik mirun rahvahad ümbärziba mindai, no Ižandan nimel minä vägestin heid. 11Hö tuliba kaikjalpäi, ümbärziba mindai, no Ižandan nimel minä vägestin heid. 12Hö ümbärziba mindai kuti mezjaižed pezan, no kadoiba kuti lämoi ternpenzhas. Ižandan nimel minä vägestin heid. 13Hö toukaižiba mindai lujas, miše minä lanksižin, no Ižand tugezi mindai. 14Ižand om minun vägi i kitändpajo, hän päzuti mindai.
15Oigedmeližiden kodiš kulub ilon da päzutandan än’: «Ižandan oiged käzi tegeb surid radoid!» 16Ižandan oiged käzi om libutadud, Ižandan oiged käzi ladib surid tegoid!
17Minä en kole, a elän i sanelen Ižandan radoiš. 18Ižand openzi mindai kovas, no ei andand kolda. 19Avaikat minei oiktan elon verai! Minä mänen südäimehe da kitän Ižandad.
20Täs om Ižandan verai, tozioiktad tuleba sihe. 21Minä kitän sindai, miše sinä kulištid mindai da andoid minei päzutandan. 22Kivi, miččen pertinsauvojad taciba polhe, tegihe päkiveks. 23Ižand tegi sen, i se om čud meiden sil’miš. 24Necen päivän tegi Ižand. Libutagat iloän’, olgat hüviš meliš necen päivän polhe! 25Ižand, ole mugoine hüvä, päzuta meid! Ižand, ole mugoine hüvä, anda meile satusid elos!
26Blaslovidud olgha se, ken tuleb Ižandan nimes, Ižandan kodišpäi mö blaslovim teid.
27Ižand om Jumal, hän andoi meile päivänvauktan, sidokat žertv noril, kingitagat se altarin sarvihe.
28Sinä oled minun Jumal, sindai minä kitän. Minun Jumal, sindai minä ülenzoitan. Kitän sindai, ku kulištid mindai da päzutid. 29Kitkat Ižandad! Hän om hüvä, hänen armod püžuba kaiken igän.
с русским текстом