1Horan ohjandajale. Korejan poigiden openduz. 2Minun Jumal, mö ičemoi korvil kulim, meiden tatad saneliba meile, miččid tegoid sinä tegid heiden aigan, niil amuižil päivil. 3Ičeiž kädel sinä veid kadondaha verhad rahvahad, a meiden tatad ištutid neche maha. Sinä küksid verhad rahvahad, andoid necen man meiden tatoile. 4Ei hö iče suril veičil sanugoi necidä mad, ei heiden vägi tond heid tänna, a toi sinun oiged käzi, sinun vägi da sinun sil’miden lämoi, sikš ku sinä olid mel’dünu heihe.
5Minun Jumal, sinä oled minun kunigaz, anda päzutand Jakovale! 6Sinun abul mö puskem meiden vihanikoid, sinun nimen vägel polktam maha meiden vastustajid. 7En vauvata minä minun tauguhu, ei päzuta mindai minun sur’ veič. 8Sinä päzutad meid vihanikoišpäi, sinä huigenzoitad meiden vihankandajid. 9Mö kitämoiš Jumalal joga päivän, ülenzoitam sinun nimed igän.
10No sinä hül’gäižid meid i veid huiktaha, ed lähtend meiden toragruppidenke. 11Sinä panid meid pagenemha vihanikoišpäi, vihanikad röstaba meil kaiken. 12Sinä andoid meid, kuti lambhid, toižile sömäks, sinä küksid meid mirun rahvahiden keskhe. 13Sinä möid ičeiž rahvahan odvas, ed sand nimittušt ližad. 14Sinä andoid meid rindaleläjile rahvahile lajindaks, ümbriolijoile nagrandaks da huigenzoitandaks, 15tegid meid tartsanaks rahvahiden keskes, kaik pudištaba päd meihe kactes. 16Mindai huigenzoittas joga päivän, minei om ani huiged, 17konz tühjanpagižijad i kelastajad nagraba mindai, vihanikad i aznoičijad kacuba minuhu.
18Kaik nece om tulnu meiden päle, no mö em unohtanugoi sindai, em murendanugoi kožmust sinunke. 19Meiden südäimed ei käraudanus sinuspäi, a jaugad ei särahtanugoi sinun tespäi, 20hot’ sinä veid kadondaha meid drakonoiden mas i katoid meid pičkpimedal. 21Ku mö unohtanuižim meiden Jumalan nimen, da oigendanuižim meiden käded verhale jumalale, 22ka jose Jumal ei tundištanuiži necidä? Ved’ hän tedab kaikiden südäinmeled. 23No sinun täht surmitas meid joga päivän, pidetas kuti lambhid märitud pututandaha.
24Libu, mikš magadad, minun Ižand! Heraštu, ala hül’gäida meid igäks! 25Mikš peitäd meišpäi sil’mäd, unohtad meiden tuskan da bedan? 26Meid polgetadihe maha, meiden hibjad ani vajuiba pölühü. 27Libu meile abuhu, pästa valdale sinun armoiden täht!
с русским текстом