Выбрать язык
Выбрать рассказ Ветхого Завета
Выбрать рассказ Нового Завета
Гижöтö велöтiсь Исуссö ылöтöм-кутöм могись кыдзкö юалас: «Велöтiсь! Мый меным керны пырся оланö пырöм понда?» Исусыс шуас сылö: «Туйдöтас*а мый гижöм? Кыдз вежöртан?» Мöдыс паныт шуас: «Ассит Дöсвидзись*б Ентö радейт быд сьöлöмсянь, ловтö пукты Сы понда, радейт быдсöн выннат, быдсöн вежöрнат. Матiсьтö радейт асьтö моз». Исусыс висьталас сылö: «Бура тэ висьталiн. Сiдз кер, сэк пондан овны». Асьсö дорйöм могись мöдыс юалас Исусыслiсь: «Кин менам матiсьыс?» Исусыс паныт висьталас:
«Ерусалимсянь Ерикон карö мунiкö öтiк морт шедас лёк отирлö. Нiя чöвтасö сы вылiсь паськöмсö, вартласö сiйö, колясö туй дорö садьтöг. Сы коста öтiк поп мунöм сiя туй кузя. Сiйö казялöм бöрын вуджöм туй мöдöрö. Сiдз и вичкуын уджалiсь мунас сэтi, сибöтчас, видзöтас да мунас одз лань.
Самарейись öтiк морт мунас сэтi, казялас вартлöмсö. Сэк сылöн сьöлöмыс вöрзяс. Мортыс сибöтчас, дойманiннэсö мавтас винаöн да виöн, каттяс. Пуксьöтас вартлöмсö аслас осёл вылö, вайöтас узьлан керкуö, видзöтас сы сьöрын. Мöд лунас мунтöнняс кыскас кык динар, сетас керку видзисьыс лö. Тшöктас видзöтны мортыс сьöрын да висьталас: видзан кö унажык, ме бертiкам вешта тэныт».
Висьтасьöмыс бöрын Исусыс юалас Гижöтö велöтiсьыс лiсь: «Тэ сьöртi, куимнанныс коласiсь вартлöм мортыслö кин вöлi матiсьыс?» Мöдыс паныт шуöм: «Сылö отсалiсьыс». Сэк Исусыс сылö висьталас: «Мун и тэ кер сы моз».
Лука 10:25-37
*а Туйдöт – Закон
*б Дöсвидзись – Владыка, Господь
96 