Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
РУФА ВООЗЛÖН ВИДЗ-МУ ВЫЛЫН
Ноеминь да Руфа мунiсны Виплиемö. Кор найö воисны сэтчö, став карыс шызис. Йöзыс шуалiсны, Ноеминь пö локтöма. Но сiйö шуис налы: «Водзö энö шуöй менö Ноеминьöн, а шуöй Мараöн, öд Ставсöвермысь ыстiс меным ыджыдсьыс-ыджыд шог*а. Кор ме мунi татысь, менам ставыс вöлi, а öнi Господь вайöдiс менö татчö куш киöн».
Öтчыд Руфа петiс видз-му вылö да кутiс öктыны вундысьяс бöрся гылалöм шепъяс. Тайö видз-муыс вöлi Воозлöн. Сiйö вöлi Елимелек рöдвужысь. Вооз кывлiс, мый Руфа эновтöма ассьыс чужанкотырсö да локтöма йöз муö, медым тöждысьны радейтана энькаыс вöсна.
Вооз чукöстiс Руфаöс да шуис, верман пö волывлыны видзму вылö быд лун. Аслас кесйöгъяслы Вооз тшöктiс колявны ас бöрсяньыс шепъяссö да öлöдiс, мед оз вöрöдны Руфаöс. Вооз шуис Руфалы: «Меным висьталiсны, мый верöс кулöм бöрад тэ эн эновт ассьыд энькатö. Ме тöда, мый тэ колин ассьыд бать-мамтö да чужан мутö и локтiн войтыр дiнö, кодöс водзын эн тöдлы. Мед мынтас тэныд Господь тэнад бур вöчöмысь. Мед лоас тэныд тырдоныс*б Господьсянь, Израильлöн Енсянь, кодлöн борд улö тэ локтiн». Рам да бур сьöлöма Руфа вочавидзис сылы: «Ыджыдöй, тэ зэв бур сьöлöма ме дiнö. Ме ог шогмы лоны тэнад кесйöгъяс лыдын, но тэ бурöдiн менö бур кывъяснад».
Регыд мысти Вооз гöтрасис Руфа вылö, и сiйö чужтiс пиöс. Аньяс шуисны Ноеминь энькаыслы: «Ошкана Господь сетiс тэныд тайö кагасö, медым сiйö тöждысис тэ вöсна. Тайö зонкаыс мед лоас нималана Израильын! Сiйö лоас тэныд гажöдысьöн олöм чöжыд да вердысьöн кувтöдзыд. Öд сiйöс чужтiс тэнад моньыд, кодi радейтö тэнö». Ноеминь радейтiс кагаöс, видзис да быдтiс сiйöс. Кагалы сетiсны Овид ним.
Овидлöн сэсся чужис Ессей, Ессейлöн чужис Давид. Давид лои нималана израильса öксыöн.
уфа 1-4
*а Ноеминь нимлöн вежöртасыс – ”шуда”, а Мара нимлöн вежöртасыс – ”шудтöм”.
*б тырдон – награда
146 
