Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
АННАЛÖН КЕВМЫСЬÖМ
Елкана нима морт Анна гöтырыскöд олiс Рама карын. Быд во, урчитöм лунъясö, найö ветлывлiсны Силом карö юрбитны да вись вайны Енлы. Анналöн эз вöв ныв-пиыс, та понда сiйö ёна шогсис. Елкана радейтiс ассьыс гöтырсö, и сылы вöлi зэв жаль пöлыс. Кор Анна бöрдiс да весиг эз сёй, Елкана бурöдлiс сiйöс: «Анна, мыйла тэ бöрдан? Мыйла он сёй? Мыйысь шогсьö тэнад сьöлöмыд? Абу-ö ме бурджык дас пи дорысь?»
Öтчыд, кор найö вöлiны вежа керкаынöсь, Анна кыз синваöн бöрдiс-кевмысис: «Ставсöвермысь Господьöй, эн вунöд менö, Ассьыд кесйöгтö. Тэ кö аддзан менсьым шогсьöмöс, казьтышт менö. Господьöй, сетан кö меным пиöс, ме сета сiйöс Тэныд пыр кежлö».
Анна дыр кевмысис Енлы. Кевмысигас сöмын вом доръясыс сылöн вöрыштiсны. Илий поп видзöдiс Анналöн вом вылö да чайтiс, мый сiйö код юра. Сэсся шуис: «Дыр-ö на тэ кутан кодавны? Мун да пальöдчы!» Анна вочавидзис: «Ме абу код, ыджыдöй. Вина-сур ме эг ю, ме зэв шудтöм ань. Ассьым шогöс восьтi Господьлы. Эн лыддьы менö шогмытöм нывбабаöн. Аслам ыджыд шогöй вöсна ме дыр кевмыси». Илий вочавидзис: «Мун лöня. Израильлöн Ен мед сетас тэныд, мый тэ корин Сылысь». Анна аттьöалiс Илийöс бур кывъясысь, и сылöн сьöлöмыс сэсся эз нин шогсьы.
Ен кылiс Анналысь кевмысьöмсö, и сiйö чужтiс пиöс.
Öксыяслöн медводдза небöг 1:1-20
148 
