Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ИСУС ПЕТКÖДЧÖ САВЛЛЫ
Савл мöдöдчис Ерусалимысь Дамаскö. Туй вылас Савлöс виччысьтöг кытшалiс енэжсяньыс югыд. Сiйö уси муас да кылiс гöлöс шы: «Савл, Савл, мыйла вöтлан Менö?» Сiйö юалiс: «Кодi Тэ, Господьöй?» Господь шуис сылы: «Ме – Исус, кодöс тэ вöтлан. Сьöкыд тэныд мунны ёсь зорлы паныд». Савлöс полöм босьтiс, тiралöмöн сiйö юалiс: «Господьöй, мый кöсъян, мед ме вöчи?» Господь шуис сылы: «Чеччы да мун карас. Сэнi висьталасны, мый тэныд колö вöчнысö».
Савлкöд öтлаын локтысьяс шöйöвошöмöн сулалiсны: найö кылiсны сёрни, а висьталысьсö эз аддзыны. Савл чеччис муысь, восьтiс синсö, но нинöм эз аддзы. Киöдыс кутöмöн сiйöс вайöдiсны Дамаскö. Куим лун чöж сiйö нинöм эз аддзы да олiс сёйтöг-ютöг.
Дамаскын олiс Ананий нима морт, сiйö тшöтш вöлi Кристослы эскысьöн. Господь петкöдчис сылы да шыасис: «Ананий!» Сiйö вочавидзис: «Танi ме, Господьöй». Господь шуис сылы: «Чеччы да мун Веськыд нима туй вылö. Юав Иуда керкаысь Тарсын чужлöм Савл нима мортöс. Öнi сiйö кевмысьö. Ме сылы петкöдлi, мый Ананий нима морт локтас, пуктылас сы вылö кисö, да сiйö кутас аддзыны». Ананий вочавидзис: «Господьöй, ме унасянь кывлi тайö мортыс йылысь, мыйта лёк сiйö вöчис Тэнад вежа войтырлы Ерусалимын. Сылöн эм аркирейяссянь гижöд, та вöсна вермас босьтны быдöнöс, кодi шыасьö Тэнад нимö». Господь шуис: «Мун. Ме бöрйи сiйöс кесъявны Меным, юöртны Менсьым нимöс мукöд войтырлы да öксыяслы, тшöтш Израиль войтырлы. Ме петкöдла сылы, мыйта сьöкыд ковмас нуны сылы Менам ним вöсна».
Ананий мунiс, пырис Иуда керкаö да Савл вылö кисö пуктöмöн шуис: «Савл вокöй! Менö мöдöдiс тэ дiнö Господь Исус, кодi петкöдчис тэныд туй вылын. Сiйö мöдöдiс менö, медым тэ бара кутiн аддзыны да тырин Вежа Лолöн». Пырысь-пыр Савллöн синмысь быттьö чери сьöм усис, да сiйö пондiс аддзыны. Сэсся Савл дзик пыр пыртчис.
Кымынкö лун Савл олiс Дамаскын велöдчысьяскöд. Сэнi сiйö юöртiс-висьтавлiс синагогаясын, мый Исус эм Ен Пи.
Апостолъяслöн уджъяс 9:3-20
458 
