Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ПАВЕЛ РИМСА ЮРАЛЫСЬ ВОДЗЫН
Ерусалимын дзескыдiнö пуксьöдöм бöрын мöд луннас Павелöс вайöдiсны юдейяслöн веськöдлан котыр водзö. Чукöртчöмаяс пондiсны вензьыны ас костаныс да юксисны кык пельö. Сюрсöн веськöдлысь весиг повзис, мый косявласны Павелöс. Та вöсна тшöктiс шыпуртаяслы босьтны Павелöс да нуöдны изкарö*а. Сiйö войнас Господь сувтiс Павел водзö да шуис: «Эн пов, Павел. Öнi тэ Ерусалимын висьталiн Ме йылысь, тадзи тэныд ковмас висьтавны тшöтш Римын».
Асывнас юдейяс пöвстысь кодсюрö ас костаныс сёрнитчöмöн сетiсны кыв, мый оз кутны сёйны-юны, кытчöдз оз вины Павелöс. Кор сюрсöн веськöдлысь тöдмалiс та йылысь, сiйö тшöктiс дасьтыны тышкайöзысь 470 мортöс, мед нуöдны Павелöс Кесарияö.
Кесария карын Павелöс вайöдiсны Феликс нима римса юралысь водзö, кодi веськöдлiс Юдея муöн. Феликс бура тöдiс Исус Кристос йылысь велöдöмсö. Сiйö эз аддзы Павеллысь некутшöм мыж, та вöсна шуис виччысьны сюрсöн веськöдлысьлысь локтöмсö. Тадзи Павелöс колисны пукавны дзескыдiнö.
Кык во мысти Феликс пыдди юралысьö пуксис Порций Фест. Фестöс чолöмавны Кесарияö локтiс Агриппа öксы Вереника гöтырыскöд. Фест висьталiс Агриппалы Павел йылысь. Кор Павелöс вайöдiсны Агриппа öксы водзö, сiйö лэдзис Павеллы дорйысьны. Павел висьталiс, мый сiйö коркö быдногыс паныд мунiс Исус Кристослы да дзескöдiс Сылы эскысьясöс, но Дамаск туй вылын лоöмтор бöрын бергöдчис Исус Кристослань да кутiс буръюöртны. Кор сiйö висьталiс Кристослöн кулöм да ловзьöм йылысь, Фест гораа шуис: «Тэ дзикöдз йöймöмыд, Павел! Ыджыд тöдöмлуныд вöсна вежöртö воштöмыд». Павел шуис: «Ме эг йöймы, пыдди пуктана Фест. Ме бур мывкыдсянь висьтала збыльсö. Кевма Енлы, мед тэ да ставныс танi менö кывзысьяс лоинныд ме кодьöсь, сöмын тайö чепъястöгыс».
Апостолъяслöн уджъяс 23-26
*а изкар – крепость
482 
