Выбрать язык
Выбрать рассказ Ветхого Завета
Выбрать рассказ Нового Завета
Иисус, Шкенжын ыресшым нумалын, Саҥга манме верыш толын, еврейла тиде верже Голгофа маналтеш. Иисус дене пырля пушташ осалым ыштыше кок еҥымат наҥгаеныт. А кунам Саҥга манме верыш толыныт, тушто Иисусым да осалым ыштыше-влакым ыресеш пудаленыт – иктыжым пурла могыреш, весыжым шола могыреш. Иисус ойлен: «Ачай, титакыштым кудалте, нуно мом ыштат, огыт умыло».
Калык ончен шоген. Вуйлатыше-влакат нунын дене пырля игылт воштылыныт да ойленыт: «Тиде Айдеме молым утарен. Тудо Христос, Юмын Ойырен налмыже гын, тек ынде Шкенжым утара!» Пудален сакыме осал еҥ кокла гыч иктыже Тудым мыскылен ойлен: «Тый Христос улат гын, Шкендым Шке да мемнамат утаре!» А весыже тудым шылтален ойлен: «Тый Юмо деч от лӱд мо? Шкендымат тыгак мутым кучыктат! Мемнам чын судитленыт, ме пашаланна келшышын налынна, а Тудо нимом удам ыштен огыл». Вара Иисуслан каласен: «Господь, шке Кугыжанышкет мийымекет, мыйым шарналте!» Иисус тудлан вашештен: «Тыланет чынак ойлем: тачак Мый денем пырля райыште лият».
Уло мланде мучко пычкемыш лийын. Вара Иисус виян йӱк дене кычкыралын: «Юмем, Юмем! Молан Мыйым коденат?» Воктен шогышо-влак кокла гыч иктыже тунамак куржын миен, губкым налын, уксусеш нӧртен, тоя вуеш керын да Иисуслан йӱаш пуэн. Уксусым подылмеке, Иисус каласен: «Ынде чыла шукталте!» Вара уло йӱкын кычкыралын: «Ачай, Тыйын кидышкет чонем пуэм!» Тунам чонжо лектын. Храмысе пӱрдыш*а кӱшычын ӱлыкӧ кокыте кушкедлен, мланде чытырналтын, кугу кӱ-влак шелалтыныт, шӱгар рож-влак почылтыныт. Колышо шуко святойын капышт ылыжыныт. Шӱдывуй*б да тудын дене пырля Иисусым оролышо-влак пешак лӱдыныт да ойленыт: «Тудо чынжымак Юмын Эрге улмаш».
Иоанн 19:17; Лука 23:32-35,39-43; Матфей 27:45-54; Лука 23:46; Иоанн 19:30
*а Пӱрдыш – завеска.
*б Шӱдывуй – сотник.
112 