Выбрать язык
Выбрать рассказ Ветхого Завета
Выбрать рассказ Нового Завета
Эрдене эрак архиерей ден калык кугурак-влак Иисусым пушташ пуымо нерген каҥашеныт. Вара Тудым пидын наҥгаеныт да Понтий Пилатын, вуйлатышын, кидыш пуэныт. Иисусым пушташ судитлымым пален налмеке, Тудым кучыктен пуышо Иуда чот ӧкынен да архиерей ден калык кугурак-влакын пуымо кумло ший оксаштым мӧҥгеш пӧртылтен.
Пилат нунын деке лектын да йодын: «Тиде Еҥ ваштареш могай титаклымашда уло?» Иисусым титаклаш тӱҥалыныт: «Ме ужынна: тиде Еҥ мемнан калыкым пудырата, кесарьлан йозакым тӱлаш чара, Шкенжым Христос-Кугыжа улам манеш». Пилат мӧҥгеш преторийыш пурен да Иисусым ӱжыктен. Тудо йодын: «Тый иудей-влакын Кугыжашт улат мо?» Иисус каласен: «Мыйын Кугыжанышем тиде тӱня деч огыл. Мыйын Кугыжанышем тиде тӱня деч лиеш ыле гын, иудей-влакын кидышкышт логалмем ваштареш тарзе-влакем Мыйын верч чот шогат ыле». Пилат Тудын деч йодын: «Тугеже Тый Кугыжа улат?» Иисус каласен: «Мый тӱняшке чын нерген таныклаш толынам да тидланак шочынам». Пилат каласен: «Мо тугай чын?» Пилат иудей-влак деке лектын да ойлен: «Мый Тудын нимогай титакшым ом му». Но уло калык кычкыраш тӱҥалын: «Тудлан колымаш!» Сарзе-влак шуанвондо дене вуйшӱдышым тодыныт да Иисусын вуйышкыжо пыштеныт, Тудлан шемалгейошкар вургемым чиктеныт. Нуно кычкыреныт: «Куане, иудей-влакын Кугыжашт!» Шӱргыжым совкаленыт.
Пилат угыч ойлен: «Мый Тудым титаклаш нимогай амалымат ом му». Иудей-влак ойленыт: «Мемнан законна уло, да закон почеш Тудо колышаш, вет Тудо Шкенжым Юмын Эргыжлан шотла». Тидым колмеке, Пилат эшеат чот лӱдын, угыч преторийыш пурен да Иисус деч йодын: «Тый кушеч улат?» Но Иисус нимом вашештен огыл. Тунам Пилат каласен: «Мыланем мо от ойло? Тыйым ыресеш пудалашат, эрыкыш колташат властем улмым от пале мо?» Иисус вашештен: «Кӱшыч ок пуалт ыле гын, Мыйын ӱмбалне тыйын нимогай властет ок лий ыле».
Пилат ужын: нимо ок полшо, а пудыранымаш утыр вияҥеш веле, сандене, вӱдым налын, калык ончылно кидшым мушкын да каласен: «Тиде чын ыштыше Айдемын вӱржылан мый титакан омыл, шке ончыза». Вара Пилат Иисусым сола дене кырыктен, пудален сакаш пуэн.
Матфей 27:1-3; Иоанн 18:29; Лука 23:2; Иоанн 18:33,36-38; Лука 23:18; Иоанн 19:2-4,7-11; Матфей 27:24-26
110 