Выбрать язык
Выбрать рассказ Ветхого Завета
Выбрать рассказ Нового Завета
Моисей шке калыкшым шыгыремдыме деч аралаш тыршен, да тидлан кӧра тудым фараон ужмышудымо лийын. Моисейлан Египет гыч куржаш логалын. Тидын деч вара тудо кужу жап оньыкугызажын вольык кӱтӱжым кӱтен илен.
Икана Моисей кӱтӱжым мӱндыркӧ, ир мландышке, наҥгаен да Хорив манме курык деке миен шуын. Тушто тудлан Юмын Суксыжо*а вондер гыч лекше тулйылме семын кончен. Вондер тул дене авалтын гынат, йӱлен огыл. Тидым ужын, Моисей лишкырак миен. Юмо йӱлышӧ вондер гыч тудлан ойлен: «Моисей! Моисей! Утыждене ит лишем. Йолчиеметым кудаш. Тыйын шогымо верет – святой мланде. Мый ачатын Юмыжо улам, Авраамын, Исаакын да Иаковын Юмышт». Моисей Юмын ӱмбаке ончалаш лӱдын, чурийжым петырен.
Юмо умбакыже тыге ойлен: «Мый Египетыште илыше калыкемын индыралт илымыжым ужым, индырыше-влак ӱмбаке вуйшиймашым кольым. Мый орланымыштым палем. Нуным Египетысе калык кид йымачын утараш тольым, тудо мланде гыч нуным шӧр ден мӱй йогыман сай да кумда мландышке илаш луктам. Тыгеракын, кай: Мый тыйым фараон деке колтем. Израиль калыкемым тый Египет гыч лукшаш улат».
Но Моисей аптыранен, Юмылан каласен: «Фараон деке каяш да Израиль калыкым Египет гыч лукташ мый кӧ улам?» Юмо тудлан каласен: «Тый денет пырля Мый лиям».
Лекмаш (Исход) 2:15 – 3:12
*а Суксо – Юмын уверкондышыжо, Ангел.
40 