Выбрать язык
Выбрать рассказ Ветхого Завета
Выбрать рассказ Нового Завета
Аарон изаж дене пырля Моисей шуко гана фараон деке миен, Израиль калыкым ир мландышке Юмылан кумалаш колташ йодын. Фараон ынеж колто улмаш, садлан Юмо Египет калыклан тӱрлӧ нелылыкым колтен. Пытартышлан фараон Моисей ден Ааронлан каласен: «Теат, чыла Израиль калыкат тарваныза, мыйын калыкем кокла гыч вашкерак кайыза! Йодмыда семын шке Юмыланда вуйдам савыза, кумалза. Шорык ден казадамат, шолдыра вольыкдамат пырля налза. Кайыза, Юмо деч мыланемат порым йодса». Колымаш деч лӱдын, Египет калык нуным шке мландыж гыч вашкерак ужатен колташ тыршен.
Тыгеракын, чылаже кудшӱдӧ тӱжем пӧръеҥ тарванен. Тылеч посна эше ӱдырамаш ден йоча-влак да вес тукым калыкат лийыныт. Чыла вольыкыштымат пырля вӱден наҥгаеныт. Тӱрлӧ вольык шуко лийын. Тыге Израиль калык Египетыште нылшӱдӧ кумло ий илыме деч вара корныш тарванен.
Израиль калыкым Юмо ир мланде гоч Йошкар теҥыз велке наҥгаен. Кушко каяш кӱлмым ончыкташ Юмо кечывалым калык ончылно пыл меҥге семын, йӱдым корным волгалтарыше тул меҥге семын каен. Меҥге шогалмеке, калыкат эре шогалын да канен, а меҥге корныш тарванымеке, калыкат корныжым шуен.
Лекмаш (Исход) гл. 7-13
42 