Выбрать язык
Выбрать рассказ Ветхого Завета
Выбрать рассказ Нового Завета
Израиль калык Юмылан кумалаш да надырым пуаш гына огыл, а Египет гыч йӧршешлан каяш лектын. Фараон тидым пален налын. Кайыше-влакым мӧҥгеш пӧртылташ тудо уло сарзыже-влакым имньыштге, орваштге колтен. Израиль калыкын Йошкар теҥыз сер деке лишеммекыже, фараонын сарзыже-влак нуным поктен шуаш тӱҥалыныт. Поктышо-влак деч куржын утлен кертдымыштым ужын, калык Моисейлан ӧпке мут-влакым ойлаш тӱҥалын.
Тунам Моисей каласен: «Ида лӱд! Тыштак кодса, Юмо тендам таче кузе утара, ончыза. Юмо тендан верч кучедалеш, тыланда лыпланаш веле кӱлеш». Вара Юмо Моисейлан кидшым теҥыз велке шуялташ кӱштен. Моисей шуялтен, да тунамак Юмын колтымо тӱтан мардеж теҥыз вӱдым кокыте шелын, кок могырыш поктен наҥгаен. Теҥызын икмыняр ужашыже кошкен. Тыге Израиль калыклан умбаке каяш теҥыз покшелне корно лийын.
Фараонын сарзыже-влакат, Израиль калыкым поктен, теҥыз покшелсе корныш пуреныт. Эрдене сарзе-влакым кугу лӱдмаш авалтен: нунын орва шӱдырышт гыч тыртыш-влак лектын возыныт. Египет сарзе-влак коклаште кутырымаш тӱҥалын: «Айста Израиль калык деч куржына. Юмо нунын верч Египет ваштареш кучедалеш».
Чыла Израиль калык теҥыз гоч лектын пытымеке, Юмо Моисейлан каласен: «Кидетым теҥыз велке шуялте. Тек теҥыз вӱд фараонын сарзыж-влакым, нунын орваштым да имнешкыштым леведеш». Моисей Юмын кӱштымыжӧ семынак ыштен. Кок могырым пырдыжла шогышо вӱд сарзевлак ӱмбаке шуҥгалтын. Фараонын чыла сарзыже вӱд йымак каен.
Лекмаш (Исход) 14:5-28
44 