Выбрать язык
Выбрать рассказ Ветхого Завета
Выбрать рассказ Нового Завета
Ончыкыжым Израильын чыла огыл кугыжаже Юмын мутшым Давид семын колыштын. Икана Юмо Илия лӱман моткоч чын айдемым Ахав кугыжа деке колтен. Ахав шояк юмо Вааллан кумалаш тӱҥалын улмаш. Илия кугыжа деч калыкым Кармил курыкыш погаш йодын. Погынымекышт, Илия тыге темлен: «Господьым, мемнан Юмынам, Юмылан шотледа гын, Тудлан кумалза, Ваалым шотледа гын, Вааллан кумалза. Мемнан Юмынан пророкшо мый шкетак веле кодынам, а Ваалын ныл шӱдӧ витле пророкшо уло. Мыланна кок ӱшкыжым кондыза. Тек нуно шкаланышт иктыжым ойырен налыт, шылжым ужаш-влаклан руал ойырат, пу ора ӱмбаке пыштат. Тулым ынышт ылыжте. Мыят, вес ӱшкыжым тыгак ямдылен, пу ора ӱмбаке пыштем, а тулым ом чыке. Вара те шкендан юмо лӱмдам ӱжыда, а мый мемнан Юмынам ӱжам. Кудыжо тул ылыжтыме гоч вашмутым пуа, тудыжо – чын Юмо». Чыла калык вашештен: «Тыге лийже!»
Ваалын пророкшо-влак пу ора ӱмбаке ӱшкыжым пыштенытат, кычкыраш тӱҥалыныт: «Ваал! Мыланна вашеште!» Нуно кече мучко утен каен тыге кычкыреныт. Нимогай вашмутат лийын огыл.
Тунам Илия калыкым шке декше лишкырак толаш йодын. Вара, латкок кӱм налын, жертвенникым ыштен. Тушко пум оптен, а пу ӱмбаке Господьлан, чын Юмылан, пуаш ямдылыме ӱшкыжым пыштымеке, чыла ямдылыме ӱмбаке вӱдым опталаш кӱштен. Жертвенник йыр кӱнчымӧ лаке тичак вӱд темын. Илия кумалаш тӱҥалын: «Юмем, вашеште! Тый веле чын Юмо улат манын, тек тиде калык пален налеш!» Тунам Юмо кава гыч тулым колтен, ӱшкыжым, пум да йырваш улшо кӱмат – чыла йӱлалтен. Тидым ужын, чыланат лӱдыныт да ойленыт: «Мемнан Господь Юмына – чын Юмо!»
Кугыжа-влак нерген 3-шо книга (3 Царств) 18:18-39
56 