Выбрать язык
Выбрать рассказ Ветхого Завета
Выбрать рассказ Нового Завета
«Законым але пророк-влакын туныктымыштым кораҥдаш толынам манын ида шоно. Мый кораҥдаш огыл, а шукташ толынам. Тыланда чынак ойлем: чыла тиде шукталтмешке, пылпомыш да мланде пытыме марте, закон гыч ик изи букват, ик удыралтышат ок йом. Тыгеракын, кӧ эн изи ик кӱштымашым пудырта да весымат тыге ышташ туныкта гын, тудо Пылпомыш Кугыжаныште эн изилан шотлалташ тӱҥалеш, а кӧ кӱштымым шукта да тидлан еҥ-влакым туныкта, тудо Пылпомыш Кугыжаныште кугуланшотлалтеш.
Кугезе-влаклан ойлымым те колында: ”Ит пушт”. Кӧ пуштеш, суд ончылно мутым кучышаш. А Мый тыланда ойлем: кӧ шкенжын лишылжылан арам шыдешкен ила, суд ончылно мутым кучышаш, а кӧ лишыл еҥжым нимолан йӧрдымӧ манеш – Синедрион*а ончылно мутым кучаш тӱҥалеш, а кӧ весым ”ораде” манеш, тудо тамык тулыш логалеш.
Кугезе-влаклан мом каласымым те колында: ”Ит яжарлане”. А Мый тыланда ойлем: кӧ ӱдырамаш ӱмбаке сутланен онча, ынде шке шӱм-чоныштыжо тудын дене яжарланен.
Кугезе-влаклан тыге ойлымымат те колында: ”Товатлыметым ит пудырто, Юмо ончылно товатлыметым шуктен шого”. А Мый тыланда ойлем: йӧршын ида товатле. Ида товатле пылпомыш дене: тудо Юмын престолжо. Ида товатле мланде денат: тудо Юмын йолым шындыме верже. Иерусалим дене ида товатле: тудо кугу Кугыжан олаже. Шке вует дене ит товатле: тый ик ӱп пырчымат ошышкат, шемышкат савырен от керт. ”Туге” але ”уке” манын веле каласыза, тылеч утыжо – осал дечын.»
Матфей 5:17-19, 21-22, 27-28, 33-37
«ЕҤ-ВЛАКЫМ
ШКАЛАНДА
МОМ ЫШТЫКТЫНЕДА,
ШКЕЖАТ НУНЫЛАН
ТИДЫМАК ЫШТЫЗА.»
*а Синедрион – иудей-влакын кӱшыл каҥашышт.
82 - 83 