Выбрать язык
Выбрать рассказ Ветхого Завета
Выбрать рассказ Нового Завета
«Мом ойлымым те колында: ”Шинчалан – шинча, пӱйлан – пӱй”. А Мый тыланда ойлем: осалым ыштыше ваштареш ида шогал. Кӧ тыйын пурла шӱргетым сова гын, весыжымат тудлан савырал. Тувыретым шупшын налаш манын, кӧ тый денет судитлалтнеже, тудлан ӱмбал вургеметымат пу. Тый дечет йодшылан пу, кӱсын налаш шонышо деч тупынь ит савырне.
Мом ойлымым те колында: ”Лишылетым йӧрате, тушманетым ужмышудымо лий”. А Мый тыланда ойлем: тушмандам йӧратыза, тендам каргышылан порым тыланыза, тендам ужмышудымо-влаклан порым ыштыза, тендам вурсышо да поктылшо верч кумалза. Тунам те Пылпомышсо Ачадан чын шочшыжо улыда. Осал-влакланат, поро-влакланат Тудо шке кечыжым луктеш, чын ыштышыланат, чын огыл ыштышыланат йӱрым колта. Те шкендам йӧратыше-влакым йӧратеда гын, тидланже тыланда могай суап лиеш? Йозак погышо-влакат тыгак огыт ыште мо?
Шекланыза, йорлылан полшымыда годым калык ончылно, шкендам еҥ-влаклан ончыкташ тӧчен, нимом ида ыште, уке гын, Пылпомышсо Ачада деч суапым огыда нал. А кунам тый йорлылан полшет, пурла кидетын мом ыштымыжым шола кидет ынже пале, тыйын полшымет тек шолып лиеш. Еҥлан койдымым ужшо Ачат тылат шинчаш койшын пӧртылта.
А кумалмет годым сайла кояш тӧчышӧ гай ит лий. Нуно, еҥ ончылно шкеныштым ончыкташ манын, синагоглаште*а да урем луклаште шогал кумалаш йӧратат. Тыланда чынак ойлем: нуно шкеныштын суапыштым ынде налыныт. А тый, кунам кумалат, пӧлемышкет пуро, омсатым петыре, пеленет улшо ужаш лийдыме Ачатлан кумал. Еҥлан койдымым ужшо Ачат тылат шинчаш койшын пӧртылта. Кумалмыда годым Юмым палыдыме еҥ-влак семын утыжым ида ойло. Нуно шомакышт шукылан кӧра юмо колеш шонат. Нунын гай ида лий, вет Ачада тыланда мо кӱлешым йодмыда деч ончычак пала. А те тыге кумалза:
Матфей 5:38-40, 42-46; 6:1, 3-13
Пылпомышто улшо мемнан Ачана!
Тыйын святой лӱмет мокталтше,
Тыйын Кугыжанышет толжо,
Тыйын эрыкет мланде ӱмбалнат
пылпомышсо гаяк лийже.*б
Мемнан илышаш киндым,
тачылыкым, мыланна пу.
Еҥ-шамычын
мыланна ыштыме языкыштым
кудалтымына гаяк
мемнан языкнамат кудалте.
Языкышке*в мемнам ит пурто,
осал дечын мемнам утаре.
Вет Тыйын Кугыжанышет,
куатет, чапет курым-курымеш.
Аминь.»
*а Синагог – иудей-влакын погынымо пӧртышт.
*б Эрык – воля, желание. Лийже – тидым «шукталтше» манынат кусарашлиеш.
*в Языкышке – але ”алгаштарымашке” (”искушенийышке”).
84 - 85 