Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ИОСИЯ ЭКСЭЙЛЭН СӤЗИСЬКОНЭЗ
Иосияез Иудалы эксэе пуктыкузы, солы тямыс арес вал. Иерусалимын со куамын одӥг ар ӵоже эксэй пуконын пукиз. Со Кузё-Инмарлы ярамон ужъёс лэсьтыса улӥз. Давид атаезлэн сюрес кузяз ветлӥз, – бур пала но, паллянэ но ӧз кожылы, вань улон даураз Инмар бордысь ӧз палэнскылы. Дас куать арес тырмем бераз, Иосия Кузё-Инмарез утчаны кутскиз, нош ньыль ар ортчыса, эксэй луонэзлэн дас кыкетӥ араз, со Иудаысь но Иерусалимысь сульдэръёсты, соослы курбон сётон интыосты быдтыны кутскиз. Быдэс Иуда музъемысь вань сульдэръёсты-идолъёсты со куашкатӥз. Эксэйын пуконэзлэн дас тямысэтӥ араз Иосия Кузё-Инмарлэсь корказэ тупатъяны, выльдон борды кутскыны косӥз. Та понна калык трос азвесьсэ сётӥз.
Кузё-Инмарлэн корказ ваем азвесь пӧлысь Хелкия священник Кузё-Инмарлэсь Моисей пыр сётэм Инмар законэн книгазэ шедьтӥз. Священник та книгаез Шафан подъясьлы (писарьлы) сётӥз, нош соиз сое эксэйлы нуиз. Иосия эксэй сое лыдӟыны косӥз. Шедьтэм книгаысь гожтэм кылъёсты лыдӟем беразы, со шимес куалектӥз: со вал Инмарлэн сётэм законысьтыз кылъёс, кудӥз бордысь калык палэнскиз. Иосия сюлмыныз чигиськыса бӧрдыны кутскиз, Кузё-Инмар мед жалялоз вал шуыса куриськиз. Храме лыктыса, со вань калыкез котыраз люказ но Кузё-Инмарлэн коркасьтыз шедьтэм сӥзён книгаысь гожтэмез соослы шара лыдӟыны кутскиз. Отысен со, Кузё-Инмар азьын, выльысен сӥзиськиз – Со сьӧры мыныны но, вань сюлэмзэ поныса, Солэсь сётэм вань курон-косонъёссэ, пуктон-косонъёссэ быдэсъяса улыны. Инмар азьын сӥзиськыса, оскиськымонэсь луыны косыса, вань калыкез кыл сётыны куриз.
Та бере Иосия Израиль музъемысь вань сульдэръёслэсь бервылъёссэс одӥгтэм быдтӥз. Иосия улэп дыръя израиль калык Кузё-Инмар азьын сӥзиськем кылъёссэ быдэсъяса улӥз, Со бордысь соос ӧз палэнскылэ.
2 Паралипоменон 34:1-8, 14-19, 29-33
218 
