Библия
Выбрать язык
Книги Ветхого Завета
Книги Нового Завета
с русским текстом
ВЕЛОТАН ВИСЬТАЛОММЕЗ
Глава 20
Бур велӧтӧ́ммез
1 Вина умӧльтны-серавны ӧзйӧтӧ,
кодззӧта́н юа́н ─ тышкасьӧ́мӧдз вайӧтӧ.
Кин лэдзчисьӧ юны, сія мывкыдтӧм морт.
2 Ӧксулӧн лӧгасьӧ́мыс левлӧн рявзӧ́м кодь,
сійӧ лӧгӧтісь аслыс умӧльсӧ керӧ.
3 Кин оз кутчы видчыны, сійӧ бур мортӧ пуктӧны,
а мывкыдтӧммез ӧтік кылӧн озӧ сетчӧ.
4 Дыш морт кола́н кадӧ оз гӧр,
вунда́н кадӧ кошшӧ, да нем оз адззы.
5 Мортлӧн юрас видзӧ́ммез кыдз пыдын ва,
но вежӧра морт нiйӧ вермӧ гумавны.
6 Унаэз асьнысӧ бур ёрттэзӧн шуӧны,
но кыдз адззыны былись надейнӧй мортӧс?
7 Веськыта олісь умӧльсӧ оз кер,
сылӧн и челядьыс шудаӧсь.
8 Кӧр ӧксу судитiсьлӧн пукала́н вылӧ пуксьӧ,
сэк сія веськыта бӧрйисьӧ,
быдӧс умӧль керӧ́мсӧ адззӧ.
9 Кин вермас висьтавны:
«Ме ассим сьӧлӧмӧс сӧстӧмтi,
ме сайын ӧтік умӧль керӧ́м абу»?
10 Бӧбӧтӧмӧн ӧшлӧ́м да меряйтӧ́м ─
Дӧсвидзись одзын сэрп керӧ́м.
11 Зонкаӧс керӧ́ммес сьӧрті тӧдан,
олӧ я сія сӧстӧма да веськыта.
12 Кыла́н пель да адзза́н син ─
кыкнаннысӧ аркмӧтiс Дӧсвидзись.
13 Радейтан кӧ узьны ─ нянь тортӧг кольччан,
синнэзтӧ он кӧ куньлы ─ няньтӧ пӧттӧдз сёян.
14 Небись шуӧ: «Умӧль, умӧль»,
а сэтiсь кӧр мунӧ, небӧ́мнас ошшасьӧ.
15 Эм зарни, эмӧсь дона иззэз,
но меддонаыс ─ мывкыда баитӧ́м.
16 Тӧдтӧм морт понда кыв сетісьлісь
паськӧмсӧ босьт да видз дынат,
кытчӧдз одзӧссӧ быдсӧн оз вешты.
17 Бӧбӧтӧмӧн судзӧтӧм няньыс чӧскыт,
но бӧрынжык ӧмыт лыа муӧн
*а тырӧ.
18 Мый лӧсьӧтчан керны, одзлань баитчы.
Мывкыда туйдӧтӧ́мсӧ кывзӧ́м бӧрын
верман петны тышкасьны
*б.
19 Кин кывнас ӧтмӧдӧрӧ ӧвтӧ, сія гусяторсӧ
*в осьтӧ.
Кин паськыта ӧмсӧ видзӧ, сыкӧт эн тӧдчы.
20 Ай-мамӧс умӧльтісь мортлӧн биыс
са пемытiнын кусас.
21 Айлӧн пажытись одз корӧм пайыс оз вай бурсӧ.
22 Эн шу: «Лёк керӧ́мыс понда ме вештiся».
Надейтчы Дӧсвидзись вылӧ, и Сія тэнӧ дорьяс.
23 Бӧбӧтӧмӧн ӧшлӧ́мыс
Дӧсвидзись одзын сэрпӧ пырӧ́м.
Бӧбӧтана ӧшліся́ныс
*г ─
Ен одзын умӧль керӧ́м.
24 Мортлісь оськӧввесӧ Дӧсвидзись веськӧтӧ,
кытчӧ колӧ.
Мортыс эд оз вермы тӧдны ассис туйсӧ.
25 Асьтӧ кыйан, тэрмасьӧмӧн кӧ Енлӧ кыв сетан,
а сыбӧрын вӧлись думайтан-жалейтан.
26 Мывкыда ӧксу умӧльсӧ кериссесӧ тӧлӧтас
*д,
варта́н гӧгля́нӧн
*е ны вылӧт мунас.
27 Мортлӧн лолыс ─ Дӧсвидзисьлӧн югдӧта́н,
сьӧлӧм пытшкӧдз быдӧс тӧдмалӧ-видзӧтӧ.
28 Небыт сьӧлӧмыс да быльыс ӧксуӧс видзӧны.
Небыт сьӧлӧмсянь керӧ́мӧн сія юралӧ́мсӧ вынсьӧтӧ.
29 Том зоннэзлӧ вынныс ошкӧ́мсӧ вайӧ,
пӧриссесӧ дзор юрсиныс баситӧ.
30 Вартлӧ́мсянь доймӧ́мыс умӧльсӧ керӧ́мись кидтӧ
*ж,
вартлӧ́мыс мортлісь сьӧлӧмсӧ весӧтӧ.
*а 20:17 лыа му ─ песок
*б 20:18 тышкасьны ─ воевать
*в 20:19 гусятор ─ тайна
*г 20:23 ӧшліся́н ─ весы
*д 20:26 тӧлӧтны ─ провеять
*е 20:26 варта́н гӧгля́н ─ молотильное колесо
*ж 20:30 кидтыны ─ отучать
Глава 20
