Библия
Выбрать язык
Книги Ветхого Завета
Книги Нового Завета
с русским текстом
ВЕЛОТАН ВИСЬТАЛОММЕЗ
Глава 21
Веськыта олісь адззас ола́н
1 Ӧксулӧн сьӧлӧмыс Дӧсвидзись киын
кыдз визывта́н ва,
Сія веськӧтӧ сійӧ, кытчӧ Сылӧ колӧ.
2 Быд морт ассис туйесӧ сӧстӧммезӧн шуӧ,
но Дӧсвидзись мортлісь сьӧлӧмсӧ тӧдмалӧ-видзӧтӧ.
3 Веськыта олӧ́мыс да веськыта судитӧ́мыс
Дӧсвидзисьлӧ езъяла́н
*а вайӧ́мся буржыкӧсь.
4 Асьӧс вылына лэбтӧ́м да вышитчӧ́м ─
умӧль керӧ́ммез,
умӧльсӧ керисьӧс ны сьӧрті тӧдан.
5 Авйӧмӧн бура уджаліссез тырмӧмви шедтӧны
*б,
а тэрмасиссез уна ӧштӧны.
6 Бӧбӧтӧмӧн ӧктӧм пажытьыс
тӧв пӧльыштӧ́м моз ӧшас,
кулӧ́мсӧ сибӧтас.
7 Ентӧг оліссез веськыта озӧ керӧ,
сійӧн лёк керӧ́мныс асланыс юр вылӧ локтас.
8 Лэдзчисьӧм мортлӧн туйес чукыляӧсь,
а сӧстӧм морт веськыта керӧ.
9 Видчись инькӧт керкуын овны абу бур,
буржык овны крыша вылын ӧтнатлӧ.
10 Ентӧг олісь быдӧнныслӧ бы умӧльсӧ керӧ,
сія нельки ассис ёртсӧ оз жалейт.
11 Кӧр вачкан умӧльтісьӧс,
сэк учӧт вежӧраэз вежӧрсялӧны.
Кӧр велӧтан мывкыда мортӧс,
сія унажык пондӧ тӧдны.
12 Веськыта олісь Ентӧг олісьлӧн горт сьӧрын видзӧтӧ
да адззӧ, кыдз Ентӧг олісь вылӧ умӧльыс локтӧ.
13 Умӧля олісьлісь
*в горӧн кеймисьӧ́мсӧ кылікӧ
кин тупкӧ пеллесӧ,
сійӧ асьсӧ озӧ кылӧ, кӧр пондас горӧн кеймисьны.
14 Гусьӧн сетӧм козин лӧгсӧ кусӧтӧ,
пиись кыскӧм сьӧм ─ лёксялӧ́мсӧ.
15 Веськыта судитӧ́мсянь веськыта олісь гажмӧ,
лёк керись ─ полӧ.
16 Кин вежӧра туй вывсис кежӧ,
сія кулӧммез дынӧ сюрӧ.
17 Гажӧтчыны радейтiсь гортсӧ куштӧ,
Вина юись да чӧскыта сёйись пажытьсӧ оз ӧкты.
18 Веськыта олісьӧс мездӧ́м понда
вузаласӧ умӧльсӧ керисьӧс,
веськыта керисьӧс мездӧ́м понда ─ бӧбӧтчисьӧс.
19 Видчись да лӧг инькӧт олӧ́мся
буржык овны овтӧминын.
20 Мывкыда мортлӧн керкуас уна дона пажыть да сёя́н,
а вежӧрттӧм морт быдӧс видзыштӧ.
21 Кин вынсьӧтчӧ овны веськыта да небыт сьӧлӧмӧн,
сылӧн лоас кузь ола́н,
сылӧ пондасӧ веськыта керны да бур мортӧ пуктасӧ.
22 Мывкыда морт вынаэзлісь карсӧ босьтӧ,
жугдӧ из йӧрсӧ, кӧда вылӧ нiя надейтчисӧ.
23 Кин ӧмсӧ оз паськӧтлы,
кывсӧ пиннез сайын видзӧ,
сія асьсӧ умӧлись видзӧ.
24 Вышитчись мортсӧ умӧльтiсьӧн шуӧны,
асьсӧ ӧддьӧн лэбтӧ́мсянь эд сія вышитчӧ.
25 Дышӧтчись морт кулӧ́мсӧ ачыс сибӧтӧ.
Сылӧ эд уна мый колӧ,
а уджавны сія и чуньӧн оз вӧрзьӧт.
26 Быд лун дышӧтчисьлӧ колӧ бы унажык,
а веськыта олісь кокнита сеталӧ.
27 Умӧльсӧ кериссезлӧн вайӧм езъяла́нныс сэрпӧсь.
Сія ӧддьӧнжык сэрпӧсь,
вайӧны кӧ сійӧ ылӧтӧ́м могись.
28 Морт вылӧ вӧвлытӧмсӧ висьтавлісь ола́нсӧ ӧштас,
а тӧдӧмӧн висьтасисьсӧ пыр пондасӧ кывзыны.
29 Ентӧг олісь синнэсӧ барӧтас да кутчисьӧ пинясьны,
а веськыта олісь ассис туйесӧ бура видзӧтӧ.
30 Дӧсвидзись одзын мортлӧн мывкыдыс, вежӧрыс
да туйдӧтӧ́мыс ─ абутӧм туйӧ.
31 Тышкасьӧ́м кежӧ вӧвсӧ одзлань лӧсьӧтӧны,
а вермӧ́мыс
*г ─ Дӧсвидзисьсянь.
*а 21:3 езъяла́н ─ жертва
*б 21:5 шедтыны ─ заработать, добывать
*в 21:13 умӧля олісь ─ бедный
*г 21:31 вермӧ́м ─ победа
Глава 21
