Библия
Выбрать язык
Книги Ветхого Завета
Книги Нового Завета
с русским текстом
ВЕЛОТАН ВИСЬТАЛОММЕЗ
Глава 22
Умӧля олісьсӧ Дӧсвидзись дорйӧ
1 Бур нимыс буржык дона пажыться,
бур мортӧ пуктӧ́мыс буржык эзы́сься да зарнися.
2 Уна пажытя и пажытьтӧм мортлӧн то мый ӧткодьыс:
нiйӧ кыкнаннысӧ аркмӧтiс Дӧсвидзись.
3 Сьӧкыт кадӧ бур вежӧра морт
казялӧ умӧль петӧ́мсӧ да сайӧвтчӧ.
А учӧт вежӧра морт
мунӧ одзлань да умӧляс сюрӧ.
4 Раммӧ́м бӧрын лоӧ Дӧсвидзисись полӧ́м,
а сэсся локтӧ дона пажыть, бурӧ пуктӧ́м и кузь ола́н.
5 Умӧльсӧ керисьлӧн туй вылас
жельнӧггез да кыйся́ннэз.
Тэныт дона кӧ ола́ныт, сійӧ туйсӧ орддьы.
6 Зонтӧ учӧтсянь бур туй вылӧ петкӧт,
сія и пӧрисьувьяс сэтiсь оз кеж.
7 Уна пажытя морт умӧля олісь мортӧн веськӧтлӧ.
Одзӧсалісь одзӧсӧн сеталісьлӧ рабӧн лоӧ.
8 Лёк керӧ́мсӧ кӧдзись вылӧ умӧльыс локтас,
сія оз ни понды ыждавны-дзескӧтлыны.
[Кокнит сьӧлӧмсянь отсӧт сетісьсӧ Еныс радейтӧ,
и мый сылӧ оз тырмы, содтӧ.]
9 Небыт сьӧлӧма морт лоас бласлӧви́тӧм,
сія эд тшыгьялісьлӧ ассис няньсӧ сетӧ.
[Козиннэз сеталісьлӧ вермӧ́м-ошкӧ́м локтӧ,
сія козин босьтісьсӧ ас дор керӧ.]
10 Умӧльтісьсӧ вашӧт, сэк лӧгалӧ́мыс чулалас,
етшасьӧ́мыс да видчӧ́мыс озӧ пондӧ лэбтісьны.
11 Кин сӧстӧм сьӧлӧмӧн овны радейтӧ,
сылӧн баитӧ́мыс сьӧлӧм бурмӧтӧ,
и ӧксу сыкӧт ёртасьӧ.
12 Дӧсвидзись быльсӧ видзӧ,
а ылӧтлісьлісь висьталӧ́мсӧ абутӧм туйӧ пуктӧ.
13 Дыш морт шуӧ:
«Ӧтӧрас лев! Отаинын
*а менӧ виясӧ!»
14 Ветлӧтiсь инькалӧн баитӧ́мыс ─ пыдӧстӧмин,
Дӧсвидзисьсӧ лӧгӧтісь сэтчӧ усяс.
15 Зонка юрас пыртiс мывкыдтӧг олӧ́мсӧ,
но шатьӧн велӧтӧ́мыс сійӧ веськӧтас.
16 Кин дзескӧтлӧ умӧля олісьсӧ,
медбы сылісь мыйкӧ босьтны
да сетны бура олісьлӧ,
сія ачыс уна ӧштас.
Мывкыда отирлӧн кыввез
17 Лӧсьӧт пельтӧ да кывзы мывкыда отирлісь баитӧ́мсӧ,
менчим велӧтӧ́мӧс сьӧлӧмат тэч.
18 Пондан кӧ овны менам велӧтӧ́м сьӧрті
да мывкыда кыввезӧн баитны,
сэк сьӧлӧм вылат лоас долыт.
19 Ме талун тэнӧ велӧта,
медбы тэ надейтчин Дӧсвидзись вылӧ.
20 Тэнӧ велӧтны да туйдӧтны
ме куимдас висьталӧ́м ни гижи,
21 медбы тэ тӧдiн быльсӧ
да вӧлі мый висьтавны тэнӧ ыстiссезлӧ.
22 Умӧля олісьлісь эн мырддьы,
сылӧн и сідз нем абу.
Пажытьтӧм мортсӧ суд вылын эн дзескӧт,
23 Дӧсвидзисьыс эд сувтас сы дор,
сійӧ дзескӧтісьлісь ловсӧ босьтас.
24 Эн ёртась лӧгасись морткӧт,
эн вовлісь морткӧт,
кӧда ӧтік кылӧн оз сетчы,
25 медбы тэ эн велав ны моз овны
да ассит ола́нтӧ эн сюйышт кыйся́нӧ.
26 Эн кер ны моз, кӧдна кыв сетӧны
мӧдіклісь одзӧссӧ вештыны.
27 Он кӧ вермы вештiсьны,
нельки ольпасьтӧ увтсит нуӧтасӧ.
Мыйлӧ тэныт асьтӧ сэтчӧдз вайӧтны?
28 Межатӧ, кӧдӧ кӧркӧ му вылат керисӧ айет,
мӧдіклӧн му вылӧ эн вешты.
29 Адззылін мортӧс, кӧдалӧн кисис быдӧс петӧ?
Сія пондас кысъявны дзир ӧксулӧ,
оз учӧтӧ пуктӧм мортлӧ.
*а 22:13 отаин ─ площадь
Глава 22
