Библия
Выбрать язык
Книги Ветхого Завета
Книги Нового Завета
с русским текстом
ВЕЛОТАН ВИСЬТАЛОММЕЗ
Глава 25
Соломонлӧн мӧдік велӧта́н висьталӧ́ммез
1 И этна велӧта́н висьталӧ́ммес Соломонлӧн. Нiйӧ ӧтлаӧ ӧктісӧ Иудеяись Езекия ӧксулӧн отир.
2 Ошкӧ́м Енлӧ! Сылӧн керӧ́ммес тӧдтӧмӧсь.
Ошкӧ́м ӧксулӧ! Сія тӧдтӧм керӧ́мсӧ тӧдмалӧ.
3 Мый вылына енӧжыс, мый пыдына муыс
да мый ӧксулӧн сьӧлӧм вылас, он вермы тӧдны.
4 Эзы́сьтӧ
*а быд сорласьӧ́мись сӧстӧмт,
сэк позяс керны бур доз.
5 Ӧксу дынiсь дзимляв умӧльӧ керисьсӧ,
сэк сылӧн юралӧ́мыс веськыта керӧ́мнас вынсялас.
6 Ӧксу одзын асьтӧ эн лэбты,
ыджыт отир коласӧ эн пуксьы.
7 Тэнӧ вермасӧ пуксьӧтны бӧрас.
Буржык эд, кӧр тэныт шуасӧ:
«Пуксьы татчӧ матӧжык».
Мый аслат синнэзӧн адззылін,
8 сы понда эн тэрмась судитчыны.
Мый пондан керны суд бӧрас,
кӧр тэнӧ рожа куля́нӧдз вайӧтас мортыс,
кӧдакӧт судитчин.
9 Колӧ кӧ, ас коласаныт бӧрйисьӧ,
а мӧдыслісь гусяторсӧ
*б эн осьт.
10 Осьтан кӧ, сійӧ кылі́сь тэнӧ ӧмалас,
и тэнӧ умӧльтӧ́мыс бердсит кальк оз кер.
[Радейтӧ́м да ёртасьӧ́м мездӧны:
видз нiйӧ, медбы тэнӧ эзӧ умӧльтӧ.
Сэк ассит ола́н туйтӧ видзан
да пондан лӧня овны.]
11 Аскадӧ висьталӧм кылыс
кыдз эзы́сь дозын зарни яблок.
12 Бура кывзiсьлӧ мывкыда мортлӧн ӧлӧ́мыс
сӧстӧм зарниись керӧм пелькытш кодь.
13 Кыдз кӧдзыт ва ─ нянь вундiсьлӧ,
сідз ыстiсьлӧ ─ надейнӧй кысъялісь,
сія эд ассис кӧзяинсӧ вынсьӧтӧ.
14 Кин ошшасьӧ козиннэзӧн, но нем оз козьнав,
сія зэртӧм кымӧр да тӧвныр кодь.
15 Юралісьлісь сьӧлӧмсӧ небзьӧтан рама баитӧмӧн,
небыт кылыт нельки лы чегӧтӧ.
16 Адззин кӧ ма ─ сёй мымда колӧ,
но вытьтӧ
*в тӧд, ӧстӧдз эн сёй.
17 Ёртыт ордӧ орӧттӧг эн пыр,
сылісь мыласӧ эн бырӧт,
а то син вылӧ он понды ковны.
18 Кин матiсь вылӧ вӧвлытӧмсӧ висьтавлӧ,
сія кыдз кианка
*г, шыпурт, лэчыт йыла ньӧвьёсь.
19 Кыдз чегӧм пинись да коктӧмалӧ́мись абу бурыс,
сідз и мортiсь, кӧда вылӧ сьӧкыт кадӧ абу надеяыс.
20 Тӧждiсись мортлӧ сьылӧ́мыс
кыдз кӧдзытiнын чӧвтӧм паськӧм
да дойдӧ́м вылӧ кисьтӧм чизыр шӧм.
[Кыдз кӧр
*д сёйӧ паськӧм, гаг ─ пусӧ,
сідз тӧждісьӧ́м сёйӧ мортлісь сьӧлӧм.]
21 Тэныт умӧльсӧ керись тшыгьялӧ кӧ, сійӧ верд,
горшыс косьмӧ кӧ, сійӧ юктав.
22 Сідз керӧ́мнат тэ сы юр вылӧ сотча́н шоммез
*е ӧктан.
Сiдз керӧ́м понда Дӧсвидзисьыс тэныт бурнас вештас.
23 Ой тӧлыс вайӧ зэр,
а гусьӧн шушкӧ́мыс ─ лӧг чужӧ́ммез.
24 Видчись инькӧт керкуын овны абу бур,
буржык овны крыша вылын ӧтнатлӧ.
25 Ылын муись бур юӧрыс ─
горш косьмӧ́м коста кӧдзыт ва кодь.
26 Веськыта олісь керӧ кӧ сідз,
кыдз колӧ умӧльсӧ керисьлӧ,
сэк сія кыдз гудыра ва петанiн,
тшыксьӧм ваа юкмӧс.
27 Абу бурыс уна ма сёйӧ́мись,
абу бурыс ошкӧ́мсӧ кошшӧ́мись.
28 Кӧда асьсӧ оз вермы киын видзны,
сія киссьӧм йӧра разьӧм кар кодь.
*а 25:4 эзы́сь ─ серебро
*б 25:9 гусятор ─ тайна
*в 25:16 выть ─ количество пищи, потребное для насыщения, норма еды
*г 25:18 кианка ─ деревянный молоток
*д 25:20 кӧр ─ моль
*е 25:22 кинкӧ юр вылӧ ӧктыны сотча́н шоммез ─ пристыдить кого-либо
Глава 25
