Bible Stories
Выбрать язык
Choose Old Testament Story
Choose New Testament Story
ГЕДЕОН
Навин Иисус кулэм бере, сульдэръёслы-идолъёслы йыбыртъяса улэменыз, калык ялан Кузё-Инмарлэсь вожзэ поттылӥз. Со понна Кузё-Инмар израиль калыкез вӧсь кариз – соосты мадиан калык киултӥз. Секыт вал мадиан калыклэн зӥбет улаз улон. Сизьым ар ортчыса, израиль калык Аслаз Кузё-Инмарезлы вазиськиз. Соослэсь тэльмыремзэс Инмар кылӥз но соослы азьветлӥсе Гедеонэз сётӥз.
Гедеон ассэ ляб мурт шуэ вал, но Инмар солы шуиз: «Мон тонэн огазьын луо, вань мадиан калыкез одӥг муртэ кадь тон вормод». Но ож кутскемлэсь азьло Гедеон Инмарлэсь куриз, Со солы тодмет мед сётоз, зэмзэ ик Со Гедеонэз израиль калыкез утён понна быръем ке. Солэн куремезъя, Кузё-Инмар солы паймымон тодмет возьматӥз: Гедеонлэн итыме вӧлдэм ыжгонэз котмиз, нош котырысьтыз музъем кӧс кылиз; вуонояз уе мукет сямен луиз: ыжгон котырысь музъем котмемын вал, нош ыжгон чылкак кӧс кылиз.
Гедеон ожгарчиосыныз ӵош вуонояз нуналэ мадианъёслы ваче пумитэ султэм бере, Кузё-Инмар солы шуиз: «Тон вӧзын укыр трос калык. Израиль вылтӥяськыны медаз кутскы шуыса, мадианъёсыз вормыны кужым соослы сётыны уг быгатӥськы, уго соку соос шуысалзы: “Соосты ми асьмеос вормимы“. Соин ик калыклы шу: “Кин кышка, куалекъя, берлань чигналэ“». Гедеон озьы ик лэсьтӥз: кызь кык сюрсэз кошкизы, нош дас сюрсэз кылиз. «Калыкты укыр трос на, вае соосты ву дуре, учкомы кызьы соос ву юо» – шуиз Кузё-Инмар. Тросэз пыдесъяськыса шурысь вуэз юизы, куинь сю мурт гинэ кырыменызы омыръяса юизы. Инмар Гедеонлы шуиз: «Таосыз, кырымысьтызы юисьёс, тӥледыз утёзы – мадианъёсты вормыны тӥледлы кужым сёто».
Озьы ик пӧрмиз. Кузё-Инмар туж паймымон уж лэсьтӥз: куинь сю израиль пиос мадианъёслэсь, амаликъёслэсь ожгарчиоссэс вормизы, нош соос трос, саранча мында вал.
Судьяослэн книгазы, 6-тӥ – 7-тӥ люкетъёс
138 
