Bible Stories
Выбрать язык
Choose Old Testament Story
Choose New Testament Story
ЭКСЭЙЛЫКЛЭН ЛЮКИСЬКОНЭЗ
Данлыко Израиль кун 120 ар гинэ улӥз: соин быдэн 40 ар кивалтӥзы Саул, Давид но Соломон. Соломон кулэм бере, эксэйлык Израиль но Иуда кунъёслы люкиськиз. Со тазьы вал: вань израиль калык Соломонлэсь Ровоам пизэ эксэе пуктыны Сихеме люкаськиз. Люкаськем калык Ровоамлы шуиз: «Атаед ми вылэ чидантэм секыт ужъёсты куштӥз, нош тон со секыт зӥбетэз ми вылысь кушты, соку ми тыныд ужаломы-тыршомы». Ровоам, атаез улэп дыръя, эксэй юртын ужаса улэм пересь визьнодчиосын кенешиз, нош соос солы шуизы: «Туннэ та калыклы тон медо луид ке, куронъёссэс быдэстыса соослы ӟеч лэсьтыны тыршид ке, соосын лякыт вераськид ке, соку соос пырак ӵоже тынад ляльчиосыд луозы». Нош Ровоам пересь визьнодчиослэсь верамзэс санэ ӧз поны, асэныз ӵош будэм пинал калыклэсь верамзэ санэ понӥз. Соос солы туж урод кенеш сётӥзы: «Та калыклы шу: атае тӥледыз секыт зӥбетэн курадӟытыса возиз ке, нош табере мон тӥлесьтыд зӥбеттэс эшшо кужмоято; атае тӥледыз сюлоен вӧсь карылӥз, нош мон тӥледыз скорпионъёсын вӧсь каро».
Кызьы асьмеос тодӥськомы, Израиль пӧрмемын 12 выжылэсь – Иаковлэн 12 пиосызлэсь. Выль эксэйзылэсь, Ровоамлэсь, кылъёссэ кылэм беразы, дас выжыос солы пумит султӥзы но Ровоамлэсь тушмонзэ, Иеровоамез, асьсэлы эксэе бырйизы. Священной Гожтэмын выль кылдэм кун Израиль эксэйлык шуыса нимаське. Асьмеос сое Уйпал эксэйлык шуыса но нимаськомы, уго со интыяськемын Израильлэн уйпалаз. Израиль эксэйлык 200 ар ӵоже улӥз, нош асьме вапумлэсь 721 ар азьло сое Ассириялэн Салманассар эксэез куашкатӥз.
Ровоам борды кылизы Иуда выжы но Вениамин выжылэн ог люкетэз. Та эксэйлыкез Иуда кун, огшоры кылын вераса, Иуда шуизы. Со Израильлэн лымшор люкетаз интыяськемын вал бере, асьмеос сое Лымшор эксэйлык шуиськомы. Солэн шоркарез Иерусалим луиз. Иуда кун улӥз 350 ар ӵоже, нош асьме вапумлэсь азьло, 586 арын, Вавилон эксэй сое куашкатӥз.
3 Эксэйлык, 12-тӥ люкет
186 
