Bible Stories
Выбрать язык
Choose Old Testament Story
Choose New Testament Story
ИАКОВЛЭН УЙВӦТЭЗ
Ревекка кылӥз, Исав солэсь яратоно пизэ Иаковез виыны дасяське шуыса. Та сярысь со Иаковлы вераз, солы со ӵектӥз Месопотамие Лаван братэз доры пегӟыны но, Исавлэн йыркурез кысытозь, отын улыны.
Иаковлэн кошкон азяз, Исаак сое дораз ӧтиз но, али улон Ханаан музъемысь кышно басьтыны ӧз косы, ӵужмуртъёсыз дорысь, Месопотамиысь, кышно басьтыны косӥз. Собере Исаак бакель карыса шуиз: «Дунне Кутӥсь Инмар тонэ бакель мед кароз... Со тыныд но, тынад выжы-кумыосыдлы но Авраамлэсь бакель каронзэ мед сётоз, Авраамлы Инмарлэсь сётэм музъемзэ басьтыны мед быгатод». Соку Иаков Месопотамие мыныны потӥз.
Трос нуналъёс ӵоже со сюрес вылын вал. Одӥгаз уе со бусы шоры йыр улаз из поныса кӧлыны выдӥз. Отысен солы Инмар паймымон уйвӧт возьматӥз: Иаков уйвӧтаз адӟиз инме вуись тубатэз, Инмарлэн кылчинъёсыз (ангелъёс) со кузя тубазы, васьказы. Собере Кузё-Инмар солы вазиськыса шуиз: «Мон – Кузё-Инмар, Авраамлэн, тынад атаедлэн Инмарез, Исааклэн Инмарез. Та музъемез, кудӥз вылын али тон кыллиськод, Мон тыныд, тынад выжы-кумыосыдлы сёто. Мон тонэн огазьын луо, котькытчы ке но тон мынӥд, Мон тонэ утё».
Сайкам бераз, Иаков шуиз: «Зэм ик, Кузё-Инмар татын, нош мон уг тодӥськы вал!» Собере йыр улысьтыз изэз басьтӥз но, соин мар луэмез буре ваён понна, со изэз синпель карыса пуктӥз. Соку со Кузё-Инмарлы кыл сётыса шуиз: «Инмар монэн огазьын луиз ке, мыноно сюрес вылам Со монэ утиз ке, сиыны нянь сётӥз ке, дӥсяны дӥськут сётӥз ке, ӟечкын атай юртам берытски ке, Кузё-Инмар мынам Инмаре луиз ке, соку монэн мар луэмез тодытон понна синпельлы пуктэм из, Инмарлэн коркаез луоз; Инмаре, мае Тон мыным сётод-кузьмалод, солэсь дасэтӥ люкетсэ мон Тыныд сёто».
Улон-вылон 27:41-46; 28:1-22
52 
