Выбрать язык
Книги Ветхого Завета
Книги Нового Завета
с русским текстом
1Иля капша келеть тевс нолдтнеме,
седеетькак кадык а капши
Пазонть икеле валонь мереме.
Эдь Пазось менельсэ,
тон вана модалангсо.
Секс валот улест аламо, онкстазь.
2Эдь кода ламо мелявкстнэде эрсить талновтыця онтнэ,
истя ламо валонь ёвтамсто тееви чаволанть кортамозояк.
3Зярдо Пазонтень максат алтамо –
капшак сонзэ топавтомс.
Эдь Пазось а вечки чаволат:
секс мезе алтыть – топавтык.
4Алтамонь а максомась седе паро
алтамонь максомадонть ды сонзэ а топавтомадонть.
5Иля максо келеть туртов совавтомс тонь пежетьс.
Лиякс теть сави мейле кортамс [Пазонь] озатянть*а икеле:
«Те ульнесь ильведевкс!».
Мезекс тонеть кежиявтнемс Пазонть эсеть кортамотнесэ?
Лиякс Сон калавтсы тонь кедтнесэ теезенть.
6Алкукс, ламо онтнэсэ, кода ламо валтнэсэяк,
ламо мезе тунь смусттеме.
А вана тон пельть Паздонть!
7Неиндерят масторонь кодамояк ёнкссо кажовонь лепштямо-нарьгамо, видестэ судямонь ды видечинь коламо, – иля дивсе тенень.
Эдь вере аштицянть мельга ваны седе покш прявт,
сынст кавонест велькссэ улить седеяк покшт.
8Ялатеке масторонть туртов весеме ёндо лезэв
модадонзо мелявтыця инязорось.*б
9Кие вечки ярмакт, се ярмактнеде а пештяви.
Ды кие вечки сюпавчи, се зярдояк сюпавокс прянзо а марясы.
Теяк – смусттеме!
10Ламолгады ули-парось, – ламолгадыть ярсыцятнеяк.
Кодамо лезэсь азоронстэнь тень эйстэ? –
Ансяк бути ваномс ули-паронзо лангс?
11Важось ламо-аламо сэвсь – тантейстэ уды.
Сюпавонтень пешксе пекесь а максы матедевемс.
12Ули покштояк покш кажо, конань мон неия чипаенть ало: таштазь сюпавчись канды азоронстэнь зыян.13Те сюпавчись ёмси тевензэ амолемадо. Ды зярдо чачи цёразо, тетянстэнь а мезе максомс тензэ.14Кода сон лиссь аванзо потсто штапо, истя туияк. Мезеяк а саи мартонзо важодевксэнзэ эйстэ, туи чавонь кедть.15Теяк покштояк покш кажо: кодамокс сон сась, истямокс туияк. Сестэ ломанентень кодамо лезэ ули важодеманзо эйстэ? Те весе – варма мельга нолдамо.16А эдь сон эрямонь весе чинзэ ютавты чоподасо, янксемасо-мельсапаросо, пиштезь-майсезь ды кежсэ лаказь.
17Ансяк оно мезе мон оштё чарькодинь: ломанентень сехте паро ды ладиця ярсамс, симемс ды аштемс мельспаросо эсензэ важодевкстнэнь эйстэ чипаенть ало эрямонзо аламо читнень перть, зяро онкстась тензэ Пазось. Эдь те сонзэ уцясказо-таликазо.18Теяк Пазонь казне ломанентень, максындеряй Сон тензэ сюпавчи, ули-паро ды оштё мери нолдтнемс сынст тевс, саемс эйстэст эсензэ таликанзо ды кеняркшномс-эрьгелемс важодевкстэнзэ.19Виде, ломанесь мельсэнзэ кувать а кирди эрямонь чинзэ, зярдо Пазось кази кеняркс сонзэ седеентень.
*а 5.5 озатянть – Синод. ютавтовкссонть: Ангелэнть. Те валонть смустезэ евр. кельсэ "кулянь кандыця".
*б 5.8 Эли: Эрьвась саи лезэ моданть пельде, мик инязоронтькак паксясь анды.
Глава 5