Выбрать язык
Книги Ветхого Завета
Книги Нового Завета
с русским текстом1 Господь [Юмо] Нойлан каласен: «Уло ешет дене пырля ковчегыш шич, вет Мый тиде тукым коклаште тыйын чын ыштен илыметым ужынам.2 Ару вольык*а гыч кажныштым шым мужыр дене, узо ден авам, ковчегышкет нал, а ару огыл вольык-янлык гыч кажныжым ик мужыр дене, узо ден авам, нал.3 Урлыкыштым пӱтынь мландылан арален кодаш манын, тыгак кавасе [ару] кайык кокла гыч кажныштым шым мужыр дене, узо ден авам, [да кавасе ару огыл кайык кокла гыч кажныштым ик мужыр дене, узо ден авам,] нал.4 Шым кече гыч Мый мландымбаке йӱрым колтем. Йӱр нылле кече да нылле йӱд йӱраш тӱҥалеш. Мом Мый ыштенам, мландымбачын чыла ӱштыл шуэм».5 Господь [Юмо] мом кӱштен, Ной чыла шуктен.
6 Мланде ӱмбалне вӱд ташлаш тӱҥалме годым Нойлан кудшӱдӧ ий лийын.7 Ной шкеже, тудын дене пырля эргыже-влак, ватыже да шешкыже-влак вӱд ташлымаш деч ковчегыш пуреныт.8 [Кавасе ару кайык гыч, ару огыл кайык гыч,] ару вольык да ару огыл вольык гыч, [янлык гыч,] мландымбалысе чыла тыгыде чонан-влак гыч,9 кажныже мужыр дене, узо да ава, [Господь] Юмын Нойлан кӱштымӧ семынак, Ной деке ковчегыш пуреныт.10 Шым кече гыч мландымбалне вӱд ташлымаш тӱҥалын.
11 Нойын кудшӱдӧ ийыш тошкалмекше, кокымшо тылзын латшымше [27] кечынже пундашдыме келгытын вӱдшинчаже-влак почылт каеныт, кавасе окна-влак почылтыныт,12 да нылле кече да нылле йӱд мланде ӱмбаке чарныде йӱр оптен.13 Тиде кечынак Ной, тудын эргыже-влак Сим, Хам да Иафет, Нойын ватыже да кум шешкышт ковчегыш шинчыныт.14 Нуно да нунын дене пырля чыла [мландымбалысе] янлык, чыла вольык, мландымбалне коштшо чыла тыгыде чонан, чыла чоҥештылше, чыла тӱрлӧ кайык, чыла шулдыран-влак, кажныже шке урлыкышт дене –15 чыланат, кудыштын илыш шӱлыш уло – Ной деке ковчегышке мужырын-мужырын [узо ден ава] пуреныт.16 [Господь] Юмын кӱштымыж семынак, кажне урлык деч узо ден ава [Ной деке ковчегыш] пуреныт. Ной пурымеке, Господь [Юмо] ковчег омсам петырен.
17 Вӱд ташлымаш мландымбалне нылле кече [да нылле йӱд] шуйнен, вӱд эре кӱзен да кӱзен, ковчегым нӧлтен. Тыге ковчег мланде деч кӱшкӧ нӧлталалтын.18 Вӱд эре ташлен да ташлен, мланде мучко чот шарлен, а ковчег вӱд ӱмбалне ийын коштын.19 Мландымбалне вӱд моткоч кугун ташлен, пӱтынь кава йымалысе кӱкшӧ курык-влак чыланат вӱд йымалан кодыныт.20 Вӱд нунын деч эше латвич кынергутлан нӧлталтын, да [чыла кӱкшӧ] курык вӱд йымалан йомын.21 Мландымбалысе чыла чонан – кайыкат, вольыкат, янлыкат, тыгыде чонан-влакат, айдемат – вӱд йымалан коленыт.22 Мланде ӱмбалне чыла илыше, кудын неррожыштыжо илыш шӱлыш лийын, – колен.23 Мландымбалне могай илыше лийын, чылажат пытен – айдеме гыч тӱҥалын, тӱрлӧ вольык, тыгыде чонан да кавасе кайык марте чыланат пытеныт. Лач Ной да тудын пелен ковчегыште улшо-влак гына кодыныт.
24 Мландымбалне вӱд ташлымаш шӱдӧ витле кече шуйнен.
*а 7:2 Ару вольык – кочкаш да надыр шотеш пуаш йӧрышӧ.
Глава 7