Выбрать язык
Книги Ветхого Завета
Книги Нового Завета
с русским текстом1 Юмо Ной нерген да ковчегыште тудын дене пырля улшо чыла янлык, вольык, [кайык, тыгыде чонан] нерген шарналтен. Мланде ӱмбаке Тудо мардежым колтен, да вӱд пучаш тӱҥалын.2 Пундашдыме келгытын вӱдшинчашт да кавасе окна-влак петырненыт, да кава гыч йӱр йӱрмым чарнен.3 Вӱд мландымбач эркын чакнен. Шӱдӧ витле кече эртымеке, вӱд пучаш тӱҥалын.4 Шымше тылзын латшымше кечын ковчег Арарат курыкеш шогалын.5 Вӱд эркын-эркын луымшо тылзе марте пучен, луымшо тылзын икымше кечынже курык вуй-влак койылалтыныт.
6 Нылле кече эртымеке, Ной ковчегыште шке ыштыме окнажым почын7 да [мландымбалне вӱд пучымо нерген пален налаш манын,] курныжым луктын колтен. Тудыжо чоҥештен лектын да мланде кошкымешке мӧҥгеш-оньыш чоҥештыл коштын.8 Вара Ной, мландымбалне вӱд пучымо нерген пален налаш манын, кӧгӧрченым луктын колтен.9 Кӧгӧрчен шинчашыже верым муын огылат, мӧҥгеш тудын деке ковчегыш чоҥештен толын: вӱд мландымбалне эше чыла вере лийын. Ной кидшым шуялтен да кӧгӧрченым шкеж деке ковчегыш пуртен.10 Эше шым кечым вучымеке, кӧгӧрченым ковчег гыч уэш луктын колтен.11 Кӧгӧрчен тудын деке кас велеш пӧртылын, умшаштыже олив пушеҥгын нӧргӧ лышташыже лийын. Тыге Ной мландымбалне вӱд шагалеммым пален налын.12 Ной эше шым кечым вучен да адакат кӧгӧрченым луктын колтен, тудыжо тетла тудын деке пӧртылын огыл.
13 Нойын кудшӱдӧ икымше ийыш тошкалме ийын икымше тылзын икымше кечынже мландымбалне вӱд пучен. Ной ковчег леведышым почын ончалын да ужын: мландымбал кошкен.14 Кокымшо тылзын коло шымше кечыжлан мланде йӧршеш кошкен.
15 [Господь] Юмо Нойлан каласен:16 «Ынде ковчег гыч лек, тый денет пырля ватет, эргыч-влак, эргыч-влакын ватышт лектышт.17 Ковчег гыч пеленет улшо чыла чонаным лук: кайыкым, вольыкым, мландымбалне коштшо чыла тыгыде чонаным. Тек мланде нунын дене темеш, тек нуно тӱлаҥыт да мландымбалне шукемыт».18 Ной да тудын эргыже-влак, ватыже да эргыже-влакын ватышт ковчег гыч лектыныт.19 Тыгак ковчег гыч чыла янлык, [вольык,] тыгыде чонан, кайык – мландымбалне мо тарванылше уло – кажнышт шке урлыкышт шот дене лектыныт.
20 Ной Господьлан жертвенникым ямдылен. Чыла ару вольык кокла гыч, чыла ару кайык кокла гыч икмыняржым ойырен налын да нуным жертвенникеш йӱлалтен пуымо надырлан конден.21 Тамле пуш Господьын нерӱпшыж деке шуын, да Тудо шке шӱмыштыжӧ шоналтен: «Айдеме верч тетла мландым ом карге, вет айдемын шӱм ӱжмашыже – самырык годсекак осал. Илышым кызытсе семын тетла ом пытаре.22 Мланде улмо жапыште ӱдымаш да тӱредмаш, йӱштӧ да шокшо, кеҥеж да теле, кече да йӱд огыт пыте».
Глава 8