Выбрать язык
Книги Ветхого Завета
Книги Нового Завета
с русским текстом1 Юмо Нойым да тудын эргыже-влакым суапландарен да нунылан каласен: «Тӱлаҥза да шукемза, мландым темыза [да озаланыза].2 Мландысе чыла янлык, [мландысе чыла вольык,] кавасе чыла кайык, мландымбалысе чыла тыгыде чонан, теҥызысе чыла кол – тек тендан деч лӱдыт да чытырат. Нуно тендан кидышкыда пуымо улыт.3 Чыла тарванылше да илыше тыланда кочкыш лиеш, ужар кушкыл семынак чыла тидым тыланда пуэм.4 Но шылыште эше вӱр – тудын чонжо – уло гын, тидым ида коч.5 Мый тендан вӱрда верч кычал луктам, вет тендан илышда шке вӱрыштыда. Кеч-могай янлык дечат тендан вӱрда верч кычал луктам. Айдеме кид дене, иза-шольо кид дене пытарыме айдеме чон верчат кычал луктам.
6 Кӧ айдеме вӱрым йоктара, тудын вӱржӧ айдеме кид денак йоктарыме лиеш: вет айдеме Юмын тӱсшӧ почеш ышталтын.7 Теже тӱлаҥза да шукемза, мланде мучко шарлыза да ешаралтса».
8 Юмо Нойлан да тудын пелен улшо эргыже-влаклан каласен:9 «Мый тендан дене да тендан деч варасе тукымда-влак дене,10 тыгак тендан дене улшо чыла илыше, кайык ден вольык, чыла янлык, ковчег гыч чыла лекше, мландымбалысе чыла чонан дене11 ойпидышым ыштем: мланде ӱмбалне улшо чонан-влак тыгай вӱд ташлымаш дене тетла пытарыме огыт лий, ынде мландым пустаҥдыше вӱд ташлымашыжат огеш лий».
12 [Господь] Юмо каласен: «Ойпидышым Мый тыланда да тендан дене улшо чыла илыше чонанлан тукым гыч тукымыш курымешлан пуэм. Теве ойпидышемын палыже:13 пыл лоҥгаште Мый шонанпылым шогалтем, тудо Мый ден мланде кокласе [курымаш] ойпидышемын палыже лиеш.14 Мланде ӱмбаке пылым колтымем годым пыл коклаште шонанпыл кояш тӱҥалеш.15 Тунам Мый тендан дене да чыла тӱрлӧ илыше чонан дене ыштыме ойпидышем шарналтем: чыла чонаным пытарыше вӱд ташлымаш тетла огеш лий.16 Пыл коклаште шонанпыл лиймеке, Мый тудым ужам да [мланде ден] мландымбалысе кажне илыше чонан дене курымешлан ыштыме шке ойпидышемым шарналтем».17 Юмо Нойлан каласен: «Теве Мыйын мландымбалне чыла илыше дене ыштыме ойпидышын палдарыше палыже».
18 Ной дене пырля ковчегыште лийше эргыже-влак Сим, Хам да Иафет лӱман лийыныт. Хамже Ханаанын ачаже лийын.19 Нуно кумытын Нойын эргыже-влак лийыныт, мландымбалне чыла калык нунын деч шарлен.
20 Ной мланде пашам ышташ тӱҥалын, виноград аҥам шынден.21 Виноград аракам йӱмеке, тудо руштын да шке омашыштыже чара киен.22 Тудын чара улмыжым Хам, Ханаанын ачаже, ужын. Омаш гыч лекмекыже, тудо изаж ден шольыжлан тидын нерген каласен.23 Тунам Сим ден Иафет вургемым налыныт да, вачӱмбакышт пыштен, омашышке шеҥгек чакнен пуреныт, ачаштын чара капшым леведыныт. Тыгодым нуно чурийыштым вес могырыш савыреныт да ачаштын чара улмыжым ужын огытыл.24 Ной шӧрлен кынелын, изирак эргыжын мом ыштымыжым пален налын25 да каласен: «Ханаан каргыме, тудо иза-шольыжлан кулын кулжо лиеш».26 Вара каласен: «Симын Господь Юмыжо чапландарыме, да тек Ханаан тудын кулжо лиеш.27 Тек Юмо Иафетын тукымжым шарен толеш, тек тудо Симын омашыштыже илаш тӱҥалеш. Тек Ханаан тудын кулжо лиеш».
28 Вӱд ташлымаш деч вара Ной кумшӱдӧ витле ийым илен.29 Ной чылаже индешшӱдӧ витле ийым илен, вара колен.
Глава 9