Выбрать язык
Книги Ветхого Завета
Книги Нового Завета
с русским текстом1 Господь Аврамлан каласен: «Шке мландетым, тукыметым да ачатын суртшым коден, Мыйын ончыктымо мландышке кае.2 Мый тый дечет пеш кугу калыкым ыштем, тыйым суапландарем да лӱметым кӱшкӧ нӧлталам, тый молылан суапландарымаш лият.3 Тыйым суапландарыше-влакым Мый суапландарем, тыйым каргыше-влакым Мый каргем. Тыйын гоч мландымбалысе чыла тукым суапландаралтеш».
4 Господьын кӱштымыж почеш Аврам корныш лектын, тудын дене пырля Лот каен. Харран гыч лектын кайымыж годым Аврамлан шымле вич ий лийын.5 Аврам Сара ватыжым, шольыжын Лот эргыжым, ыштен налме уло погыштым, Харраныште шкаланышт налме чыла кулыштым пырля налын. Тыге нуно Ханаан мландышке каяш лектыныт. Ханаан мландышке толын шумеке,6 Аврам тиде мланде мучко эртен да Сихем манме вер марте, Морэ тумо деке, миен шуын. Тунам тиде мландыште хананей-влак иленыт.7 Господь Аврамлан кончен да каласен: «Тиде мландым Мый тыйын урлыкетлан пуэм». Аврам тудлан кончышо Господьлан тушто жертвенникым ыштен.8 Тушечын тудо курыкла деке, Вефиль деч эрвелкыла, тарванен, да шке омашыжым тыге шогалтен: тудын деч Вефиль касвелыште, а Гай эрвелыште лийын. Тушто тудо Господьлан жертвенникым ыштен да [тудлан кончышо] Господьын лӱмжым ӱжын кумалын.9 Аврам тушечын корныжым Кечывалвел мландыш*а шуен.
10 Тиде мландыште шужымаш тӱҥалын. Варажым шужымаш эшеат кугу лийын, сандене, неле жапым илен эртараш манын, Аврам Египетыш каен.11 Кунам тудо Египет деке лишемын, Саралан, шке ватыжлан, каласен: «Мый палем: тый мотор ӱдырамаш улат.12 Египтян-влак тыйым ужытат, каласат: ”Тиде тудын ватыже”, да мыйым пуштыт, а тыйым илышым кодат.13 Тый мыйын шӱжарем улат манын каласе. Тылат верчын мый денем уда ынже лий, тылат кӧра чонем илыше кодшо».
14 Кунам Аврам Египетыш толын шуын, египтян-влак Саран пеш мотор улмыжым ужыныт.15 Сарам фараонын тӧра-влакшат ужыныт да тудын нерген озаштлан моктен ойленыт, да Сарам фараонын пӧртышкыжӧ налыныт.16 Саралан кӧра Аврам дене чылажат сай лийын. Тудын тыгыде ден шолдыра вольыкшо, осёлжо, пӧръеҥ ден ӱдырамаш кулжо, вӱльӧ осёл ден верблюдшо шукемыныт.
17 Но Аврамын Сара ватыжлан верч Господь фараонлан да тудын пӧртыштӧ улшо-шамычлан кугу туткар-влакым колтен.18 Фараон Аврамым ӱжын кондыктен да каласен: «Мом тый мый денем ыштенат? Тудо мыйын ватем манын, молан мыланем ойлен отыл?19 Тудо мыйын шӱжарем манын, молан каласенат? Мый вет тудым ватылыкеш налынам ыле. Теве тыйын ватет, тудым нал да тышеч кае».20 Фараон шке еҥже-влаклан Аврамым, тудын ватыжым да чыла мо улыжым, [нунын дене пырля Лотым] ужатен колташ кӱштен.
*а 12:9 Кечывалвел мланде – вес семынже Негев.
Глава 12