Выбрать язык
Книги Ветхого Завета
Книги Нового Завета
с русским текстом1 Аврам мо улыжым поген да ватыж дене Египет гыч Кечывалвел мландыш каен. Нунын дене пырля Лотат лийын.2 Аврам вольыклан, шийлан, шӧртньылан пеш поян лийын.3-4 Аврам корныжым Кечывалвел мланде гыч Вефиль могырыш шуен да Вефиль ден Гай коклаште омашым шындыме, жертвенникым ыштыме ондакысе верышкыже миен. Тушто Аврам Господьын лӱмжым ӱжын кумалын.
5 Аврам дене пырля коштшо Лотынат шкенжын тыгыде да шолдыра вольыкшо, тыгак омаш-влакше лийыныт.6 Пырля илашышт мланде шыгыр лийын: нунын погышт пеш шуко улмаш, сандене нуно пырля илен кертын огытыл.7 Аврам ден Лотын кӱтӱчышт-влак коклаште ӱчашымаш лектын, ханаан ден ферезей калык-влакат тунам тудо мландыштак иленыт.
8 Аврам Лотлан каласен: «Мемнан коклаштына, тыгак мыйын да тыйын кӱтӱчӧ-влак коклаште ӱчашымаш ынже лий, вет ме ик тукым улына.9 Уло мланде тыйын ончылнет огыл мо? Посна ойырло мый дечем. Тый шолашке гын, мый пурлашке каем, а тый пурлашке гын – мый шолашке».10 Лот вуйжым нӧлталын да Иордан йырысе чыла лапверыште вӱдыжгӧ ситымым ужын. Господьын Содом ден Гоморра олалам пытарымыж деч ончыч тиде мланде Сигор марте Господьын садше гай, Египет мланде гай лийын.11 Лот шкаланже Иордан воктенысе лапверым ойырен налын да эрвелыш тарванен. Нуно икте-весышт деч ойырленыт.12 Аврам Ханаан мландеш верланен, а Лот лапверысе олала воктене илаш тӱҥалын. Тудо ик вер гыч вес верыш куснен коштын, Содом марте миен шуын.
13 Содомышто илыше-влак пеш осал да Господь ончылно кугу сулыкан лийыныт.
14 Лотын ойырлымыж деч вара Господь Аврамлан каласен: «Вуетым нӧлтал да кызыт улмо верет гыч йӱдвелыш да кечывалвелыш, эрвелыш да касвелыш ончал.15 Вет тыйын ужмо чыла мландым Мый тыланет да тыйын тукыметлан курымешлан пуэм.16 Тыйын тукыметым мландымбалысе ошма пырче наре ыштем. Иктаж-кӧ мландымбалысе ошма пырчым шотлен кертеш гын, тунам тыйын тукыметымат шотлен лукташ лиеш.17 Тарване, тиде мландым тореш-кутынь коштын савырне, вет Мый тудым тыланет [да тыйын тукыметлан курымешлан] пуэм».
18 Аврам вер гыч верыш кусныл коштын да Хеврон лишне улшо Мамре манме тумер воктене верланен. Тушто Господьлан жертвенникым ыштен.
Глава 13