Выбрать язык
Книги Ветхого Завета
Книги Нового Завета
с русским текстом1 Кунам Сеннаарын кугыжаже Амрафел лийын, Елласарын кугыжаже – Ариох, Еламын кугыжаже – Кедорлаомер да Гоимын кугыжаже – Фидал,2 нуно Содомын Бера кугыжаже, Гоморран Бирша кугыжаже, Адман Шинав кугыжаже, Цевоимын Шемевер кугыжаже да Сигор манме Белан кугыжаже ваштареш сар дене тарваненыт.3 Пытартыш вич кугыжа-влак чыланат Сиддим лӱман лоп вереш погыненыт, кызыт тыште Шинчалан теҥыз улеш.4 Латкок ий нуно Кедорлаомерын кид йымалныже лийыныт, а латкумшо ийын тудын ваштареш кынелыныт.5 Латнылымше ийын Кедорлаомер да тудын дене пырля улшо кугыжа-влак толыныт да рефаим калыкым Аштероф-Карнаимыште, зузим калыкым Гамаште, эмим калыкым Шаве-Кириафаимыште6 да хоррей калыкым нунын Сеир курыклаштышт ир мланде воктенысе Эл-Фаран марте сеҥен налыныт.7 Тушеч пӧртылмеке, нуно Мишпат але Кадес манме памаш деке толын лектыныт да амалик-влакын пӱтынь элыштым, тыгак Хацацон-Тамарыште илыше аморрей-влакым сеҥен налыныт.
8-9 Нунын ваштареш Содомын, Гоморран, Адман, Цевоимын, Белан, вес семынже Сигорын, кугыжаже-влак лектыныт да Сиддим лоп верыште Еламын кугыжаже Кедорлаомер, Гоимын кугыжаже Фидал, Сеннаарын кугыжаже Амрафел, Елласарын кугыжаже Ариох ваштареш кредалаш тӱҥалыныт, ныл кугыжа – вич кугыжа ваштареш.10 А Сиддим лопышто мланде кишан шуко вынем лийын. Содомын да Гоморран кугыжашт, чакнен куржшыштла, тушко пуреҥгаеныт, а молышт курык лоҥгаш куржын утленыт.11 Сеҥыше-влак Содомын да Гоморран чыла погыштым, нунын уло кочкыш шапашыштым поген налыныт да каеныт.12 Тыгак Содомышто илыше Лотым, Аврамын шольыжын эргыжым, погыжге наҥгаеныт.
13 Утлен куржшо ик еҥ тидын нерген тунам Мамрий лӱман аморрей еҥын тумерже воктене илыше еврей Аврамлан увертарен. Мамрийын Эшкол ден Анер тукым шольыжо-влак лийыныт, нуно тушман ваштареш Аврам дене ик ушемым ыштеныт улмаш.14 [Лот] родыжын пленыш логалмыжым колмеке, Аврам шкенжын суртыштыжо шочын-кушшо кумшӱдӧ латкандаш ӱшанле тарзыжлан саргуралым*а кучыктен да тушман почеш Дан марте каен.15 Аврам шке тарзыж-влак дене, посна тӱшкалан шелалтын, йӱдым тушман-влак ӱмбак керылтын да нуным кырен шалатен, кодшыштым Дамаск деч йӱдвелыште верланыше Хова марте поктен каен.16 Наҥгайыме чыла погым, Лот родыжым да тудын погыжым, ӱдырамаш-влакым да кодшо чыла еҥым Аврам пӧртылтен.
17 Кедорлаомерым да тудын дене пырля лийше кугыжа-влакым сеҥен пӧртылмыж годым Аврамым вашлияш Шаве лапверыш Содомын кугыжаже лектын. Тиде верже Кугыжа лапвер маналтеш.18 Мелхиседек, Салимын кугыжаже, тушко кинде ден йошкар аракам конден. Тудо Чыла деч Кӱшылысӧ Юмын иерейже лийын.19 Аврамым суапландарен, Мелхиседек каласен: «Чыла деч Кӱшылысӧ Юмо деч, кава ден мландым Ыштыше деч Аврамлан суапландарымаш лийже!20 Чыла деч Кӱшылысӧ Юмо моктымо лийже: Тудо тушманет-влакым тыйын кидышкет пуэн!» Поген налме гыч луымшо ужашыжым Аврам Мелхиседеклан пуэн.
21 Содомын кугыжаже Аврамлан тыге манын: «Еҥ-влакым мыланем пу, а погым чыла шкаланет нал».22 Но Аврам Содомын кугыжажлан каласен: «Кава ден мландым Ыштыше Чыла деч Кӱшылысӧ Господь Юмо велке кидемым нӧлталын товатлем:23 мый тыйыным шӱртӧ пырчымат, йолчием кылдышымат ом нал – мый Аврамым пойдаренам манын, каласен ит керт.24 Мыйын еҥ-влакем мом кочкыныт, тудым веле налам. Тыгак мый денем пырля лийше Анер, Эшкол да Мамрий тек шке ужашыштым налыт».
*а 14:14 Саргурал – оружие.
Глава 14