Выбрать язык
Книги Ветхого Завета
Книги Нового Завета
с русским текстом1 Иаков [Исаак] ачажын ӧрдыжъеҥ семын илыме Ханаан мландыште илен.2 Теве Иаковын да тукымжын илышышт.
Латшым ияш самырык Иосиф изаже-влак дене – ачажын Валла ден Зелфа ватыже-влакын эргышт дене – пырля [ачажын] шорык кӱтӱжым кӱтен. Иосиф изаж-влак нерген [Израиль] ачашт деке уда шомакым кондеден.3 Иосиф Израильын шоҥгемме велеш шочшо эргыже лийын, сандене ачаже тудым моло эргышт деч утларак йӧратен, садланак тудлан тӱрлӧ тӱсан чапле вургемым ыштен пуэн.4 Ачаштын тудым моло деч утларак йӧратымыжым изашт-влак ужыныт, да нунын Иосиф деке ужмышудымаш шочын. Изаж-влак тудын дене порын мутланен кертын огытыл.
5 Икана Иосиф омым ужын да мом ужмыжым изаже-влаклан каласкален, да тудын деке ужмышудымаш нуным эшеат утларак авалтен.6 Тудо манын: «Колыштса, мом мый омо дене ужынам:7 пуйто ме пасу покшелне кылтам пидына. Кенета мыйын кылтам кынел шогале. Вара тендан кылтада-влак мыйын кылтам йыр кынел шогальыч да вуйыштым тудлан савалтышт».8 Изашт-влак Иосифлан маныныт: «Але вара тый мемнан кугыжана лият? Але тый мемнан дене озаланаш тӱҥалат?» Омым ужмыжлан да тыге каласымыжлан изашт-влак Иосифым эшеат чот ужмышудымын ончаш тӱҥалыныт.
9 Иосифлан эше вес омо кончен, тудымат [ачаж ден] изаж-влаклан каласкален: «Мый адак ик омым ужынам. Пуйто кече, тылзе да латик шӱдыр мыланем вуйым сават».10 Кунам Иосиф омыжым ачаж ден изаж-влаклан каласкален, ачаже тудым шылтален налын: «Могай тиде тылат омо кончен? Вара мыят, аватат, изат-влакат тый декет толына да вуйнам мланде марте савена мо?»11 Изашт-влак Иосифлан шыдешкеныт, а ачаже тудын каласымыжым ушышкыжо пыштен.
12 Икана изаже-влак Сихемыш ачаштын шорык кӱтӱжым кӱташ каеныт.13 Израиль Иосифлан тыге манын: «Изат-влак Сихемыште кӱтӱм кӱтат. Кай нунын деке, ончал тол». Иосифше манын: «Йӧра».14 Израиль тудлан каласен: «Пален нал, изат-влак таза улыт мо, кӱтӱ кузерак? Вара мылам каласет». Тыге манын, эргыжым Хеврон лапвер гыч колтен. Иосиф Сихемыш толын лектын.
15 Кычал коштмыж годым тудым ик еҥ вашлийын да «мом тыште кычалат» манын йодын.16 Иосиф каласен: «Мый изам-влакым кычалам. Каласе, кушто нуно кӱтӱм кӱтат?»17 Тудо еҥже манын: «Нуно тышеч каеныт. Дофаныш каена манмыштым колынам ыле». Иосиф изашт почеш каен да нуным Дофаныште муын.18 Изашт-влак Иосифын толмыжым мӱндырчынак ужыныт да нунын дек лишем шумыж деч ончычак тудым кузе пуштмо нерген шонкалаш тӱҥалыныт.19 Икте-весыштлан каласеныт: «Теве омым ужшет толеш.20 Айста тудым ынде пуштына да иктаж-могай вынемыш кудалтена. А вара янлык кочкын манын каласена. Тунам ужына, мо лектеш тудын омыж гыч».
21 Тидым Рувим колын да манын: «Тудым она пушт». Тыге манмыж дене Иосифым изаштын кидышт деч утарен.22 Рувим тыге ойлен: «Вӱрым ида йоктаре. Иосифым ир мландысе вынемыш кудалтыза, киддам ӱмбакше ида нӧлтал». Тыге Рувим Иосифым нунын кидышт деч утараш да ачаж деке пӧртылташ шонен ойлен.
23 Иосифын толын шумекше, изаже-влак ӱмбачше тӱрлӧ тӱсан чапле вургемжым кудаш налыныт,24 тудым пӱтырен кучен, вынемыш кудалтеныт. Вынемже пуста улмаш, вӱд тушто лийын огыл.
25 Вара изашт-влак кочкаш шинчыныт. Вуйыштым нӧлталыныт да умбалне измаил тукымын Галаад гыч толшо ӱштыганжым*а ужыныт. Нунын верблюдышт-влакын тупыштышт тамле пушан стиракс киш, бальзам да ладын лийын. Тидым Египетыш наҥгаят улмаш.26 Иуда иза-шольыж-влаклан каласен: «Мыланна шольынам пуштмо да вӱржым шылтыме дене могай пайда лиеш?27 Айста тудым измаил тукым калыклан ужалена. Киднат яндар кодеш, тудо вет мемнан шольына, ме ик вӱр улына». Тудын дене молыштат келшеныт.28 Вара Мадиам купеч-влакын ты вершӧр гоч эртен кайымышт годым изак-шоляк-влак Иосифым вынем гыч луктыныт да тиде измаил тукым еҥ-влаклан коло ший оксалан ужаленыт. Нунышт Иосифым Египетыш наҥгаеныт.
29 Рувим угыч вынем деке толын да ончалын – Иосиф тушто уке. Тудо шке вургемжым кушкедын,30 вара шольыж-влак деке пӧртылын да манын: «Шольына уке, а мый, мыйже ынде куш пурем?»31 А изак-шоляк-влак Иосифын вургемжым налыныт, казатагам шӱшкылыныт, вӱржӧ дене Иосифын вургемжым амыртеныт.32 Вара тӱрлӧ тӱсан ты вургемым ачашт деке конденыт да каласеныт: «Ме теве тидым муынна. Ончал, тиде вургем тыйын эргычынак огыл?»33 Ачашт Иосифын вургемжым пален да кычкырал колтен: «Тиде эргымын вургемже! Тудым янлык кочкын, чынак, Иосифым янлык кӱрышт пытарен!»34 Иаков шке вургемжым кушкедын, кыдалешыже чоштыра вургемым сакен, эргыж верч шуко жап ойгырен.35 Ачаштым лыпландараш манын, тудын чыла эргыж ден ӱдыржӧ-влак погыненыт. Но Иаковын лыпланымыже шуын огыл, тудо тыге ойлен: «Вес тӱняшке эргым деке ойгем дене пырляк каем». Тунар чот тудо эргыж верч ойгырен.
36 А мадиан-влак Египетыште Иосифым ужаленыт. Тудым Потифар – фараонын тӧраже, капорол-влакын*б кугуракышт – налын.
*а 37:25 Ӱштыган – караван.
*б 37:36 Капорол – телохранитель.
Глава 37