Выбрать язык
Книги Ветхого Завета
Книги Нового Завета
с русским текстом1 Тудо жапыште Иуда иза-шольыж-влакым коден каен да Одоллам гыч улшо Хира лӱман еҥ воктене илаш тӱҥалын.2 Иуда тушто Шуа лӱман хананей еҥын ӱдыржым вашлийын. Иуда тудым марлан налын да туддене мален.3 Тудыжо мӱшкыраҥын да эргым ыштен, тудлан Ир лӱмым пуэн.4 Адак мӱшкыраҥын да эргым ыштен, тудлан Онан лӱмым пуэн.5 Вара эше [кумшо] эргым ыштен да Шела лӱмым пуэн. Ты эргыже шочмо годым Иуда Хезивыште лийын.6 Иуда шке Ир кугэргыжлан ӱдырым налын пуэн, тудын лӱмжӧ Фамарь лийын.7 Ир, Иудан кугэргыже, Господьлан йӧрен огыл, садлан Господь тудын чонжым налын.8 Тиддеч вара Иуда Онан эргыжлан каласен: «Изатын ватыжым марлан нал да, тудын дене мален, изатын тукымжым шуйо».*а9 Онан пален: шочшаш тукым тудын лийшаш огыл, сандене изажын ватыже дене малымыж годым, тудын тукымжым шуяш огыл манын, нӧшмыжым мландыш йоктарен.10 Господь ончылно тыгай паша осал лийын, садлан Господь тудынат чонжым налын.11 [Кок эргыже колымеке,] Иуда Фамарь шешкыжлан тыге каласен: «Шела эргым кушкын шумешке, тулык вате семын ачатын суртыштыжо иле». «Изаже-влак семын тудат колен ынже колто», – тудо [шке семынже] каласен. Фамарь каен да ачажын суртыштыжо илаш тӱҥалын.
12 Ятыр жап эртымеке, Иудан ватыже, Шуан ӱдыржӧ, колен. Ойганыме жап эртымеке, Иуда Одоллам гыч Хира лӱман йолташыже дене пырля Фимнаш шорыкшо-влакым тӱредше-влак деке каен.13 Тидым Фамарьлан шижтареныт, «ачалийшет Фимнаш шорык тӱредаш кая» маныныт.14 Фамарь ӱмбачше тулык вате вургемжым кудашын, шӱргыжым петырен да капшым леведын, Фимнаш кайыше корнышто верланыше Енаим капка воктек лектын шинчын. Тудо пален: Шела ынде кушкын шуын гынат, Фамарьым тудлан марлан налын огытыл.
15 Иуда Фамарьым ужын да яжар ӱдырамашлан шотлен, вет тудыжо шӱргыжым петырен улмаш. [Да тудым пален огыл.]16 Иуда корныжым тудын деке савыралын да «мый тый декет пурем» манын. Тудын шешкыже улмым пален огыл. А ӱдырамаш йодын: «Мый декем пурет гын, мом мыланем пуэт?»17 Иуда вашештен: «Мый кӱтӱэм гыч тылат казапачам колтем». Но Фамарь манын: «А колтымешкет олмешыже иктаж-мом пуэн кодет мо?»18 Иуда йодын: «А мо тылат кӱлеш?» Ӱдырамаш манын: «Кодо печать тамгатым, тудым сакыме кандырам да кидыштет улшо пондетым». Ӱдырамашын мом йодмыжым Иуда чыла пуэн да тудын дене мален. Фамарь Иуда деч мӱшкыраҥын.19 Вара ӱдырамаш кынелын да каен, шӱргӧ петыртышыжым кораҥден да адак тулык вате вургемжым чиен шогалын.
20 А Иуда, мо пуымыжым мӧҥгеш налаш манын, казапачажым ӱдырамашлан Одолламыште шочшо йолташыж дене колтен. Но тудыжо ӱдырамашым муын огыл.21 Сандене верысе-влак деч тыге йодын: «Енаимыште корно воктене шинчыше яжар ӱдырамаш кушто?» Нунышт «тыште нимогай яжар ӱдырамашат лийын огыл» манын каласеныт.22 Йолташыже Иуда деке мӧҥгеш пӧртылын да манын: «Мый тудым шым му. Адакшым тусо-влак тыште нимогай яжар ӱдырамашат лийын огыл маныт».23 Иудаже манын: «Мо налмыже тек тудын денак лиеш, мемнам еҥ-влак гына воштылаш ынышт тӱҥал ыле. Мый вет теве тиде казапачам колтенам ыле, но тый тудым муын отыл».
24 Кум тылзе наре эртымеке, Иудалан каласеныт: «Тыйын Фамарь шешкыч яжарланен, теве мӱшкыраҥынат шуктен». Иудаже манын: «Тудым лукса да йӱлалтыза».25 Йӱлалташ вӱден наҥгайыме годым Фамарь ачалийшыжлан тыге каласаш колтен: «Мый тиде арвер-влакын озаже деч мӱшкыран лийынам». Да каласен: «Пален нал, кӧн тиде печать тамгаже, тудым сакыме кандыраже да пондыжо».26 Иуда арверже-влакым пален да манын: «Мый огыл, а тудо чыныш лектын. Мый вет тудым Шела эргымлан пуэн омыл». Да тетла тудын дене мален огыл.
27 Аза ышташ тӱҥалме годым пале лийын: тудын мӱшкырыштыжӧ – йыгыр аза.28 Азам ышташ тӱҥалме годым [иктыжын] кидше койылалтен. Павышка «тидыже ончыч лектын» манын да кидышкыже йошкар шӱртым кылден.29 Но аза кидшым мӧҥгеш налын, да тудын вес йыгыр пелашыже лектын. Павышка каласен: «Кузе тый сеҥен лектынатше?!» Азалан Фарес*б лӱмым пуэныт.30 Вара кидыштыже йошкар шӱртым кылдыман вес йыгыр пелашыже лектын. Тудлан Зерах лӱмым пуэныт.
*а 38:8 Моисейын законжо почеш йочадыме тулык ӱдырамашым колышо марийжын изаже але шольыжо марлан налшаш улмаш. Ончо: Зак.уш 25:5-6.
*б 38:29 «Фарес» лӱм еврей йылмысе ’кӱрыштмаш’ мут дене ик семынрак йоҥга.
Глава 38