Выбрать язык
Книги Ветхого Завета
Книги Нового Завета
с русским текстом1 Иосифым Египетыш наҥгаеныт. Тудым тушко кондышо измаил тукым еҥ-влак деч фараонын тӧраже, капорол-влакын кугуракышт египтян Потифар налын.2 Господь Иосиф пелен лийын, садлан тудын пашажат ушнен толын. Тудо египтян озажын суртыштыжо илен.3 Озаже ужын: Господь эре Иосиф пелен, мом гына тудо ышташ ок пиж, чылаштыжат тудлан Господь полша.4 Иосиф озажын кумылжым сулен, тудлан пашам ыштен илен. Озаже тудым шке суртшым виктараш шогалтен, уло погыжым тудын кидышкыже пуэн.
5 Сурт-печыж ден уло погыжым виктараш шогалтыме деч вара Иосифлан кӧра Господь египтянын суртшым суапландарен. Тыгак тудын пӧртыштыжӧ, пасуштыжо мо лийын – Господь чыла суапландарен.6 А оза, можо лийын – чылажымат Иосифлан кучыктен пуэн да кочмо деч моло нерген тургыжланен огыл.
А Иосиф капкылже денат, чурийже денат мотор лийын.7 Сандене озан ватыже Иосиф ӱмбак шинчам пыштен, шкеж деке малаш ӱжын.8 Но Иосиф тидын дене келшен огыл, озажын ватыжлан манын: «Тыште улмем дене мыйын озам шке суртыштыжо нимогай пашамат огеш пале. Можо тудын уло, чылажымат мылам ӱшанен пуэн.9 Мый дечем кугурак айдеме тиде пӧртыштӧ уке. Озам мылам тый дечет молым нимомат чарен огыл, вет тыйже тудын ватыже улат. Кузе вара мый тыгай осал пашам ыштем да Юмо ончылно сулыкыш пурем?»10 Озавате кажне кечын Иосифым шке декше савыраш тӧчен, но Иосиф тудым колыштын огыл, тудын дене пырля лияш да малаш келшен огыл.
11 Икана Иосиф сомыл дене пӧртыш пурен, тиде жапыште тушто мӧҥгысӧ кокла гыч нигӧ лийын огыл.12 Озавате тудым вургемже гыч руалтен кучен да пеленже возаш шӱден. Иосиф вургемжым озаватын кидешыже коден да лектын куржын.13 Озавате, кидыштыже Иосифын вургем кодмым да Иосифын куржын лекмыжым ужынат,14 мӧҥгысӧ-влакым кычкырал конден да нунылан тыге каласен: «Ончыза, мемнам мыскылашлан марием еврейым конден. Тудо мый декем малаш толын ыле, но мый кугу йӱкын кычкырышым.15 Кычкырлаш тӱҥалмем колын, вургемжымат мый денем коден, лектын куржо».
16 Озавате Иосифын вургемжым тудын озажын мӧҥгыш толмешкыже шкеж дене коден.17 Толмекше, тудланат тыгак каласкален: «Тыйын кондымо еврей кулет, мыскылаш шонен, мый декем толын [да ”тый денет пырля возам” манын ойлен].18 Но кычкыраш тӱҥалмем [колмекше], вургемжым мый денем кудалтен коден, лектын куржын».19 Ватыжын «тыйын кулет мый денем тыге ыштен» манмым колмеке, оза чот шыдешкен,20 Иосифым кучен да казаматыш петырен шынден. Туштыжо кугыжан петырыме еҥже-влак шинченыт. Тыге Иосиф казаматыш логалын.
21 Но Господь Иосиф пелен лийын, тудлан шке порылыкшым ончыктен, казамат озам тудын деке поро кумыланым ыштен.22 Казамат оза тыште шинчыше чыла еҥ кокла гыч Иосифым эн тӱҥлан шогалтен. Тудо тушто чыла пашам виктарен шоген.23 Казамат оза Иосифын кузе-мом ыштымыжым терген огыл, вет Господь Иосиф дене пырля лийын. Мом гына Иосиф ыштен огыл, Господь тудлан эре полшен шоген.
Глава 39