Выбрать язык
Книги Ветхого Завета
Книги Нового Завета
с русским текстом1 Илиян чыла мом ыштымыжым Ахав Иезавельлан каласен. Тудо Илиян чыла пророкым керде дене пуштмыж нергенат ойлен.2 Иезавель Илия дек уверзым тыге каласаш колтен: «[Тый Илия, а мый Иезавель улам гын,] мом тый кажне пророк дене ыштенат, тидымак мый эрла тиде жаплан тый денет ом ыште гын, тек юмо-влак мыйым пеҥгыдын мут кучаш шогалтат!» 3 Тидым колмеке, шке чонжым утараш манын, Илия Иуда мландысе Вирсавийыш каен. Тушан тудо шке тарзыжым коден,4 а шкеже ир мландыш ик кече кайыме кутыш торашке каен. Толын шумеке, кугу вондер йымалан шинчын да шкаланже колымашым йодын кумалын: «Сита, Господь. Нал мыйын чонем. Мо дене мый шке ача-кочам-влак деч сайрак улам?!»5 Вара тудо возын да вондер йымалне мален колтен. Тудым Суксо тӱкалтен да каласен: «Кынел, коч [да йӱ]».6 Илия ончалын да ужын: вуйжо воктене – кӱктымӧ лепошка да вӱдан кувшин. Тудо кочкын, йӱын да угыч мален колтен.7 Господьын Суксыжо кокымшо гана толын, тудым тӱкалтен да каласен: «Кынел, коч [да йӱ], вет тыйым кужу корно вуча».8 Илия кынелын, кочкын-йӱын. Кочкыш тудлан ӱнарым пуэн, да тудо Юмын Хорив курыкшо деке нылле кече да нылле йӱд каен.
9 Тушто тудо курыкпомышыш пурен да тушан мален. Тудлан Господьын шомакше лийын: «Илия, молан тый тыште улат?»10 Тудо вашештен: «Господь Юмо Саваофлан мый лым лийде тыршенам. Израиль эрге-влак Тыйын ойпидышетым коденыт, жертвенник-влакетым шалатеныт да пророк-шамычетым керде дене пуштыныт. Мый шкетын кодынам, но нуно мыйымат пушташ кычалыт».11 Господь каласен: «Лек да курыкышто Господьын чурийже ончык шогал. Тыйын воктечет Господь эртен кая». Теве кугу да виян мардеж толын лектын. Господь ончылно тудо курык-влакым шелын, курыкоҥ-шамычым шалатен. Но Господь мардежыште лийын огыл. Мардеж деч вара мланде чытырналтын, но Господь туштат лийын огыл.12 Мланде чытырналтмаш деч вара тул лектын, но Господь тулыштат лийын огыл. Тул дечын вара изи мардеж лыжгыктен, [туштыжо Господь лийын].13 Изи мардеж лыжгыктымым колын, Илия чурийжым плащыж дене леведын. Вара курыкпомышыш пурымо вер деке миен шогалын. Тудлан йӱк шоктен: «Илия, молан тый тыште улат?» 14 Тудо вашештен: «Господь Юмо Саваофлан мый лым лийде тыршенам. Вет израиль эрге-влак Тыйын ойпидышетым коденыт, жертвенник-влакетым шалатеныт да пророк-шамычетым керде дене пуштыныт. Мый шкетын кодынам, но нуно мыйымат пушташ кычалыт».15 Господь тудлан каласен: «Толмо корнет дене мӧҥгеш пӧртыл да Дамаск воктенысе ир мландыш кай. Миен шумекет, Азаилым Сирийын кугыжажлан шӱрӧ, 16 Ииуйым, Намессий эргым – Израиль кугыжалан. А Авел-Мехола гыч Елисейым, Сафат эргым, шке олмешет пророклан шӱрӧ.17 Кӧ Азаилын кердыж деч куржеш, тудым Ииуй пуштеш. А кӧ Ииуйын кердыж деч утаралт кодеш, тудым Елисей пуштеш.18 Израильтян-влак коклаште Мый шым тӱжем [еҥым] арален кодем. Нунын пулвуйышт Ваал ончылно сукен шинчен огытыл, умшашт тудым шупшалын огытыл».
19 Илия тушеч каен да пасум куралше Елисейым, Сафат эргым, вашлийын. Тудыжын латкок мужыр ӱшкыжшӧ улмаш, шкеже пытартыш мужыр пелен ошкылын. Елисей воктеч эртен кайымыж годым Илия тудын ӱмбак шке плащыжым шуэн.20 Тунам Елисей, ӱшкыж-влакым коден, Илия почеш куржын. «Ачам да авам дене чеверласаш пу, вара мый тый денет пырля каем», – каласен тудо. «Кай, миен тол. Но мом мый тылат ыштенам, ит мондо», – вашештен Илия. 21 Елисей пасуш пӧртылын, кок ӱшкыжшым налын да шӱшкылын. Шылым шолташ шогавуйым йӱлалтен, шолтымо шылым еҥ-влаклан пуэден, да нунышт кочкыныт. А шкеже кынелын да Илия почеш каен, тудын тарзыже лийын.
Глава 19