Выбрать язык
Книги Ветхого Завета
Книги Нового Завета
с русским текстом1 Тиде жапыште Тынеш Пуртышо Иоанн толын да Иудей ир мландыште увертарен туныкташ тӱҥалын.2 Тудо ойлен: «Язык деч кораҥза да Юмо деке савырныза! Пылпомыш Кугыжаныш ынде лишемын!»3 Исаий пророк тудын нергенак тыге каласен:
«Ир мландыште кычкырышын йӱкшӧ шокта:
Господьлан корным ямдылыза,
Тудын йолгорныжым вияшым ыштыза!»*а
4 Иоанн верблюд меж вургеман улмаш, кыдалыштыже шӱштӱштӧ лийын, кочкышыжо шурнышырчык да ир мӱкш мӱй лийыныт.5 Тудын деке Иерусалим, уло Иудей да Иордан эҥер воктенысе чыла вер гыч шуко калык толын.6 Нуно языкыштым почын ойленыт, да Иоанн нуным Иордан эҥереш тынеш пуртен.
7 Тынеш пураш толшо шуко фарисей ден саддукей-влакым ужмеке, Иоанн нунылан каласен: «Те, шемгишкын шочшыж-влак! Ончыкылык шыде логалме деч утлен куржаш кӧ тыланда каҥашым пуэн?8 Язык деч кораҥын, Юмо деке савырнымыланда келшен толшо саскам шочыктыза.9 ”Мемнан ачана Авраам” манын, кӧргыштыда ида шоно. Тыланда ойлем: Юмо теве нине кӱ-влак гычат Авраамын икшывыж-влакым ыштен кертеш.10 Ынде пушеҥге вож воктене товар ямде кия: сай саскам пуыдымо чыла пушеҥгым руат да тулыш шуат.11 Язык деч кораҥын, Юмо деке савырныза манын, мый тендам вӱд дене тынеш пуртем, но почешем Толшо мый дечем виянрак, мый Тудын йолчиемжым нумалашат ом йӧрӧ. Тудо тендам Святой Шӱлыш да тул дене тынеш пурта.12 Тудын кидыштыже кольмо, Тудо Шкенжын идымжым эрыкта: шыдаҥжым клатыш пога, а арважым йӧрташ лийдыме тулеш йӱлалта».
13 Тунам Иисус Галилей гыч Иордан эҥер воктеке Иоанн деке тынеш пураш толын.14 Но Иоанн Тудым чарен ойлен: «Мыйым Тый тынеш пуртышаш улат ыле, а Тый мый декем толынат!»15 Иисус вашештен: «Ынде тек тыге лиеш. Тидын дене ме кӱлеш семын Юмын кумылжым шуктена». Тунам Иоанн тынеш пурташ келшен.16 Тынеш пуртымо деч вара Иисус тунамак вӱд гыч лектын. Тудлан пылпомыш почылтын, да Тудо Юмын Шӱлышым ужын. Шӱлыш кӧгӧрчен семын волен да ӱмбакыже толын.17 Пылпомыш гыч йӱк шоктен: «Тиде Мыйын йӧратыме Эргым, Мыйын поро кумылем Тудын дене».
Глава 3