Выбрать язык
Книги Ветхого Завета
Книги Нового Завета
с русским текстом1 Иисусым диавол тергыже манын, Шӱлыш Тудым ир мландыш наҥгаен.2 Нылле кече да нылле йӱд нимом кочде пӱтым кучымеке, Иисус пытартышлан шужымым шижын.3 Тудын деке алгаштарыше миен да ойлен: «Тый Юмын Эрге улат гын, нине кӱ-влаклан киндыш савырнаш кӱштӧ».4 Но Иисус вашештен: «Возымо:
”Айдеме кинде дене гына огыл,
а Юмын умшаж гыч лекше кажне шомак дене ила”».*а
5 Тунам диавол Тудым святой олашке наҥгаен, храм леведыш тӱрыш шогалтен6 да ойлен: «Тый Юмын Эрге улат гын, ӱлыкӧ тӧрштӧ, возымо вет:
”Тудо Суксыж-влаклан Тыйын нерген кӱшта:
йолет дене кӱэш ит шӱртньӧ манын,
нуно Тыйым кидешышт нумал наҥгаят”».*б
7 Иисус тудлан каласен: «Тыгак возымо: ”Господь Юметым ит терге”».*в
8 Ынде диавол Тудым пеш кӱкшӧ курык ӱмбаке намиен, тӱнясе чыла кугыжанышым, мо дене чапланымыштым ончыктен9 да ойлен: «Кумык возын ончыланем вуетым савет гын, чыла тидым Тылат пуэм».10 Тунам Иисус тудлан ойлен: «Мый дечем кораҥ, сатана! Возымо:
”Господь Юметлан, сукен, вуйым саве,
ик Тудланак веле служитле”».*г
11 Тунам диавол Тудым коден каен, а Суксо-влак толыныт да Иисуслан служитлаш тӱҥалыныт.
12 Иоанным кучен петырыме нерген колмеке, Иисус Галилейыш каен.13 Назаретым коден, теҥыз воктен верланыше Завулон ден Неффалим кундемысе Капернаумыш илаш толын.14 Тыге Исаий пророк гоч каласыме шукталтын. Тудо ойлен:
15 «Завулон мланде ден Неффалим мланде,
теҥыз деке кайыме корно,
Иордан вес вел кундем,
йот калык-влакын Галилей мландышт –
16 пычкемыште илыше калык
кугу волгыдым ужын,
колымаш ӱмылан велыште шинчыше-влаклан
волгыдо волгалтын».*д
17 Тиде жап гыч Иисус увертарен туныкташ тӱҥалын. Тудо ойлен: «Язык деч кораҥын, Юмо деке савырныза: Пылпомыш Кугыжаныш лишемын!»
18 Галилей теҥыз воктеч кайымыж годым Тудо кок изак-шолякым, Петр манме Симоным да тудын Андрей шольыжым, ужын. Нуно колызо лийыныт, тиде жапыште вапшыштым вӱдыш кышкеныт.19 Иисус нунылан ойлен: «Почешем кайыза, Мый тендам айдеме кучышым ыштем».20 Нуно тунамак вапшыштым коденыт да Иисус почеш каеныт.21 Тушеч умбакырак ошкылмеке, вес кок изак-шолякым, Зеведейын Иаков ден Иоанн эргыж-влакым ужын. Нуно ачашт дене пырля пушышто лийыныт да вапшыштым ачаленыт. Иисус нунымат ӱжын.22 Нуно тунамак пушыштым, ачаштым коденыт да Иисус почеш каеныт.
23 Иисус уло Галилей мучко коштын да синагоглаште туныктен, Кугыжанышын Поро Увержым каласкален, еҥ-влакым тӱрлӧ чер ден туешкымышт деч паремден.24 Тудын нерген мут уло Сирий мучко шарлен. Туешкыше, тӱрлӧ чер дене орланыше да корштен йӧсланыше, ия кучыман, тылзе кушмо годым орланыше, йыжыҥдыме еҥ-влакым чылаштым Иисус деке конденыт, да Тудо нуным паремден.25 Иисус почеш Галилей, Декаполис,*е Иерусалим, Иудей да Иордан эҥер вес могыр гыч шуко калык коштын.
*а 4:4 Зак.уш 8:3.
*б 4:6 Пс 90:11-12.
*в 4:7 Зак.уш 6:16.
*г 4:10 Зак.уш 6:13.
*е 4:25 «Декаполис» – Лу ола.
Глава 4