Выбрать язык
Книги Ветхого Завета
Книги Нового Завета
с русским текстом1 Иза-шольо-влак, Святой Шӱлышын пуымо тӱрлӧ моштымаш шотышто тендам палыдымым ынем кодо.2 Кунам те чын Юмым але пален огыдал, йылмыдыме шояк юмо деке пуйто вӱден наҥгайыме гай коштында манын паледа.3 Садлан палашда ойлем: Юмын Шӱлыш дене ойлышо айдеме Иисусым ок карге, да Святой Шӱлыш деч посна нигӧ Иисусым Господь манын ок керт.
4 Шӱлышын пуымо моштымаш тӱрлӧ лиеш, а Шӱлыш икте.5 Служитлыме пашат тӱрлӧ лиеш, а Господь икте.6 Ыштымаш тӱрлӧ лиеш, а чылалан чыла тидым ыштыктыше Юмо икте.7 Чылалан пайда лийже манын, Шӱлыш кажне айдеме гоч тӱрлын палдырна.8 Иктылан Шӱлыш гоч ушан шомак пуалтеш, весылан тиде Шӱлыш гочак – шинчымаш шомак,9 иктылан тиде Шӱлышак ойыртемалтше кугу ӱшанымашым пуа, весылан тиде Шӱлышак – паремден моштымашым.10 Иктылан чудым ышташ вий пуалтеш, весылан – пророклен ойлымаш, иктылан – шӱлыш-влакым ойыркален моштымаш, весылан – тӱрлӧ йылме, южылан – нине йылмым умылтарымаш.11 Чыла тидым ик Шӱлышак ышта. Тудо кажне айдемылан шке шонымыж семын моштымашым пуа.
12 Кап икте гынат, шуко ужашыже уло, да ик капын ужашыже шуко гынат, чыла пырля ик капым ыштат. Христос денат тыгак.13 Ме чылан, иудей але эллин, кул але эрыкан, тудо ик Шӱлыш гочак ик кап лияш тынеш пуртымо улына, да чылан тудо ик Шӱлыш денак темалтше улына.14 Капат икте гыч огыл, а шуко ужаш гыч шога.15 «Мый кид омыл да сандене капын омыл» манын, йол каласа гынат, тудо капын ужашыже огыл мо?16 «Мый шинча омыл да сандене капын омыл» манын, пылыш каласа гынат, тудо капын ужашыже огыл мо?17 Уло кап шинча улеш гын, мо дене колеш? А уло кап пылыш гын, мо дене пушым шижеш?18 Но Юмо чыла ужашым шонымыж семын вераҥден, капыште кажныжлан шке вержым пуэн.19 А чылажат ик ужаш гына лиеш ыле гын, кушто капше лиеш ыле?20 Но теве ужаш шуко, а кап икте.21 Шинча кидлан «Тый мыланем от кӱл» манын каласен ок керт, але вуй йоллан – «Тый мыланем от кӱл».22 Мӧҥгешла, капын кудо ужашыже-влак моло деч начарракла койыт, нуно эн кӱлешан улыт.23 Капын кудо ужашыже чапым шагал сулышыла коеш, тудым ме поснак сайын авыралына.24-25 Мемнан ончыкташ йӧрдымӧ ужашна-влакым поснак келшышын леведына, а ончыкташ йӧрышӧ ужашна-влаклан тиде ок кӱл. Но капыште посна ужашла коклаште икте-весе ваштареш шелалтмаш ынже лий, а чыла ужаш ик семын икте-весышт верч тыршышт манын, Юмо капын ужашыж-влакым иктыш ушымыж годым изинрак чапланыше ужаш-влаклан поснак кугу чапым пуэн.26 Ик ужаш орлана гын, тудын дене пырля чыла ужаш орлана, ик ужаш чаплана гын, тудын дене пырля чыла ужаш куана.
27 Те Христосын капше улыда, да тендан кокла гыч кажныже – тудын ужашыже.28 Южыштым Юмо Черкыште посна пашалан шогалтен: иктыштым Апостоллан, весыштым – пророклан, кумшыштым – туныктышылан, адакшым южыштлан чудым ышташ вийым, южыштлан паремден моштымашым, полшен моштымашым, вуйлатен кертмым але тӱрлӧ йылмым пуэн.29 Чылан мо Апостол улыт? Чылан мо пророк улыт? Чылан мо туныктышо улыт? Чылан мо чудым ыштат?30 Чылан мо паремден моштат? Чылан мо палыдыме йылме дене ойлат? Чылан мо йылме-влакым умылтарен моштат?31 Кугурак моштымашым Юмо деч налаш тыршыза. Кызыт мый тыланда эшеат чаплырак корным ончыктем.
Глава 12