Выбрать язык
Книги Ветхого Завета
Книги Нового Завета
с русским текстом1 Йӧратымашке шуаш тыршыза, но Святой Шӱлышын пуымо тӱрлӧ моштымашлан, поснак пророклен ойлымылан кумылаҥза.2 Вет кӧ палыдыме йылме дене ойла, еҥ-влаклан огыл, а Юмылан ойла: тудым нигӧ ок умыло, тайным Шӱлыш дене ойла.3 А кӧ пророклен ойла, еҥ-влаклан ойла: туныктен пеҥгыдемда, кумылаҥда, лыпландара.4 Кӧ палыдыме йылме дене ойла, ойлымыжо дене шкенжым туныктен пеҥгыдемда, а кӧ пророклен ойла, ойлымыжо дене черкым пеҥгыдемда.5 Те чыланат палыдыме йылме дене ойлыза манын, мый шонем, но пророклен ойледа гын, эшеат сай лиеш. Палыдыме йылме дене ойлымо шомак черкым туныктен пеҥгыдемдаш манын ок умылтаралт гын, тугеже пророклен ойлышо еҥ – палыдыме йылме дене ойлышо деч кугурак.
6 Ынде, иза-шольо-влак, тендан деке мием да палыдыме йылме дене ойлем гын, да мыйын мутыштем почмашат, шинчымашат, пророклен ойлымашат, туныктымашат уке гын, тыланда могай пайдам кондем?7 Тыгак йӱкым лукшо чондымо ӱзгар, кеч шиялтыш але кӱсле лийже, посна йӱкым ок лук гын, тудын дене мом шоктымым кузе палаш лиеш?8 Але пуч йӱкым раш ок лук гын, кӧ кредалмашлан ямдылалташ тӱҥалеш?9 Тыгак теат, йылмыда дене умылаш лийдыме мутым луктыда гын, мом ойлымыдам кузе пален налыт? Те мардежлан веле ойледа.10 Тӱняште мыняр тӱрлӧ йылме уло, мый ом пале, но нунын коклаште нимом ончыктыдымо иктат уке.11 А мут-влакын мом ончыктымыштым мый ом пале гын, ойлышылан мый йот еҥ улам, да ойлышат мылам йот улеш.12 Те Святой Шӱлышын пуымо тӱрлӧ моштымашлан кумылаҥында гын, черкым пеҥгыдемдашлан нунын дене пойдаралташ тыршыза.13 Сандене палыдыме йылме дене ойлышо еҥ умылтарен моштымым тек сӧрвален кумалеш.14 Мый палыдыме йылме дене кумалам гын, мыйын шӱлышем кумалеш гынат, ушемже саска деч посна кодеш.15 Мом ышташ? Мый шӱлыш дене кумалаш тӱҥалам, уш денат кумалаш тӱҥалам. Мый шӱлыш дене мураш тӱҥалам, уш денат мураш тӱҥалам.16 Тый Юмым шӱлышет дене веле мокташ тӱҥалат гын, погынымашыш толшо шагал палыше еҥ таум ыштыметлан кузе «аминь» манын каласа? Тудыжо тыйын ойлыметым ок умыло вет.17 Тый порын тауштет, но весылан тиде нигузе ок полшо.18 Мый палыдыме йылме дене тендан чыланда деч шукырак ойлем, тидлан Юмемлан тауштем.19 Но черкыште молымат туныкташ манын, шуко тӱжем мутым палыдыме йылме дене ойлымешке, умылаш лийше вич шомакым каласынем.
20 Иза-шольо-влак, ушда дене йоча гай ида лий. Осаллык шотышто аза гай лийза, а уш дене – кушкын шушо.21 Законышто возымо:
«Вес йылме дене ойлышо-влак гоч,
йот калыкын шомакше дене
тиде калыклан ойлаш тӱҥалам,
но тунамат Мыйым огыт колышт, манеш Господь».*а
22 Тыгеже, палыдыме йылме-влак ӱшаныше-влаклан огыл палдарыше пале улыт, а ӱшаныдыме-влаклан. Но пророклен ойлымаш ӱшаныдыме-влаклан огыл палдарыше пале, а ӱшаныше-влаклан.23 Пӱтынь черке иктыш погынымо годым чыланат палыдыме йылме дене ойлаш тӱҥалыт гын, да шагал палыше еҥ але ӱшаныдыме-влак погынымашке пурат гын, тугеже, тендан ушда каен манын, огыт каласе мо?24 А чылан пророклен ойлат да ӱшаныдыме але шинчымаш деч посна кодшо еҥ пура гын, тудын титакшым чылан ончыктат, тудым чылан лончылат,25 да тудын шӱмеш шылтымыже тӱжвак лектеш. Тунам тудо кумык возеш, Юмылан вуйым сава да ойла: «Юмо чынжымак тендан дене».
26 Кузе вара, иза-шольо-влак? Погынымыда годым тендан кокла гыч кажныдан муро, туныктымаш але почмаш, йылме але тудым умылтарымаш уло – чыла тиде тек черкым пеҥгыдемдашлан лиеш.27 Палыдыме йылме дене ойлышо лийыт гын, тек кокыт, эн шукыжо кумыт ойла, тек нуно черет дене ойлат, икте тек умылтара.28 А умылтарыше уке гын, тек черкыште нуно шып лийыт, шкаланышт да Юмылан ойлышт.29 Пророк-влак кокла гычат тек кок але кум еҥ ойла, а молышт тек ойлымыштым лончылат.30 Но тушто шинчыше-влак кокла гыч иктаж-кудыжлан Юмо деч почмаш лиеш гын, икымше ойлышо шып лийже.31 Чылан тунемышт да кумылаҥышт манын, икте-весе почеш те чыланат пророклен ойлен кертыда.32 Пророк-влакын шӱлышышт пророк-влакым колыштыт,33 вет Юмо шот деч посна ыштымын Юмыжо огыл, а тыныслыкын. Святой-влакын чыла черкыштышт тыге лиеш.
34 Тек тендан ӱдырамашда-влак черкыште шып лийыт, нуно ынышт ойло, мутым колыштшаш улыт, законат тыге ойла.35 Нуно иктаж-молан тунемнешт гын, тек тидын нерген мӧҥгыштышт марийышт деч йодыт, вет ӱдырамашлан черке погынымаште ойлаш намыс.36 Але Юмын шомак тендан деч лектын? Але тендан деке веле шуын?
37 Иктаж-кӧ шкенжым пророклан шотла але Святой Шӱлыш деч моштымашым налынам шона гын, тудо палышаш: мом мый тыланда возем, тиде Господьын кӱштымыжӧ.38 А кӧ тидым ок умыло, тек ок умыло.39 Тугеже, иза-шольо-влак, пророклен ойлаш кумылаҥза, палыдыме йылме дене ойлашат ида чаре,40 но тек чылажат келшышын да радамын лиеш.
Глава 14