Выбрать язык
Книги Ветхого Завета
Книги Нового Завета
с русским текстом1-2 Иза-шольо-влак, мый тыланда Поро Уверым каласкаленам, а те тудым шӱмышкыда пыштенда, тудын негызыштыже пеҥгыдын шогеда да, могайым мый тудым тыланда увертаренам, тугайым кучеда гын, тудын гочак утаралтыда – арам огыл те ӱшаныше лийында гын, тыге лиеш. Тиде Поро Уверым тыланда шарныктем.3 Молан мыйымат туныктеныт, тудым тыланда эн ондак туныктенам: Христос мемнан языкна верч колен, тидыже Возымаште каласыме семын лийын.4 Тудым тоеныт да, Возымаште каласыме семынак, Тудо кумшо кечын ылыж кынелын,5 Кифалан кончен, вара латкок Апостоллан.6 Тылеч вара вичшӱдӧ утла иза-шольылан иканаште кончен, нунын кокла гыч шукышт кызытат илат, а южышт коленыт.7 Вара Иаковлан, туддеч вара чыла Апостоллан кончен.8 А чыла деч вара мыланем, луктын шумо гайлан, кончен.9 Мый Апостол-влак кокла гыч эн изиже улам да Апостол маналташ ом йӧрӧ, вет Юмын черкыжым поктылынам.10 Но кӧ улам, Юмын порылыкшо дене тудо улам. Тудын мылам ончыктымо порылыкшо арам лийын огыл: чыла моло Апостол деч шуко пашам ыштенам – чынжым, тидым мый огыл ыштенам, а Юмын мый денем улшо порылыкшо.11 Тугеже ме чылан – мыят, нунат – тыгак увертарена, да теат тыгак ӱшаненда.
12 А колымаш гыч ылыжын манын, Христос нерген увертаралтеш гын, кузе тендан кокла гыч южышт колымаш гыч ылыж кынелмаш уке манын ойлен кертыт?13 Колымаш гыч ылыжмаш уке гын, Христосат ылыжын огыл.14 А Христос ылыжын огыл гын, мемнан каласкалыме увернат арам, тендан ӱшанымыдат арам,15 адакшым ме Юмо нерген шоякым каласкалышыш лектынна, вет Христосым Тудо ылыжтен манын, чын ваштареш ойленна. Колышо-влак ылыжтыме огыт лий гын, тугеже Христосым Юмо ылыжтен огыл.16 Вет колышо-влак огыт ылыж гын, Христосшат ылыжын огыл.17 А Христос ылыжын огыл гын, тендан ӱшанымыда арам, те але шкендан языкыштыда улыда,18 да Христослан ӱшанен колышо-влакат пытеныт.19 А ме ӱшанен вучымынам тиде илыш жаплан гына Христос ӱмбаке пыштенна гын, тугеже чыла еҥ дечат пиалдыме улына.
20 Но Христос колымаш гыч ылыж кынелын, колышо-влак кокла гыч икымше.21 Колымаш айдеме гоч гын, тыгеже колышо-влакын ылыжмыштат айдеме гоч лийын.22 Кузе Адам гоч чылан колат, тыгак Христос гоч чылан илышым налыт,23 но кажне шке черетше дене: тӱҥалтышлан Христос, вара Тудын толмыж годым Христосын еҥже-влак.24 А вара, кунам Тудо чыла вуйлатымашым, чыла кучемвий ден куатым пытара да Кугыжанышым Юмылан, Ачалан, пуа, тунам мучаш лиеш.25 Чыла тушманым шке йол йымакыже пыштымешке, Тудлан кугыжаланаш кӱлеш.26 Пытартыш тушман семын колымаш пытарыме лиеш.27 «Юмо чылажымат Тудын йол йымакыже пыштен»,*а но чылажымат Тудын кид йымакыже пуэн манын, Возымаш ойла гынат, раш: Тудлан чылажымат кид йымакыже Пуышо Тудын кид йымалныже огыл.28 А кунам чыла Тудын кид йымаке пуымо лиеш, тунам Эрге Шкежат кид йымаке Пуышын кидше йымаке Шкенжым пуа. Тунам Юмо чылаштат чыла лиеш.
29 Колышо олмеш тынеш пурышо еҥ-влак мом ыштат? Колышо-влак йӧршынат огыт ылыж гын, молан вара колышо-влак верч тынеш пурат?30 Молан меат шагат еда шкенам орлыклан пуэна?31 Мый кече еда колымаш тӱрыштӧ улам. Тидым, иза-шольо-влак, Господьна Христос Иисус ончылно тендан моктымыда дене*б товатлем.32 Мый Ефесыште янлык-влак ваштареш айдемын тыглай амалже дене гына кучедалынам гын, мылам могай пайда? Колышо-влак огыт ылыж гын, «кочкаш-йӱаш тӱҥалына, вет эрла садак колена».*в33 Йоҥылыш ида лий: «Уда йолташ-влак поро койышым локтылыт».34 Айык шонымашан лийза, чын корныш пӧртылза да языкым ида ыште. Вет тендан кокла гыч южышт Юмым огыт пале. Тыланда вожылашда ойлем.
35 Иктаж-кӧ ала йодеш: «Колышо-влак кузе ылыжыт, да капышт могай лиеш?»36 Шонен моштыдымо! Тыйын ӱдымет ок коло гын, тудо ылыжын ок керт.37 Тый ӱдымет годым ончыкылык капым огыл, а пырчым, мутлан, шыдаҥым але иктаж весым гына ӱдет.38 Но Юмо шонымыж семын тудлан капым пуа, да кажне пырчылан – шке капым.39 Чыла чонанын капышт икгай огытыл: айдемын капше ик тӱрлӧ, вольыкын – вес тӱрлӧ, колын – ик тӱрлӧ, кайыкын – вес тӱрлӧ.40 Уло пылпомышысо кап да мландымбалысе кап, но пылпомышысын чапше ик тӱрлӧ, мландымбалысын – вес тӱрлӧ.41 Кечын йолгалтмыже ик тӱрлӧ, тылзын – вес тӱрлӧ, шӱдыр-влакын – эше вес тӱрлӧ, да йолгалтмышт дене шӱдыр-влак икте-весышт деч ойыртемалтыт.
42 Колышо-влак ылыжме годымат тыгак лиеш: ӱдалтеш шӱймашке, кынелеш шӱйдымашке,43 ӱдалтеш чап деч посна, кынелеш чапланен, ӱдалтеш ал деч посна, кынелеш вий дене,44 ӱдалтеш чон дене илыше кап, кынелеш шӱлыш дене илыше кап. Чон дене илыше кап уло, шӱлыш дене илыше капат уло.45 Тыге возымо: «Икымше айдеме, Адам, илыше чон лийын»,*г а пытартыш Адам – илышым ыштыше шӱлыш.46 Но ончыч шӱлышан огыл, а чонан лийын, вара шӱлышан.47 Икымше айдеме – мланде гыч, рок гыч улмаш, кокымшо айдеме – пылпомыш гыч Господь.48 Рок гыч лийше айдеме могай улмаш, рок гыч лийше-влак чылан тугай улыт, да пылпомыш гыч толшо могай, пылпомышын еҥже-влак чылан тугай улыт.49 Кузе ме рок гыч лийше айдемын сынан лийынна, тугак пылпомыш гыч Толшын сынанат лийына.
50 Но тудым, иза-шольо-влак, ойлем: кап ден вӱр Юмын Кугыжанышын наследникше лийын огыт керт, шӱйшашлыкат шӱйдымылыкын наследникше ок лий.51-52 Теве тыланда тайным ойлем: чылан огыл ме колена, но кенета, иктатыштак, пытартыш пуч пуалтыме годым чылан вашталтына. Пуч йӱк шокта, колышо-влак ылыжыт да шӱйдымӧ лийыт, да ме вашталтына.53 Тиде шӱйшашлыклан шӱйдымылыкыш вӱдылалташ кӱлеш, тиде колышашлыклан – колыдымашке.54 А кунам тиде шӱйшашлык шӱйдымылыкыш вӱдылалтеш да тиде колышашлык – колыдымашке, тунам Возымашын тиде шомакше шукталтеш:
«Колымаш сеҥалтын,
колымашым нелме».
55 «Колымаш, кушто тыйын умдет?
Вес тӱня‚ кушто тыйын сеҥымашет?»*д
56 Колымашын умдыжо – язык, а языкын вийже – закон.57 А мемнан Иисус Христос Господьна гоч мыланна сеҥымашым пуышо Юмылан тау!58 Тугеже, йӧратыме иза-шольым-влак, пеҥгыдын, чоткыдын шогыза. Господь дене ушнен ыштыме пашада арам ок лий манын пален, Тудын пашажым эре тыршен шуктыза.
*б 15:31 «Тендан моктымыда дене»: тидым «Тендан верч кугешнымем дене» манынат умылаш лиеш.
*д 15:54-55 Ис 25:8‚ Ос 13:14.
Глава 15