Выбрать язык
Книги Ветхого Завета
Книги Нового Завета
с русским текстом1Кузё-Инмар Моисейлы кыӵеесь гинэ косонъёс ӧз сётылы, Моисей ваньзэ израиль пиослы вералляз.
2Израиль пиослэн выжыоссылэн кивалтӥсьёссылы Моисей тазьы шуиз: «Тани, Кузё-Инмар кыӵе косон сётӥз:3кин ке Кузё-Инмар азьын сӥзиськиз яке марлэсь ке утиськыны-возиськыны лулыныз-сюлмыныз кыл сётыса оскытӥз ке, соку со сётэм кылзэ быдэстытэк кельтыны кулэ ӧвӧл ини, ма потӥз солэн кылысьтыз-ымысьтыз, ваньзэ сое со быдэстыны кулэ.
4Кышномурт пинал дыръяз, атай юртаз эшшо улыкуз, Кузё-Инмар азьын сӥзиськиз ке, марлэсь ке утиськыны-возиськыны кыл сётӥз ке,5нош атаез кылӥз ке нылызлэсь сӥзиськемзэ, марлэсь ке утиськыны-возиськыны кыл сётэмзэ, нош со, атаез, та пумысен номыр но ӧз ке вера, соку ныллэн вань сӥзиськемъёсыз, кыл сётэмъёсыз быдэсмозы.6Нош атаез кылэм бераз ик нылызлэсь кыл сётэмзэ быдэстонлы пумит луиз ке, соку солы сӥзиськемъёссэ, марлэсь ке утиськыны-возиськыны кыл сётэмъёссэ быдэстыны кулэ ӧвӧл; Кузё-Инмар та нылэз простить кароз, малы ке шуоно та ужзэ быдэстыны атаез ӧз лэзьы.
7Та ныл бызиз ке, нош солэн быдэстоно сӥзиськемез вань ке, яке ас ымысьтыз потэм кылын ассэ кыӵе ке ужен герӟам ке,8нош кузпалыз кылӥз но кылэм бераз ик номыр но ӧз ке вера, соку солэн сӥзиськемъёсыз, сётэм кылъёсыз быдэсмозы.9Нош картэз кылыса вылысь та ужзэ кышноезлы быдэстыны ӧз ке лэзьы, солэсь кыл сётэмзэ солэн вылысьтыз палэнтӥз ке, солэн ымысьтыз потэм кылзэ но, кудӥныз со ассэ ачиз герӟаз, кулэтэм кариз ке, [соосты быдэстыны со кулэ ӧвӧл, малы ке шуоно сое быдэстыны картэз ӧз лэзьы], Кузё-Инмар та кышномуртлы сьӧлык уз гожты.
10Нош палкышнолэн, люкиськем кышномуртлэн кыл сётэмез, кыӵе гинэ со медаз луы, сое со быдэстыны кулэ.11Нылкышно картэзлэн корказ сӥзиськиз ке, марлэсь ке утиськыны-возиськыны кыл сётыса оскытӥз ке,12нош картэз кылӥз но со пумысен номыр но ӧз ке вера, со ужзэ быдэстонлы ӧз ке пумитъяськы, со вань сётэм кылъёссэ быдэстыны кулэ.13Нош картэз кылӥз но соку ик соосты кулэтэм кариз ке, соку кышномуртлэн ымысьтыз потэм сӥзиськемъёс, лулызлэн марлэсь ке утиськыны-возиськыны сётэм кылъёсыз уз быдэсме: картэз соосты быдтӥз, Кузё-Инмар кышномуртлы простить кароз.
14Кышномуртлэсь котькудзэ но сӥзиськемзэ, солэсь лулзэ зӥбломытон понна котьмарлэсь но возиськыны кыл сётыса оскытэмзэ картэз быгатэ юнматыны, картэз быгатэ палэнтыны;15нош картэз та пумысен нуналысь нуналэ номыр но вератэк улӥз ке, соку таин со кышноезлэсь вань сӥзиськемъёссэ, марлэсь ке возиськыны вань кыл сётэмъёссэ юнматӥз, уго со кылӥз но чус улӥз та пумысен.16Нош [картэз] кылэм бераз (берлогес) соосты кулэтэм кариз ке, соку со кышномуртлэсь сьӧлыксэ вылаз басьтоз».
17Тани Кузё-Инмарлэн Моисей пыр сӥзьыса сётэм пуктон-косонъёсыз, кудъёсыз сётэмын картэн кышно, атаен пинал дыръяз солэн юртаз улӥсь нылыз пумысен, соослэн кусыпъёссы пумысен.
Глава 30