Выбрать язык
Книги Ветхого Завета
Книги Нового Завета
с русским текстом1Кузё-Инмар Моисейлы тазьы вераз, тазьы шуиз:2«Израиль пиос понна мадиан калыклы пунэмзэ берыкты, нош собере аслад кулэм ӵыжы-выжыосыд доры кошкод».
3Моисей тазьы калыклы шуиз: «Асьтэ пӧлысь адямиосты ожгар тӥрлыкен дӥсялэ, соос мадиан калыклы пумит мед мынозы, Кузё-Инмарлэсь пунэм берыктонзэ мадиан калык вылын мед быдэстозы;4израиль [пиослэн] вань выжыосысьтызы, котькуд выжыысь быдэн сюрс муртэз ожмаськыны ыстэ».
5Израильлэн трос сюрс муртъёсыз пӧлысь, котькуд выжыысь быдэн сюрс мурт висъямын вал, оже мыныны дас кык сюрс мурт ожмаськон тӥрлык кияз кутӥз.6Моисей соосты оже ыстӥз, котькуд выжыысь сюрс муртэ, соосты но [Ааронлэн] Елеазар пиезлэсь Финеес пизэ, священникез, оже ыстӥз, солэн кияз вӧсяськон сосудъёс, ожмаськонэ ӝутӥсь гумыос.7Кузё-Инмарлэн Моисеез косэмезъя Мадиан вылэ ожен мынӥзы но вань пиосмуртъёссэс виизы;8мукет виылэмъёс пӧлы погыртӥзы мадиан калыклэсь эксэйёссэ: Евиез, Рекемез, Цурез, Хурез но Реваез, мадиан выжылэсь вить эксэйзэ, Веорлэсь Валаам пизэ но мечен виизы [виылэмъёсынызы ӵош];
9нош мадиан кышномуртъёсты, соослэсь нылпиоссэс пленэ нуизы, пудо-животсэс но, вань пудо уллёоссэс, вань ваньбурзэс киулазы басьтӥзы,10соослэн музъемысьтызы вань городъёссэс, вань гуртъёссэс тылын сутӥзы;11мае киултӥзы, ваньзэ сьӧразы басьтӥзы, вань талам ваньбурез: адямиосты но, пудоосты но;12пленэ сюремъёсты, талам, киултэм ваньбурез Моисей доры, Елеазар священник доры вайизы, вань израиль калык доры, Иордан дурысь Иерихонлэн ваче беринысьтыз Моав ӵошалэ интыяськем станэ, вайизы.
13Соку Моисей но Елеазар священник, калыклэн вань кивалтӥсьёсыз станысь соослэн пумитазы потӥзы.14Моисейлэн йырыз кур луиз ожен кивалтӥсьёслы, сюрс муртэн кивалтӥсьёслы, сю муртэн кивалтӥсьёслы – ожысь берытскемъёслы,15Моисей соослы шуиз: «[Малы] тӥ вань кышноосты улэп кельтӥды?16Тани соос, Валаамлэсь визь-кенешсэ санэ поныса, израиль пиосты Кузё-Инмар бордысь уськытӥзы, Фегорлы йыбыртъяны мылкыдзэс ӝутказы, со понна ик Кузё-Инмарлэн калыкез доры погран-бырон вуыны кутскиз.17Нош таре вань пи нуныосты виылэ, пиосмуртэз тодэм, пиосмуртэн валесын ӵош кӧлам вань нылкышноосты виылэ;18нош пиосмуртэн огазьын кӧланэз тодымтэ вань нылъёсты улэп кельтэ, асьтэлы мед яралозы.19Сизьым нунал ӵоже стан сьӧрын улэ; котькин, адямиез виись мурт, вием мурт борды йӧтӥськись, куинетӥ нуналэ но, сизьыметӥ нуналэ но, тӥ, асьтэос но, пленэ ваем муртъёсты но, чылкытатӥське;20вань дӥськуттэс, вань кулэсь вурем тӥрлыктэс, кеч гонлэсь куэм вань арбериостэс, вань пу посудаостэс чылкытатэ».
21Оже ветлэм ожгарчиослы Елеазар священник шуиз: «Тани Кузё-Инмарлэн Моисейлы сӥзьыса сётэм законэзлэн пуктон-косонэз:22зарни, азвесь, ыргон, корт, тӧдьы узвесь, узвесь –23ваньмыз, мар потэ тыл пыр, чылкыт мед луозы шуыса, тыл пыр поттэ, со сяна чылкытатӥсь вуэн но чылкытатэмын луыны кулэ; нош ваньмыз, мар тыл пыр уг поты, ву пыр сое поттэ;24дӥськуттэс сизьыметӥ нуналэ миське, чылкытатӥське, собере гинэ стан пушкы пыре».
25Соку Кузё-Инмар Моисейлы тазьы вераз, тазьы шуиз:26«Тон но, Елеазар священник но, калык выжыосын кивалтӥсьёс но лыдъялэ киултэм ваньбурез, адямиосты но, пудоосты но;27ваньмызлы оже ветлэмъёслы, вань калыклы ваем ваньбурез шори люкылы;28оже ветлэм ожгарчиослы сюрем люкет пӧлысь вить сю адямилы быдэ одӥгзэ Кузё-Инмар пыр левитъёслы сётыны басьты, сюро таза пудо пӧлысь, ишакъёс пӧлысь, сюро векчи пудо пӧлысь но вить сюлы быдэ одӥгзэ Кузё-Инмар пыр левитъёслы сётыны басьты;29ожгарчиослы сюрем ӝыны люкетсы пӧлысь тае басьты но Елеазар священниклы сёт, со Кузё-Инмар азе вылэ ӝутонлы ваем салам-кузьым луоз;30Израиль пиослы сюрем ӝыны люкетсы пӧлысь – витьтон адямиос пӧлысь, витьтон сюро таза пудо пӧлысь, витьтон ишакъёс пӧлысь, витьтон сюро векчи пудо пӧлысь – одӥгзэ басьты но соосты Кузё-Инмарлэн скинияяз ужась-тыршись левитъёслы сёт».
31Кузё-Инмар Моисеез мар лэсьтыны косӥз, озьы лэсьтӥзы Моисей но Елеазар священник.32Оже ветлэмъёс мае киултӥзы, солэсь кылемез ваньбур таӵе вал: куать сю сизьымдон вить сюрс сюро векчи пудо,33сизьымдон кык сюрс сюро таза пудо,34куатьтон одӥг сюрс ишакъёс,35пиосмуртэн кӧлан валесэз тодӥсьтэм куамын кык сюрс нылъёс вал.
36Ӝыныез, оже ветлэмъёслэн люкетсы, лыдъям-ӵотам бере тазьы луиз: куинь сю куамын сизьым сюрс вить сю йыр сюро векчи пудо,37Кузё-Инмарлы салам-кузьымлы сюро векчи пудо пӧлысь куать сю сизьымдон йыр вайизы;38сюро таза пудо куамын куать сюрс йыр, со пӧлысь сизьымдон кык йырзэ Кузё-Инмарлы салам-кузьымлы вайизы;39куамын сюрс вить сю ишакъёс вал, соос пӧлысь куатьтон одӥгзэ Кузё-Инмарлы салам-кузьымлы вайизы;40дас куать сюрс адямиос вал, соос пӧлысь куамын кык адямиез Кузё-Инмар азе вайизы.41Оже ветлэмъёслэсь Кузё-Инмарлы ваем салам-кузьымзэс, Моисей Елеазар священниклы сётӥз, кызьы Кузё-Инмар Моисеез лэсьтыны косӥз.
42Оже ветлэмъёслэн киултэм ваньбурзы пӧлысь ӝыны люкетсэ Моисей соослы сётӥз, ӝынызэ оже ветлымтэослы сётӥз;43киултэм ваньбурлэн таӵе ӝыны люкетэз калыклы сюриз: куинь сю куамын сизьым сюрс вить сю йыр сюро векчи пудо,44куамын куать сюрс йыр сюро таза пудо,45куамын сюрс вить сю ишакъёс,46дас куать сюрс адями.47Кузё-Инмарлэн Моисей пыр сётэм косонэзъя израиль пиослэн ӝыныез пӧлысь витьтонэтӥ люкетсэ – адямиос пӧлысь, пудо пӧлысь – Моисей басьтӥз но тае со Кузё-Инмарлэн скинияяз ужась-тыршись левитъёслы сётӥз.
48Армиысь сюрсъёсын кивалтӥсьёс, сюрс муртэн кивалтӥсьёс, сю муртэн кивалтӥсьёс Моисей доры лыктӥзы но49солы шуизы: «Ми, тынад ляльчиосыд, киямы сётэм ожгарчиосмес лыдъямы-ӵотамы, соос пӧлысь одӥгез но ӧз быры;50тани ми ваньмы шедьтэм зарни арбериосмес – жильыосты, поскесъёсты, зундэсъёсты, угыосты, чеберъян ошетъёсты – Кузё-Инмарлы салам-кузьым вайимы, Кузё-Инмар азьын лулмес чылкытатон понна вайимы».
51Моисеен Елеазар священник вань та зарни арбериоссэс соослэсь басьтӥзы;52сюрс муртэн кивалтӥсьёс, сю муртэн кивалтӥсьёс Кузё-Инмар азе вылэ ӝутыны дас куать сюрс сизьым сю витьтон сӥкль зарни вайизы.53Ожгарчиос талам ваньбурзэс асьсэлы каризы.54Сюрс муртэн кивалтӥсьёслэсь, сю муртэн кивалтӥсьёслэсь зарнизэс Моисеен Елеазар священник басьтӥзы, израиль пиосты буре ваён понна сое соос вӧсяськон скинияе Кузё-Инмар азе вайизы.
Глава 31