Выбрать язык
Книги Ветхого Завета
Книги Нового Завета
с русским текстом1Рувим пиослэн, Гад пиослэн пудо уллёоссы туж трос вал; Иазер музъем, Галаад музъем пудо возьманы ярамон интыос луо шуыса, соос адӟизы;2Гад пиос, Рувим пиос Моисеен Елеазар священник доры, калыклэн кивалтӥсьёсыз доры лыктыса шуизы:3-4«Кузё-Инмарлэн израиль калык азьын погыртэм Атароф, Дивон, Иазер, Нимра, Есевон, Елеале, Севам, Нево но Веон пудо вордыны ярамонэсь музъемъёс, нош тынад ляльчиосыдлэн пудо уллёоссы вань».5Шуизы: «Тон азьын ӟеч эриктэ басьтыны ми ярамонэсь луэмын ке, милемлы, аслад ляльчиосыдлы, та музъемез киуламы сёт вал; Иордан вамен милемыз эн выжыты вал».
6Соку Моисей Гад пиослы, Рувим пиослы шуиз: «Тӥляд агай-вынъёсты оже мынозы, нош тӥ татчы кылёды-а?7Малы тӥ израиль пиослэсь Кузё-Инмарлэн соослы сётоно музъемазы медаз выже шуыса, сюлэмзэс-мылкыдзэс мыдланьтӥськоды?8Тазьы лэсьтӥзы тӥляд атайёсты, Кадес-Варниысь музъемез учкыны ыстылыкум:9соос Есхол нёжалозь вуылӥзы, музъемез адӟизы но, Кузё-Инмарлэн соослы сётоно музъемазы медаз мынэ шуыса, израиль пиослэсь сюлэмзэс мыдланьтӥзы;10со нуналэ Кузё-Инмарлэн йыркурез ӝуатскиз но Со кыл сётыса шуиз:11”Та Египетысь потэм адямиос, кинъёслы кызь, солэсь но тросгес арес ни [ӟечен уродэз тодӥсьёс], Авраамлы, Исааклы, Иаковлы кыл сётыса верам музъемме уз адӟе, малы ке шуоно соос Мыным ӧз тэрытске,12со музъемез адӟозы Кенез выжыысь Иефоннийлэн Халев пиез но Навинлэн Иисус пиез гинэ, малы ке шуоно соос Кузё-Инмарлы тэрытскизы”.13Соку Кузё-Инмарлэн йыркурез Израиль вылэ ӝуатскиз но соосты Со ньыльдон ар ӵоже – Кузё-Инмар азьын лек уж лэсьтӥсь та выжы бырытозь – луоё кыр дуннеетӥ нуллӥз.14Нош тани, табере тӥ, сьӧлыкоослэн вордосъёссы, Кузё-Инмарлэсь ӝуась йыркурзэ Израиль вылэ эшшо но кужмогес карон понна атайёсты интые сое ӝутӥськоды.15Тӥ Солэсь палэнсконо луиды ке, соку Со Израилез нош ик луоё кыр дуннее кельтоз, озьы тӥ вань та калыкез быдтоды».
16Соку соос со доры лыктыса шуизы: «Татчы ми уллёосмылы ыж гидъёс лэсьтомы, нылпиосмылы городъёс ӝутомы;17нош ми нырысьёс пӧлын ожмаськон тӥрлыкъёс киямы кутомы но, израиль пиосты асьсэлэн интыосазы вуттытозямы, соослэн азязы мыномы, нош нылпиосмы та музъемын улӥсьёслэсь утиськон понна юнматэм городъёсы мед кылёзы;18вань израиль пиос люкетлы басьтэм музъемазы пырытозь, улоно коркаосамы ум берытске;19Иорданлэн та палаз, шундыӝужан палаз, милемлы люкетлы музъем сюриз ке, Иордан тупала, солэн сьӧраз соосын ӵош ми люкетлы музъем ум басьтэ».
20Соку Моисей соослы шуиз: «Тӥ тазьы лэсьтӥды ке, Кузё-Инмарлэн азяз оже ожмаськон тӥрлыкъёсын мынӥды ке,21ваньды тӥ, ожмаськон тӥрлык кутыса, Иордан сьӧры Кузё-Инмарлэн азяз мынӥды ке, Со Аслэсьтыз тушмонъёссэ Аслаз азьысьтыз быдтытозь,22та музъем Кузё-Инмар азьын киултэмын луоз, та бере дорады берытскоды, Кузё-Инмар азьын но, Израиль азьын но янгыштэмесь луоды, та музъем Кузё-Инмар азьын тӥляд киулады улоз.23Нош тазьы ӧд ке лэсьтэ, соку Кузё-Инмар азьын сьӧлыкалоды, сьӧлыкты понна вӧсь каронэз чидано луоды, со тӥ доры вуоз;24асьтэлэн нылпиостылы городъёс ӝутэлэ, ыжъёстылы гидъёс пуктылэ, кылды-ымды мар вераз, сое лэсьтэ».
25Соку Гад пиос, Рувим пиос Моисейлы шуизы: «Ляльчиосыд лэсьтозы озьы, кызьы косэ кузёмы;26милям нылпиосмы, кышноосмы, пудо уллёосмы, вань пудомы татчы, Галаадысь городъёсы, кылёзы,27нош тынад ляльчиосыд ожгарчиос музэн ваньзы, ожмаськон тӥрлык кутыса, кызьы вера милям кузёмы, Кузё-Инмарлэн азяз ожмаськонэ мынозы».
28Соос пумысен Моисей Елеазар священниклы, Навинлэн Иисус пиезлы, израиль калыклэн выжыосызлэн кивалтӥсьёссылы таӵе косон сётӥз,29Моисей соослы шуиз: «Гад пиос, Рувим пиос тӥледын ӵош Иордан сьӧры потӥзы ке, ваньзы ожмаськон тӥрлыкъёсын Кузё-Инмарлэн азяз оже мынӥзы ке, азьысьтыды музъемез киултӥды ке, соку Галаад музъемез соослэн киулазы сётэ;30нош соос тӥледын ӵош ожмаськон тӥрлыкъёсын [Кузё-Инмарлэн азяз ожмаськонэ] ӧз ке мынэ, [соку марзы соослэн вань – кышнооссэс, пудооссэс – асьтэлэн азяды Ханаан музъеме ыстэ,] соку соос тӥледын ӵош Ханаан музъеме асьсэлы люкет басьтозы».
31Соку Гад пиос, Рувим пиос ответ сётыса шуизы: «Кызьы Кузё-Инмар тынад ляльчиосыдлы вераз, озьы ик ми лэсьтомы;32ожмаськон тӥрлык кутыса, Кузё-Инмарлэн азяз ми Ханаан музъеме мыномы, нош люкет музъеммы Иордан шурлэн тапалаз мед луоз».
33Соослы, Гад пиослы, Рувим пиослы, Иосифлэн Манассия пиезлэн выжыезлэн ӝыны люкетызлы, Моисей аморрейёслэн Сӥгон эксэйзылэсь кун музъемзэ сётӥз, Васанлэн Ог эксэезлэсь кун музъемзэ городъёсынызы, котырысьтызы ёросъёсынызы валче, – музъемзылэн вань палъёсазы интыяськем городъёссэс сётӥз.34Гад пиос выльдӥзы-тупатъязы Дивон, Атароф, Ароер,35Атароф-Шофан, Иазер, Иогбега,36Беф-Нимра, Беф-Гаран – юнматэм городъёсты, ыж возён интыос лэсьтӥзы.37Рувим пиос выльдӥзы-тупатъязы Есевон, Елеале, Кириафаим,38Нево, Ваал-Меон городъёсты – таослэн нимъёссы воштэмын – но Сӥвмаез, выльдэм-тупатъям городъёссылы выль нимъёс сётӥзы.
39Манассиялэн Махир пиезлэн пиосыз Галаадэ мынӥзы, сое киултӥзы, отын улӥсь аморрейёсты уллязы;40Моисей Галаадэз Манассиялэн Махир пиезлы сётӥз, со отчы улыны интыяськиз.
41Манассиялэн Иаир пиез мынӥз но гуртъёссэс киултӥз, соосты «Иаирлэн гуртъёсыз» шуыса нимаз.42Новах мынӥз но Кенафез киултӥз, солы тэрытскись гуртъёсты но киулаз басьтӥз, киултэм городэзлы аслэсьтыз нимзэ сётӥз: Новах.
Глава 32