Выбрать язык
Книги Ветхого Завета
Книги Нового Завета
с русским текстом1Тани, Моисеен Ааронлэн кивалтэм улсазы Египет музъемысь полкен-полкен потэм израиль пиослэн станъёссы,2Кузё-Инмарлэн косэмезъя Моисей соослэсь луоё кыр дуннеетӥ ветлэмзэс, дугдылон интыоссэс гожъяз, тани соослэн ветлыкузы дугдылэм интыоссы – станъёссы:3Раамсесысь соос нырысетӥ толэзе, нырысетӥ толэзьлэн дас витетӥ нуналаз вырӟизы; Пасхалэн ӵуказеяз израиль пиос быдэс Египетлэн син азяз вылӥ килэн валтэм улсаз потӥзы;4нош со виын Египетысь калык вань нырысь вордскем, Кузё-Инмарлэсь погыртэм пиоссэ, ватӥз, соослэн инмаръёссылы но Кузё-Инмар суд ортчытӥз.
5Тазьы израиль пиос Раамсесысь сюрес вылэ потӥзы но Сокхофе станэн интыяськизы.6Сокхофысь кошкизы но луоё кыр дуннелэн дураз интыяськем Ефаме дугдӥзы.7Ефамысь вырӟизы но Ваал-Цефон азьысь Пи-Гахироф пала кожытскизы, Мигдоллэн азьпалаз станэн интыяськизы.8Гахирофысь потыса, зарезь вамен луоё кыр дуннее выжизы, куинь нунал ӵоже Ефам луоё кыр дунне пыр мынӥзы но Меррае станэнызы интыяськизы.9Мерраысь кошкыса, Елиме вуизы; нош Елимын дас кык ошмесэз вал, сизьымдон финикпу будӥз, отчы станэн интыяськизы.10Елимысь кошкыса, Горд Кам зарезь дуре станэн интыяськизы.11Горд Кам зарезь дурысь кошкизы но Сӥн луоё кыр дуннее станэн интыяськизы.12Сӥн луоё кыр дуннеысь кошкизы но Дофкае станэн интыяськизы.13Дофкаысь кошкизы но Алуше станэн интыяськизы.14Алушысь кошкизы но Рефидиме станэн интыяськизы, отын юыны ву ӧй вал.15Рефидимысь кошкизы но Сӥнай луоё кыр дуннее станэн интыяськизы.16Сӥнай луоё кыр дуннеысь кошкизы но Киброт-Гаттаавае станэн интыяськизы.17Киброт-Гаттааваысь кошкизы но Асирофе станэн интыяськизы.18Асирофысь кошкизы но Рифмае станэн интыяськизы.19Рифмаысь кошкизы но Римнон-Фареце станэн интыяськизы.20Римнон-Фарецысь кошкизы но Ливнае станэн интыяськизы.21Ливнаысь кошкизы но Риссае станэн интыяськизы.22Риссаысь кошкизы но Кегелафае станэн интыяськизы.23Кегелафаысь кошкизы но Шафер гурезе станэн интыяськизы.24Шафер гурезьысь кошкизы но Харадае станэн интыяськизы.25Харадаысь кошкизы но Макелофе станэн интыяськизы.26Макелофысь кошкизы но Тахафе станэн интыяськизы.27Тахафысь кошкизы но Тарахе станэн интыяськизы.28Тарахысь кошкизы но Мифкае станэн интыяськизы.29Мифкаысь кошкизы но Хашмонае станэн интыяськизы.30Хашмонаысь кошкизы но Мосерофе станэн интыяськизы.31Мосерофысь кошкизы но Бене-Яаканэ станэн интыяськизы.32Бене-Яаканысь кошкизы но Хор-Агидгадэ станэн интыяськизы.33Хор-Агидгадысь кошкизы но Иотвафае станэн интыяськизы.34Иотвафаысь кошкизы но Авронэ станэн интыяськизы.35Авронысь кошкизы но Ецион-Гавере станэн интыяськизы.36Ецион-Гаверысь кошкизы но Сӥн луоё кыр дуннее станэн интыяськизы. [Сӥн луоё кыр дуннеысь кошкизы но Фаран луоё кыр дуннее станэн интыяськизы,] со – Кадес.37Кадесысь кошкизы но Едом музъеме пырон дорысь Ор гурезе станэн интыяськизы.38Кузё-Инмарлэн косэмезъя Аарон священник Ор гурезе тубиз, со отчы кулӥз, со вал израиль пиослэн Египетысь потэмзылэн ньыльдонэтӥ араз, витетӥ толэзяз, толэзьлэн нырысетӥ нуналаз;39Ор гурезьын кулыкуз, Ааронлы сю кызь куинь арес вал.
40Ханаан музъемлэн лымшораз улӥсь ханаан пи, Арадлэн эксэез, израиль пиос лыкто шуыса кылӥз.41Ор гурезьысь израиль пиос кошкизы но Салмонэ станэн интыяськизы.42Салмонысь кошкизы но соос Пунонэ станэн интыяськизы.43Пунонысь кошкизы но Овофе станэн интыяськизы.44Овофысь кошкизы но Ийе-Авариме Моав вӧзы станэн интыяськизы.45Иймысь кошкизы но Дивон-Гадэ станэн интыяськизы.46Дивон-Гадысь кошкизы но Алмон-Дивлафаиме станэн интыяськизы.47Алмон-Дивлафаимысь кошкизы но Неволэн азьпалысьтыз Аварим гурезьёсы станэн интыяськизы.48Аварим гурезьёс дорысь кошкизы но Иерихонлы ваче беринысь Моав ӵошалъёсы, Иордан шур дуре, станэн интыяськизы;49Беф-Иешимоф дорысен Аве-Сӥттимозь, Моав ӵошалъёсы, Иордан дуре, станэн интыяськизы.
50Иерихонлы ваче беринысь Моав ӵошалъёсысен, Иордан дурысен, Кузё-Инмар Моисейлы тазьы вераз, тазьы шуиз:51«Израиль пиослы ялыса тазьы шу: ”Иордан вамен потыса Ханаан музъеме пырем берады52со музъемын вань улӥсьёсты азьысьтыды уллялэ, соослэсь вань сульдэръёссэс быдтэ, кисьтыса-дурыса лэсьтэм вань сульдэръёссэс-идолъёссэс сузмытэ, гурезь йылъёсысь вань вӧсяськон интыоссэс таркалэ;53асьтэлэн киулады басьтэ со музъемез, отчы улыны интыяське, та музъемез Мон тӥляд киулады сётӥсько.54Котькудӥз выжы люкет мед басьтозы шуыса, та музъемез, пус чӧлтыса, тӥ люкылэ: трос лыдо выжылы бадӟымгес музъем сётэ, нош ӧжыт лыдо выжылы пичигес музъем сётэ; кинлы кытчы пус усёз, отчы ик люкет музъем басьтоз; атайёстылэн выжыоссыя асьтэлы люкет музъем басьтэ.55Та музъемын улӥсьёсты азьысьтыды ӧд ке уллялэ, тӥ пӧлы кылем муртъёссы тӥляд син азьдылы бышкиськись жаг турын луозы, кӧтурдэсъёсады бышкиськись веньёс луозы, улоно музъемады тӥледыз ӝикатыса возёзы,56соку Мон соослы мар лэсьтыны малпай, лэсьто тӥледлы”».
Глава 33