Выбрать язык
Книги Ветхого Завета
Книги Нового Завета
с русским текстом1Иордан дурысь, Иерихонлы ваче беринэ интыяськем Моав ӵошалысен, Кузё-Инмар Моисейлы тазьы вераз, тазьы шуиз:2«Израиль пиослы косон сёт: соослэн киулазы люкетлы сётэм музъемысьтызы левитъёслы улыны городъёс мед сётозы, городъёс котырысь бусыосты но левитъёслы сётэ:3городъёсын соос улозы, нош бусыосын пудооссэс возёзы, юртъеръёссэс пуктылозы, улыны-вылыны мар кулэ, ваньзэ отысь басьтэмзы мед луоз.4Городъёс котырысь левитъёслы сётоно музъемъёс кар борддор дорысен, котыр ласянь, [кык] сюрс гырпум кузьда кыстӥськыны кулэ;5городлэн сьӧртӥз, шундыӝужан палтӥз, кык сюрс гырпум кузьда мерталэ, лымшор палтӥз но кык сюрс гырпум, шундыпуксён палаз но кык сюрс гырпум, уйпалтӥз но кык сюрс гырпум кузьда мерталэ, нош шораз город сылэ: таӵеесь луозы городъёс вӧзысь бусыоссы.
6Левитъёслы сётоно городъёсты пӧлысь куатез ватӥськон-пегӟон город [луоз], отчы адями виисьёсты пегӟыны лэзёды; соос вӧзы эшшо ньыльдон кык город сётэ на:7ваньзэ-ӧвӧлзэ левитъёслы тӥ ньыльдон тямыс город сётыны кулэ, соослэн вӧзазы бусыоссы мед луоз.8Израиль пиослэн киултэм музъемысьтызы городъёсты люкылыку, бадӟым выжылэсь троссэгес городъёссэ басьтэ, пичи выжылэсь ӧжытгес городъёссэ басьтэ; люкетлы сюрем музъемезлэсь быдӟалазэ лыдэ басьтыса, котькуд выжы городъёсыз пӧлысь оглюкетсэ левитъёслы сётыны кулэ».
9Кузё-Инмар Моисейлы тазьы вераз, тазьы шуиз:10«Израиль пиослы тазьы ялыса шу: Иордан вамен Ханаан музъеме выжиды ке,11асьтэлы городъёс быръе, соос тӥледлы ватӥськон-пегӟон городъёс мед луозы, янгышен адямиез виись мурт отчы пегӟыны мед быгатоз.12Калык азьын судэ султэмезлэсь азьвыл адями виись мурт ачиз но виемын медаз луы шуыса, та городъёс [вир понна] пунэм берыктӥсьёслэсь ватӥськон-пегӟон инты луозы.
13Сётоно городъёсты, ватӥськон-пегӟон городъёсты, куать луыны кулэ:14Иорданлэн тапалысьтыз куинь город сётэ, Ханаан музъеме интыяськем куинь городъёсты сётэ; ватӥськон-пегӟон городъёс соос луыны кулэ;15израиль пиослы, сьӧрлось лыктэм муртлы, тӥ пӧлы улыны интыяськем муртлы та куать городъёс ватӥськон-пегӟон инты мед луозы, котькудӥз но янгышен адямиез вием мурт отчы пегӟыны мед быгатоз.
16Кин ке но кинэ ке корт арбериен шуккиз но, соиз кулӥз ке, со – адями виись: адями виисез виыны кулэ;17кинлэн ке кияз кутэм изэныз адямиез шуккыса виыны луоно ке, но со соин кинэ ке шуккиз ке, шуккем мурт кулӥз ке, со – адями виись: адями виисез виыны кулэ;18яке пу арбериен шуккыса виыны луоно ке, киысьтыз сыӵе пу арбериеныз шуккиз но, шуккем мурт кулӥз ке, шуккись мурт – адями виись: адями виисез виыны кулэ;19вир понна пунэм берыктӥсь ачиз быгатоз адями виисез виыны: сое пумитаз ке, ачиз быгатоз сое виыны;20нош кин ке но, туж синазькыль карыса, кинэ ке донгиз яке, урод малпаса, со вылэ мае ке зӥртӥз но, со мурт кулӥз ке,21яке, тушмонъяськыса улыкуз, сое киыныз шуккиз но, со мурт кулӥз ке, шуккись муртэ виыны кулэ, уго со – адями виись. Вир понна пунэм берыктӥсь мурт адями виисез пумитам бераз ик сое виыны быгатоз.
22Нош янгышен, йыркуръяськытэк кинэ ке донгиз ке, яке, урод малпатэк, со вылэ мае ке зӥртӥз ке,23яке адӟытэк адямиез виыны быгатӥсь кыӵе ке но из со вылэ уськытӥз но, со мурт кулоно луиз ке, нош та адями со кулэм муртэн тушмонъяськыса ӧз ке улы вал, солы номыр но уродзэ лэсьтыны малпаса ӧз ке улы вал,24таӵе учыре, та пуктон-косонъёс вылэ пыкиськыса, адями виисен вир понна пунэм берыктӥсь муртъёс куспысь ужез калык чакланы-эскерыны кулэ;25та учыре калык утьыны кулэ, вир понна пунэм берыктӥсь адями виисез медаз виы шуыса, калык сое ватӥськон-пегӟон городаз берыктыны кулэ, святой вӧйын зырӟем быдӟым священник кулытозь со отын мед улоз.26Нош адями виись аслаз ватӥськон-пегӟон городэзлэн сьӧраз потӥз ке,27соку сое вир понна пунэм берыктӥсь ватӥськон-пегӟон городлэн сьӧрысьтыз шедьтӥз но та адями виисез вир понна пунэм берыктыса вииз ке, вир кисьтэм понна со мурт янгыш уз луы,28уго быдӟым священник кулытозь адями виись ватӥськон-пегӟон городаз улыны кулэ вал, нош быдӟым священник кулэм бере адями виись аслаз люкет музъемаз берытскыны кулэ вал.
29Та пуктон-косон законэн юнматэмын мед луоз выжыысь выжыосады, вань улон интыосады.
30Кин адямиез вииз, та ужез адӟись муртъёслэсь судын верамзэс санэ поныса, адями виисез виыны кулэ; адямиез виыны лэзён понна одӥг адӟисьлэн верамез тырмыт ӧвӧл.
31Адями виемез понна судэ сюрем муртлэсь лулзэ утён понна тырем дунэз эн басьтэ, со муртэ виыны кулэ;32[быдӟым] священниклэн кулэмезлэсь азьвыл ватӥськон-пегӟон городэ пегӟем муртэ, со ас музъемаз бертыны мед быгатоз шуыса, дун тырыса ассэ мозмытыны сётэм коньдонзэ эн басьтэ.33[Улоно] музъемдэс эн сапталэ, уго вир сапта музъемез, вир кисьтэм бере музъем чылкытатӥське вир кисьтэм муртлэн вирыныз гинэ.34Асьтэлэсь улон музъемдэс, кытын Мон но улӥсько, тӥ саптаны кулэ ӧвӧл, уго Мон Кузё-Инмар, израиль пиос пӧлын улӥсько».
Глава 35