Выбрать язык
Книги Ветхого Завета
Книги Нового Завета
с русским текстом1Сизьым ар ортчыса, пунэм тыронъёсты куштэ.2Пунэм тыронъёсты куштонлэн пуштросэз таӵе: котькудӥз матысь муртэзлы пунэмен сётӥсь солэсь пунэм тыронзэ куштэ, матысь муртэзлэсь яке агай-вынызлэсь пунэм тыронзэ утчаса уг улы, уго [Инмаредлэн] Кузё-Инмарлэн нимыз понна пунэм тыронъёсты куштон сярысь ялэмын;3сьӧрлось вуэм муртлэсь пунэм тыронзэ тырыты, нош агай-выныдлэсь пунэм тыронзэ кушты.
4Тӥляд пӧлады кураськисьты уз луы, уго Инмаредлэн Кузё-Инмарлэн тыныд люкетлы, пумтэм вапумъёс ӵожелы киулад басьтыны сётэм музъемаз Кузё-Инмар тонэ бакель кароз,5Инмаредлэсь Кузё-Инмарлэсь верамзэ санэ поныса улӥд ке, Солэсь вань курон-косонъёссэ быдэсъяса улӥд ке, кудъёссэ мон тыныд туннэ ивортӥсько;6Инмаред Кузё-Инмар тонэ бакель кариз ке, кызьы Со тыныд вераз вал, соку тон трос калыкъёслы пунэмен сётъялод, нош ачид пунэмаськыса уд улы, трос калыкъёсын кузёяськыса улод, нош соос тонэн уз кузёяське.
7Нош Инмаредлэн Кузё-Инмарлэн тыныд сётэм музъемаз интыяськем кудаз ке но гуртын я городын агай-вынъёсыд пӧлысь кудзы ке но кураськись луизы ке, соку тон сюлмад вожпотонэз пырыны эн лэзьы, кураськись агай-выныд азьын аслэсьтыд кидэ эн ваты,8со азе тон киостэ вӧлъя но, мар солы кулэ, малы со ӟудыса улэ, солы пунэмен сёт;9чакласькы, сюлмад таӵе йӧнтэм малпан медаз пыры: «Сизьыметӥ ар матэ вуэ, пунэм тыронэз куштон ар матэ вуэ», со пумысен кураськись агай-выныд шоры лек синмын медад учкы, солы пунэмен сётытэк медад кельты, уго со тон пумысен Кузё-Инмарлы тэльмырыса вазиськоз но, тон вылэ [туж бадӟым] сьӧлык вуоз;10[кӧня со куре, кӧня солы кулэ, сомында] солы сёт, [пунэмен но солы сёт,] солы сётыкуд, сюлмыд медаз куректы, уго сётэмед понна Инмаред Кузё-Инмар тонэ бакель кароз вань ужъёстэ быдэсъякуд, ас киыныд вань ужъёсты быдэсъякуд;11кураськисьёс [тынад улоно] музъемад котьку но луозы уго, соин ик мон тонэ косӥсько: музъем вылад улӥсь агай-вынъёсыдлы – кураськыса, куанер улӥсь муртэдлы – юрттыны кидэ мыч.
12Еврей пи яке еврей ныл ляльчие тыныд вузаськиз ке, куать ар ӵоже со тыныд ляльчи мед луоз, нош сизьыметӥяз аре тон сое дорысьтыд эрике лэзь;13дорысьтыд сое эрике лэзьыкуд, буш киын сое эн келя,14пудо уллёысьтыд мардэ ке но сёт, итымысьтыд, вина виятон гуысьтыд но мардэ ке но солы сёт: Инмаред Кузё-Инмар маин тонэ бакель кариз, со бордысь солы сёт.15Тодад вай: тон [но] Египет музъемын ляльчиын вал, но тонэ Инмаред Кузё-Инмар мозмытӥз, соин ик мон туннэ тыныд тае сӥзьыса верасько.16Нош со тыныд шуиз ке: «Мон тон дорысь уг кошкы, малы ке шуоно мон тонэ но, тынэсьтыд семьяостэ но яратӥ», уго солы умой потэ тон дорын улыны,17соку тон пежъян басьты но пельзэ ӧс борды карыса пася, – табере со пырак ӵожелы тынад ляльчиед луоз. Тазьы ик кар ляльчи нылыныд но.18Та уж тон понна секыт луэ шуыса эн лыдъя, тон сое дорысьтыд эрике лэзьыны кулэ ке луид, уго со куать ар куспын медъям муртлы тырон сярысь кык пол тросгес ваньбур тыныд люказ; мар гинэ тон уд лэсьты, Инмаред Кузё-Инмар тонэ бакель кароз.
19Сюро таза пудоедлэсь, сюро векчи пудоедлэсь нырысь вордскем ошъёссэ, такаоссэ, кечтакаоссэ Инмаредлы Кузё-Инмарлы сётыны сӥзь: нырысь вордскем ошеныд эн ужа, нырысь вордскем такаосыдлэсь, кечтакаосыдлэсь гонзэс эн ӵышкы;20арлы быдэ таосты Инмаред Кузё-Инмар азьын си ачид но, семьяосыд но, си [Инмаредлэн] Кузё-Инмарлэн быръем интыяз;21нош та пудоосыдлэн шексы луиз ке, – чуто ке, синтэмесь ке, [яке] кыӵе ке мукет шексы вань ке, соку таӵе пудоез Инмаредлы Кузё-Инмарлы курбонлы эн вайы,22соосты дорад си; чылкытлыкез утисьтэм мурт чылкытлыкез утись мурт кадь ик таӵе пудоосты, кыркечез, пужеез сием кадь ик [мед сиёз];23но соослэсь вирзэс эн сиы: вуэз кадь сюй вылэ сое кисьты.
Глава 15