Выбрать язык
Книги Ветхого Завета
Книги Нового Завета
с русским текстом1Вань калык Иордан тупала выжем бере Кузё-Инмар Иисуслы шуиз:2«Калык пӧлысь дас кык муртэ басьтэ, котькуд выжыысь быдэн одӥг адямиен,3соослы косон сётыса шуэ: ”Татысь, Иордан шорысь, священникъёслэн пыдъёссылэн йыг-йыг сылон интыысьтызы, басьтэ дас кык из, соосты бӧрсяды поттэ но та уе кӧлон интыяды понэ”».
4Иисус Израиль пиос пӧлысь дас кык быръем адямиоссэ ӧтиз, котькуд выжыысь быдэн одӥг адямиен,5Иисус соослы шуиз: «Инмардылэн Кузё-Инмарлэн ковчегез азе Иорданлэн шорозяз мынэлэ, израиль пиослэн выжыоссы мында ваньды отысь из басьтэ но пельпум вылады поныса нуэ,6соос [котьку но] тӥ дорын [кыллись] тодмет мед луозы; дыр ортчыса, тӥляд пиосты тӥлесьтыд тазьы шуыса юазы ке: ”Малы люкамын тӥляд та изъёсты?”7Тӥ соослы шуэ: ”[Быдэс дуннелэн] Кузё-Инмарезлэн сӥзён-косонэн ковчегез азьын Иорданысь вулэсь шори люкиськемзэ тодэ ваён понна; Иордан вамен сое поттыку, Иорданлэн вуэз шори люкиськиз”; озьы, [тӥ дорысь] та изъёс израиль пиос понна пумтэм вапумъёс ӵожелы синпелет луозы».
8Израиль пиос Иисуслэн косэмезъя лэсьтӥзы: Иорданысь дас кык из басьтӥзы, кызьы Кузё-Инмар Иисуслы вераз, израиль пиослэн выжыоссылэн лыдзыя; соосты бордазы кӧлан интыязы нуизы но отчы понӥзы.9[Мукетъёссэ] дас кык изъёсты Иисус Иордан шоры тыриз, – [Кузё-Инмарлэсь] сӥзён-косонэн ковчегзэ нуись священникъёслэн пыдъёссылэн сылон интыязы. Со изъёс отын туннэ нуналозь сыло.
10[Кузё-Инмарлэсь сӥзён-косонэн] ковчегзэ нуись священникъёс Иордан шорын сылӥзы, Кузё-Инмарлэсь Иисус пыр калыклы быдэстыны косэм вань ужъёссэ [Иисус] быдэстытозь – озьы, кызьы Моисей Иисуслы быдэстыны косӥз; соку калык дыртыса тупала выжылӥз.11Вань калык [Иордан] тупала выжем бере Кузё-Инмарлэн [сӥзён-косонэн] ковчегез но тупала выжиз, священникъёс калыклэн азьпалаз выжизы;12Рувимлэн пиосыз, Гадлэн пиосыз, Манассия выжылэн ӝыны люкетэз ожмаськон тӥрлыкъёсын израиль пиослэн азьпалазы потӥзы, кызьы соослы Моисей вераз вал.13Ог ньыльдон сюрс мурт, ожмаськон тӥрлыкъёс дӥсяса, Кузё-Инмарлэн азьтӥз Иерихон ӵошалысь ож бусые ожмаськыны потӥз.
14Со нуналэ Кузё-Инмар быдэс Израильлэн син азяз Иисусэз данэ поттӥз, – солэсь кышкаса улыны кутскизы, кызьы Моисейлэсь солэн вань улоно нуналъёсыз ӵоже кышкаса улӥзы.
15Кузё-Инмар Иисуслы тазьы шуиз:16«Сӥзён-косонэн ковчегез нуись священникъёсты Иорданысь потыны кос».17Иисус священникъёслы косон сётыса шуиз: «Иорданысь потэ»,18Кузё-Инмарлэсь сӥзён-косонэн ковчегзэ нуись священникъёс Иорданысь потэм бере пыдтышъёсынызы музъем вылэ лёгиськыса вуизы гинэ, соку ик Иорданысь ву азьвыл интытӥз ик бызьыны кутскиз, толло кадь, толон валлян кадь бызиз но яр йылаз ӝутскыса бызьыны кутскиз.
19Нырысетӥ толэзьлэн дасэтӥ нуналаз калык Иорданысь потӥз но Иерихонлэн шундыӝужан палаз, Галгалэ, стан пуктӥз.20Соослэсь Иорданысь басьтэм дас кык изъёссэс Иисус Галгалэ пуктӥз но21израиль пиослы шуиз: «Дыръёс-аръёс ортчем бере пиосты атайёссылэсь юазы ке: ”Мае возьмато та изъёс?”22Тӥ пиостылы шуэ: ”Соос Израильлэсь Иордан вамен сюй вылтӥ выжемзэ возьмато”.23Уго тӥляд Инмарды Кузё-Инмар тӥ понна Иорданлэсь вузэ куасьтӥз, со вамен тӥ тупала выжытозь, – озьы ик, кызьы Инмарды Кузё-Инмар Горд Кам зарезен кариз: [Инмарды Кузё-Инмар] милям азьтӥмы, со вамен тупала выжытозямы, сое куасьтӥз,24музъем вылысь вань адямиос мед тодозы, Кузё-Инмарлэн киыз кужмо, вань улоно нуналъёсты ӵоже тӥ Инмардылэсь Кузё-Инмарлэсь кышкаса мед улоды шуыса».
Глава 4